କାଠମାଣ୍ଡୁ, ୨୩ ସେପ୍ଟେମ୍ବର (ହି.ସ.)। ନେପାଳର ଅଧ୍ୟାଗମନ ବିଭାଗ ଏକା ଥରକେ ୮୮ ଜଣ ଚୀନର ନାଗରିକଙ୍କ ଭିସା ବାତିଲ କରିଛି। ଏହି ନାଗରିକମାନେ ବ୍ୟବସାୟିକ ଭିସା ନେଇ ନେପାଳରେ ରହୁଥିଲେ। ତେବେ ଭିସା ପ୍ରଦାନର ଉଦ୍ଦେଶ୍ୟର ବିପରୀତ କାର୍ଯ୍ୟକଳାପରେ ସେମାନେ ସମ୍ପୃକ୍ତ ଥିବା ଜଣାପଡ଼ିବା ପରେ ଭିସା ବାତିଲ ସହ ସେମାନଙ୍କୁ ନେପାଳରୁ ଦେଶାନ୍ତର କରିବା ପ୍ରକ୍ରିୟା ଆରମ୍ଭ ହୋଇଛି।

ଅଧ୍ୟାଗମନ ବିଭାଗର ନିର୍ଦ୍ଦେଶକ ଟିକାରାମ ଢକାଲଙ୍କ କହିବା ଅନୁସାରେ, ଏହି ସମସ୍ତ ଚୀନର ନାଗରିକ ସିନ୍ଧୁଲି ଜିଲ୍ଲାରେ ଛେନ୍ଦୁ ଟିଆନ୍ ଫୁଡ୍ ଲିମିଟେଡ୍ର ଆର୍ଥିକ ସହଭାଗିତାରେ ନିର୍ମାଣାଧୀନ ଜିଆନ୍ ଫୁଡ୍ସ ପ୍ରାଇଭେଟ୍ ଲିମିଟେଡ୍ର ‘ନେପାଳ ହିଟ୍ ପ୍ରୋସେସ୍ଡ ବଫାଲୋ ମିଟ୍ ଏକ୍ସପୋର୍ଟ ଟୁ ଚାଇନା ପ୍ରୋଜେକ୍ଟ’ରେ କାମ କରୁଥିଲେ।

ବିଭାଗ ଅନୁସାରେ, ସମସ୍ତ ୮୮ ଜଣ ଅନ୍ୟ କମ୍ପାନୀଙ୍କ ନାମରେ ବ୍ୟବସାୟିକ ଭିସା ନେଇଥିଲେ। କିନ୍ତୁ ସେମାନେ ଭିସାର ନିର୍ଦ୍ଧାରିତ ସର୍ତ୍ତ ଓ ଉଦ୍ଦେଶ୍ୟର ବିପରୀତ କାର୍ଯ୍ୟରେ ନିୟୋଜିତ ଥିବା ଜଣାପଡ଼ିଥିଲା। ଏହା ପରେ ସେମାନଙ୍କ ଭିସା ବାତିଲ କରାଯାଇ ଅଧ୍ୟାଗମନ ଆଇନ, ୨୦୪୯ ଅନୁସାରେ ଜରିମାନା ଆଦାୟ ଏବଂ ନେପାଳରୁ ନିଷ୍କାସନ ପ୍ରକ୍ରିୟା ଆରମ୍ଭ କରାଯାଇଛି।

ଅଧ୍ୟାଗମନ ବିଭାଗ ବିଦେଶୀ ନାଗରିକମାନଙ୍କୁ ସେମାନଙ୍କ ଭିସାର ଉଦ୍ଦେଶ୍ୟ ଓ ନିର୍ଦ୍ଧାରିତ ସର୍ତ୍ତ ଅନୁସାରେ ନେପାଳରେ କାର୍ଯ୍ୟକଳାପ କରିବାକୁ ଆହ୍ୱାନ କରିଛି। ଏଥିସହ ସମ୍ପୃକ୍ତ ଶିଳ୍ପ, କମ୍ପାନୀ, ପ୍ରତିଷ୍ଠାନ ଓ ନିଯୁକ୍ତିଦାତାମାନଙ୍କୁ ଉପଯୁକ୍ତ ଭିସା ଏବଂ ଆବଶ୍ୟକ ଅନୁମତି ବିନା ବିଦେଶୀ ନାଗରିକଙ୍କୁ ନିଯୁକ୍ତି ନଦେବାକୁ ଚେତାବନୀ ଦିଆଯାଇଛି।

ବିଭାଗ କହିଛି ଯେ, କୌଣସି ବିଦେଶୀ ନାଗରିକ ଅଧ୍ୟାଗମନ ଆଇନ କିମ୍ବା ଅନ୍ୟ ପ୍ରଚଳିତ ଆଇନର ଉଲ୍ଲଂଘନ କରିଥିବା ଜଣାପଡ଼ିଲେ ତାଙ୍କ ବିରୋଧରେ ଆଇନା ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ।

ନେପାଳରେ ବ୍ୟବସାୟ କିମ୍ବା ଶିଳ୍ପ କାରବାରରେ ନିବେଶ ପାଇଁ ଅନୁମତି ପାଇଥିବା ବିଦେଶୀ ନାଗରିକ କିମ୍ବା ସେହିପରି ସଂସ୍ଥାର ଅଧିକୃତ ପ୍ରତିନିଧିଙ୍କୁ ସମ୍ପୃକ୍ତ ନିକାୟର ସୁପାରିଶ ଆଧାରରେ ବ୍ୟବସାୟିକ ଭିସା ପ୍ରଦାନ କରାଯାଏ। ଏହାବ୍ୟତୀତ ନେପାଳରେ ଉତ୍ପାଦିତ ସାମଗ୍ରୀ କ୍ରୟ କରି ତାହାକୁ ବିଦେଶକୁ ରପ୍ତାନି କରୁଥିବା ବିଦେଶୀ ନାଗରିକଙ୍କ ପାଇଁ ମଧ୍ୟ ବ୍ୟବସାୟିକ ଭିସା ପ୍ରଦାନର ବ୍ୟବସ୍ଥା ରହିଛି।

ଅଧ୍ୟାଗମନ ନିୟମାବଳୀ ଅନୁସାରେ, ବ୍ୟବସାୟିକ ଭିସା ପାଇଥିବା ବିଦେଶୀ ନାଗରିକଙ୍କୁ ଯେଉଁ ଉଦ୍ଦେଶ୍ୟରେ ଭିସା ଜାରି କରାଯାଇଛି, ସେହି ଉଦ୍ଦେଶ୍ୟରେ ହିଁ ନେପାଳରେ ରହିବାକୁ ପଡ଼ିଥାଏ। ବ୍ୟବସାୟିକ ଭିସାକୁ ନିଯୁକ୍ତି, ଶ୍ରମ କିମ୍ବା ଅନ୍ୟ କୌଣସି ଅସମ୍ପର୍କିତ କାର୍ଯ୍ୟକଳାପ ପାଇଁ ବ୍ୟବହାର କରାଯାଇପାରିବ ନାହିଁ।

ବିଭାଗ କହିଛି ଯେ, ଅନୁଧ୍ୟାନ ଓ ନିରୀକ୍ଷଣ ସମୟରେ କେତେକ ବିଦେଶୀ ନାଗରିକ ସେମାନଙ୍କ ଭିସା ପାଇଁ ଦିଆଯାଇଥିବା ସୁପାରିଶ ଏବଂ ଅନୁମୋଦିତ ବ୍ୟବସାୟ କିମ୍ବା ନିବେଶର ଉଦ୍ଦେଶ୍ୟଠାରୁ ଭିନ୍ନ ପ୍ରକାରର କାର୍ଯ୍ୟରେ ସମ୍ପୃକ୍ତ ଥିବା ଜଣାପଡ଼ିଥିଲା। ଏଥିରେ ନିଯୁକ୍ତି, ଶ୍ରମ ଏବଂ ଅନ୍ୟାନ୍ୟ ଅସମ୍ପର୍କିତ କାର୍ଯ୍ୟକଳାପ ସାମିଲ ଥିଲା।

ହିନ୍ଦୁସ୍ଥାନ ସମାଚାର / ସମନ୍ୱୟ