ନୂଆଦିଲ୍ଲୀ, ୧୪ ସେପ୍େଟମ୍ବର (ହି.ସ.)- ଦିଲ୍ଲୀ ବିଶ୍ୱବିଦ୍ୟାଳୟ ଶିକ୍ଷକ ସଂଘ (ଡୁଟା)ର ତିନିଥର ଅଧ୍ୟକ୍ଷ ରହିଥିବା ଡ. ଆଦିତ୍ୟ ନାରାୟଣ ମିଶ୍ରଙ୍କ ସମେତ ଅନେକ ଶିକ୍ଷାବିତ ଏବଂ ବୁଦ୍ଧିଜୀବୀ ସୋମବାର କଂଗ୍ରେସର ସଦସ୍ୟତା ଗ୍ରହଣ କରିଛନ୍ତି। କଂଗ୍ରେସ ମୁଖ୍ୟାଳୟରେ ଆୟୋଜିତ ଏକ କାର୍ଯ୍ୟକ୍ରମରେ ଦିଲ୍ଲୀ ପ୍ରଦେଶ କଂଗ୍ରେସ ପ୍ରଭାରୀ କାଜି ନିଜାମୁଦ୍ଦିନ, ପ୍ରଦେଶ ଅଧ୍ୟକ୍ଷ ଦେବେନ୍ଦ୍ର ଯାଦବ ଏବଂ ଦଳର ଅନୁସୂଚିତ ଜାତି ବିଭାଗର ଜାତୀୟ ଅଧ୍ୟକ୍ଷ ରାଜେନ୍ଦ୍ର ପାଲ ଗୌତମ ସମସ୍ତଙ୍କୁ ବିଧିବଦ୍ଧ ଭାବେ ଦଳରେ ସାମିଲ କରାଇଥିଲେ। କଂଗ୍ରେସର ସଦସ୍ୟତା ନେବା ପରେ ଡ. ଆଦିତ୍ୟ ନାରାୟଣ ମିଶ୍ର କହିଛନ୍ତି ଯେ ସେ ଲୋକସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀଙ୍କ ହାତକୁ ମଜବୁତ କରିବା ପାଇଁ କଂଗ୍ରେସରେ ଆସିଛନ୍ତି। ରାହୁଲ ଗାନ୍ଧୀ ଉଚ୍ଚ ଶିକ୍ଷଣ ପ୍ରତିଷ୍ଠାନ ଏବଂ ସାର୍ବଜନୀନ ଶିକ୍ଷା ବ୍ୟବସ୍ଥା ଉପରେ ହେଉଥିବା ସୁନିୟୋଜିତ ଆକ୍ରମଣ ବିରୋଧରେ ନିରନ୍ତର ସ୍ୱର ଉଠାଉଛନ୍ତି। ସରକାରୀ ଆର୍ôଥକ ସହାୟତା ପ୍ରାପ୍ତ ଶିକ୍ଷଣ ପ୍ରତିଷ୍ଠାନଗୁଡ଼ିକୁ ବଂଚାଇବା ଏବଂ ସମସ୍ତ ବର୍ଗଙ୍କ ପାଇଁ ଶିକ୍ଷାରେ ସାମାଜିକ ନ୍ୟାୟ ଓ ସମାନତା ସୁନିଶ୍ଚିତ କରିବାର ଲଢ଼େଇରେ ସେ ମଧ୍ୟ ଅଂଶୀଦାର ହେବାକୁ ଆସିଛନ୍ତି। ସେ ଅଭିଯୋଗ କରିଛନ୍ତି ଯେ ସାରା ଦେଶରେ ହଜାର ହଜାର ପ୍ରାଥମିକ ଓ ମାଧ୍ୟମିକ ବିଦ୍ୟାଳୟ ବନ୍ଦ କରାଯାଉଛି ଏବଂ ଏବେ ଉଚ୍ଚ ଶିକ୍ଷା ମଧ୍ୟ ଏହି ଗମ୍ଭୀର ସଙ୍କଟ ଆଡ଼କୁ ବଢ଼ୁଛି।

ରାଜେନ୍ଦ୍ର ପାଲ ଗୌତମ ନୂତନ ସଦସ୍ୟମାନଙ୍କୁ ସ୍ୱାଗତ କରି କହିଛନ୍ତି ଯେ ଡ. ମିଶ୍ର ଏବଂ ତାଙ୍କ ସାଥୀମାନେ ସମ୍ବିଧାନ, ଗଣତନ୍ତ୍ର ଏବଂ ସାର୍ବଜନୀନ ଶିକ୍ଷାକୁ ବଂଚାଇବାର ସଂକଳ୍ପ ସହ ଏହି ପଦକ୍ଷେପ ନେଇଛନ୍ତି। ଗୌତମ ଅଭିଯୋଗ କରିଛନ୍ତି ଯେ ଦିଲ୍ଲୀ ବିଶ୍ୱବିଦ୍ୟାଳୟରେ ଶାସକ ବିଚାରଧାରା ସହ ଜଡ଼ିତ କାର୍ଯ୍ୟକ୍ରମଗୁଡ଼ିକ ଉପରେ ବିପୁଳ ଅର୍ଥ ଖର୍ଚ୍ଚ କରାଯାଉଛି, ଯେତେବେଳେ କି ସେହି ଟଙ୍କାରେ ଛାତ୍ରଛାତ୍ରୀଙ୍କ ପାଇଁ ଛାତ୍ରାବାସ ଏବଂ ମୌଳିକ ସୁବିଧା ନିର୍ମାଣ କରାଯାଇପାରିଥାନ୍ତା। ଶିକ୍ଷାକୁ ଏତେ ମହଙ୍ଗା କରିଦିଆଯାଇଛି ଯେ ସାଧାରଣ ଏବଂ ଗରିବ ପରିବାରଗୁଡ଼ିକ ପାଇଁ ଉଚ୍ଚ ଶିକ୍ଷା ପାଇବା ଅତ୍ୟନ୍ତ କଷ୍ଟକର ହୋଇପଡ଼ିଛି।

ଦିଲ୍ଲୀ ପ୍ରଦେଶ କଂଗ୍ରେସ ଅଧ୍ୟକ୍ଷ ଦେବେନ୍ଦ୍ର ଯାଦବ କହିଛନ୍ତି ଯେ ଡ. ଆଦିତ୍ୟ ନାରାୟଣ ମିଶ୍ରଙ୍କ ଦୀର୍ଘ ଶିକ୍ଷାଗତ ଏବଂ ସାଙ୍ଗଠନିକ ଅଭିଜ୍ଞତା ଯୁବକ ଓ ଛାତ୍ରଛାତ୍ରୀଙ୍କୁ ସଠିକ ଦିଗ ଦେବାରେ ସହାୟକ ହେବ। ସେହିପରି, ଦିଲ୍ଲୀ ପ୍ରଦେଶ ପ୍ରଭାରୀ କାଜି ନିଜାମୁଦ୍ଦିନ କହିଛନ୍ତି ଯେ ଆଜି ଛାତ୍ର ଏବଂ ଶିକ୍ଷକମାନଙ୍କୁ ନିଜ ଅଧିକାର ପାଇଁ ରାସ୍ତାରେ ଲାଠି ଖାଇବାକୁ ପଡ଼ୁଛି ଏବଂ ଥାନାର ଚକ୍କର ଲଗାଇବାକୁ ପଡ଼ୁଛି। ଏପରି ସମୟରେ ପ୍ରବୁଦ୍ଧ ଶିକ୍ଷାବିତମାନଙ୍କର କଂଗ୍ରେସ ସହ ଯୋଡ଼ିହେବା ଶିକ୍ଷାର ଅଧିକାରର ଲଢ଼େଇକୁ ବିଚାରଧାରାତ୍ମକ ଭାବେ ଆହୁରି ସଶକ୍ତ କରିବ।

-----------

---------------

ହିନ୍ଦୁସ୍ଥାନ ସମାଚାର / ଗଗନ