ନୂଆଦିଲ୍ଲୀ, ୧୬ ସେପ୍ଟେମ୍ବର (ହି.ସ) ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) କହିଛି ଯେ, ୨,୦୦୦ ଟଙ୍କାରୁ ଅଧିକ ୟୁପିଆଇ ନେଣଦେଣ ଉପରେ ୦.୪ ପ୍ରତିଶତ ଶୁଳ୍କ (ଏମ୍ଡିଆର୍) ଲାଗୁ କରିବା ଭାରତର ଡିଜିଟାଲ ପେମେଣ୍ଟ୍ ପରିବେଶର ଦୀର୍ଘକାଳୀନ ସ୍ଥାୟିତ୍ୱ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ।

ଆର୍ବିଆଇ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଏକ ପୋଷ୍ଟ ଜରିଆରେ କହିଛି ଯେ, ଏହି ପରିବେଶରେ ଏମ୍ଡିଆର୍ର ଉଚିତ ଓ ସଠିକ୍ ବଣ୍ଟନ ପ୍ରଯୁକ୍ତି, ଭିତ୍ତିଭୂମି ଏବଂ ପେମେଣ୍ଟ୍ ଗ୍ରହଣ ବ୍ୟବସ୍ଥାରେ ନିରନ୍ତର ନିବେଶକୁ ପ୍ରୋତ୍ସାହିତ କରିବ। କେନ୍ଦ୍ରୀୟ ବ୍ୟାଙ୍କ କହିଛି ଯେ, ଏହା ୟୁପିଆଇକୁ ଦେଶବ୍ୟାପୀ ଗ୍ରାହକ ଓ ବ୍ୟବସାୟୀଙ୍କ ପାଇଁ ଆହୁରି ବିକଶିତ ହେବା, ନୂତନତ୍ୱ ଆଣିବା ଏବଂ ସେବା ପ୍ରଦାନ କରିବାରେ ସହାୟତା କରିବ।

ଆର୍ବିଆଇ କହିଛି ଯେ, ଏହା ୟୁପିଆଇର ବ୍ୟାପକ ଗ୍ରହଣୀୟତା, ଗ୍ରାହକଙ୍କ ସଂଖ୍ୟା ବୃଦ୍ଧି ଏବଂ ଲେଣଦେଣର ପରିମାଣରେ ନିରନ୍ତର ବୃଦ୍ଧିରେ ସହାୟକ ହୋଇପାରେ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ସମସ୍ତ ୟୁପିଆଇ ଲେଣଦେଣ (ବ୍ୟକ୍ତିରୁ ବ୍ୟକ୍ତି ଏବଂ ବ୍ୟକ୍ତିରୁ ବ୍ୟବସାୟୀ ବା ମର୍ଚ୍ଚାଣ୍ଟ) ବ୍ୟବହାରକାରୀଙ୍କ ପାଇଁ ମାଗଣା ରହିବ ଏବଂ ୨,୦୦୦ ଟଙ୍କାରୁ କମ୍ ବ୍ୟକ୍ତିରୁ ବ୍ୟବସାୟୀଙ୍କୁ କରାଯାଉଥିବା ଲେଣଦେଣ ବ୍ୟବସାୟୀଙ୍କ ପାଇଁ ମଧ୍ୟ ମାଗଣା ରହିବ।

କେନ୍ଦ୍ରୀୟ ବ୍ୟାଙ୍କ ଆଶ୍ୱାସନ ଦେଇ କହିଛି, “ୟୁପିଆଇ ଯେପରି ସୁରକ୍ଷିତ, ନିରବଚ୍ଛିନ୍ନ, ଶସ୍ତା ଏବଂ ସହଜରେ ଉପଲବ୍ଧ ରହିବ, ତାହା ସୁନିଶ୍ଚିତ କରିବା ପାଇଁ ରିଜର୍ଭ ବ୍ୟାଙ୍କ ପ୍ରତିବଦ୍ଧ। ଏହା ସହିତ ଭାରତର ବିଶ୍ୱସ୍ତରୀୟ ଡିଜିଟାଲ ପେମେଣ୍ଟ୍ ପରିବେଶର ଦୀର୍ଘକାଳୀନ ସ୍ଥାୟିତ୍ୱ ଓ ବିକାଶକୁ ମଧ୍ୟ ପ୍ରୋତ୍ସାହନ ଦିଆଯିବ।”

ଏହାର ଗୋଟିଏ ଦିନ ପୂର୍ବରୁ ଭାରତୀୟ ଜାତୀୟ ପେମେଣ୍ଟ୍ ନିଗମ (ଏନ୍ପିସିଆଇ) କହିଥିଲା ଯେ, ବଡ଼ ଡିଜିଟାଲ ପେମେଣ୍ଟ୍ ପାଇଁ ଜାରି ହୋଇଥିବା ନୂତନ ବ୍ୟବସ୍ଥା ଅନୁସାରେ ୨,୦୦୦ ଟଙ୍କାରୁ ଅଧିକ ୟୁପିଆଇ ଲେଣଦେଣ ଗ୍ରହଣ କରିବା ଉପରେ ବ୍ୟବସାୟୀଙ୍କଠାରୁ ୦.୪ ପ୍ରତିଶତ ‘ମର୍ଚ୍ଚାଣ୍ଟ ଡିସ୍କାଉଣ୍ଟ ରେଟ୍’ (ଏମ୍ଡିଆର୍) ଶୁଳ୍କ ନେବାକୁ ସ୍ଥିର କରାଯାଇଛି। ତେବେ ୟୁପିଆଇ ପେମେଣ୍ଟ୍ ଉପରେ ଏପରି ଶୁଳ୍କ ଲାଗୁ ହେବାର ପ୍ରଭାବ ସାଧାରଣ ଉପଭୋକ୍ତାଙ୍କ ଉପରେ ପଡ଼ିବ ନାହିଁ।

ଅନ୍ୟପକ୍ଷରେ, ଅର୍ଥ ମନ୍ତ୍ରାଳୟ ପକ୍ଷରୁ ଜାରି ଏକ ବିବୃତ୍ତିରେ କୁହାଯାଇଛି ଯେ, ନୂତନ ବ୍ୟବସ୍ଥା ଅନୁସାରେ ୨,୦୦୦ ଟଙ୍କାରୁ ଅଧିକ ୟୁପିଆଇ ପେମେଣ୍ଟ୍ ଗ୍ରହଣ କରିବା ଉପରେ ବ୍ୟବସାୟୀଙ୍କଠାରୁ ୦.୪ ପ୍ରତିଶତ ଏମ୍ଡିଆର୍ ଶୁଳ୍କ ନେବାକୁ ସ୍ଥିର କରାଯାଇଛି। ୭୫,୦୦୦ ଟଙ୍କା କିମ୍ବା ତା’ଠାରୁ ଅଧିକ ପେମେଣ୍ଟ୍ ଉପରେ ସର୍ବାଧିକ ଶୁଳ୍କ ୩୦୦ ଟଙ୍କା ହେବ। ଏହି ନୂତନ ପରିବର୍ତ୍ତନ ୧୫ ଅକ୍ଟୋବର ୨୦୨୬ରୁ ଲାଗୁ ହେବ। ରେଳବାଇ, ଟେଲିକମ୍ ଏବଂ ଇନ୍ଧନ ଭଳି ଅତ୍ୟାବଶ୍ୟକ କ୍ଷେତ୍ରରେ ପ୍ରତି ଲେଣଦେଣ ପାଇଁ ୫ ଟଙ୍କାର ସମାନ ଶୁଳ୍କ ଲାଗିବ। ଅନ୍ୟପକ୍ଷରେ, ପୁଞ୍ଜି ବଜାରରେ ପେମେଣ୍ଟ୍ ପାଇଁ ଏମ୍ଡିଆର୍ ହାର ୦.୦୨ ପ୍ରତିଶତ ରହିବ।

ଉଲ୍ଲେଖଯୋଗ୍ୟ ଯେ, ୟୁପିଆଇର ପରିଚାଳନା ନ୍ୟାସନାଲ ପେମେଣ୍ଟ୍ସ କର୍ପୋରେସନ୍ ଅଫ୍ ଇଣ୍ଡିଆ (ଏନ୍ପିସିଆଇ) କରିଥାଏ। ଏହା ରିଜର୍ଭ ବ୍ୟାଙ୍କ ଏବଂ ଇଣ୍ଡିଆନ୍ ବ୍ୟାଙ୍କ୍ସ ଆସୋସିଏସନ୍ର ଏକ ପଦକ୍ଷେପ। ୟୁପିଆଇ ଲୋକମାନଙ୍କ ମଧ୍ୟରେ ରିଅଲ୍-ଟାଇମ୍ ପେମେଣ୍ଟ୍ ସୁବିଧା ପ୍ରଦାନ କରିଥାଏ ଏବଂ ଗ୍ରାହକମାନଙ୍କୁ କିଣାକାଟା ସମୟରେ ସିଧାସଳଖ ବ୍ୟବସାୟୀଙ୍କୁ ପେମେଣ୍ଟ୍ କରିବାର ସୁବିଧା ଦେଇଥାଏ।

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା