ଭୁବନେଶ୍ୱର, ୨୪ ସେପ୍ଟେମ୍ବର (ହି.ସ.)। ଗଭୀର ଅବପାତର ପ୍ରଭାବରେ ଗତ ୨୪ ଘଣ୍ଟା ମଧ୍ୟରେ ଓଡ଼ିଶାର ବିଭିନ୍ନ ସ୍ଥାନରେ ବ୍ୟାପକ ଭାବେ ପ୍ରବଳରୁ ଅତି ପ୍ରବଳ ବର୍ଷା ରେକର୍ଡ ହୋଇଛି। କୋରାପୁଟ ଜିଲ୍ଲାର ସିମିଲିଗୁଡ଼ାରେ ସର୍ବାଧିକ ୧୯୩.୯ ମିଲିମିଟର ବର୍ଷା ହୋଇଛି।
ଭୁବନେଶ୍ୱରସ୍ଥିତ ପାଣିପାଗ କେନ୍ଦ୍ର ପକ୍ଷରୁ ଜାରି ବର୍ଷା ତଥ୍ୟ ଅନୁଯାୟୀ, ସକାଳ ୮ଟା ୩୦ ସୁଦ୍ଧା ରାଜ୍ୟର ୭ଟି କେନ୍ଦ୍ରରେ ଅତି ପ୍ରବଳ ବର୍ଷା ହୋଇଥିବା ବେଳେ ୫୮ଟି କେନ୍ଦ୍ରରେ ପ୍ରବଳ ବର୍ଷା ରେକର୍ଡ ହୋଇଛି।
କୋରାପୁଟ ଜିଲ୍ଲାର ସିମିଲିଗୁଡ଼ାରେ ୧୯୩.୯ ମିଲିମିଟର ବର୍ଷା ସହ ରାଜ୍ୟରେ ସର୍ବାଧିକ ବର୍ଷା ରେକର୍ଡ ହୋଇଛି। ଏହା ପରେ ମାଲକାନଗିରି ଜିଲ୍ଲାର ଚିତ୍ରକୋଣ୍ଡାରେ ୧୬୮.୮ ମିଲିମିଟର, ଗଜପତି ଜିଲ୍ଲାର ମହେନ୍ଦ୍ରଗଡ଼ରେ ୧୫୩.୪ ମିଲିମିଟର ଏବଂ ଖୋର୍ଦ୍ଧା ଜିଲ୍ଲାର ଟାଙ୍ଗୀରେ ୧୪୨.୦ ମିଲିମିଟର ବର୍ଷା ହୋଇଛି।
ଅନ୍ୟ କେତେକ ସ୍ଥାନରେ ମଧ୍ୟ ୧୨୦ ମିଲିମିଟରରୁ ଅଧିକ ବର୍ଷା ହୋଇଛି। କନ୍ଧମାଳ ଜିଲ୍ଲାର ଜି. ଉଦୟଗିରିରେ ୧୨୫.୪ ମିଲିମିଟର ଏବଂ ଗଜପତି ଜିଲ୍ଲାର ପାରଳାଖେମୁଣ୍ଡି ଓ ଗୋସାଣୀରେ ଯଥାକ୍ରମେ ୧୨୧.୪ ମିଲିମିଟର ଓ ୧୨୦.୦ ମିଲିମିଟର ବର୍ଷା ରେକର୍ଡ ହୋଇଛି।
ରାଜ୍ୟର ଅନ୍ୟାନ୍ୟ ଅଞ୍ଚଳରେ ମଧ୍ୟ ପ୍ରବଳ ବର୍ଷା ହୋଇଛି। କଟକ ଜିଲ୍ଲାର ବାଙ୍କୀରେ ୧୧୨.୦ ମିଲିମିଟର, କେନ୍ଦୁଝର ଜିଲ୍ଲାର ଘସିପୁରାରେ ୧୧୦.୨ ମିଲିମିଟର, ବାଲେଶ୍ୱର ଜିଲ୍ଲାର ଜଳେଶ୍ୱରରେ ୧୦୭.୨ ମିଲିମିଟର, ମାଲକାନଗିରି ସହରରେ ୧୦୧.୦ ମିଲିମିଟର ଏବଂ ଯାଜପୁର ଜିଲ୍ଲାର ବରୀରେ ୧୦୦.୦ ମିଲିମିଟର ବର୍ଷା ହୋଇଛି।
ଗଞ୍ଜାମ, ମୟୂରଭଞ୍ଜ, ଯାଜପୁର, ନୟାଗଡ଼, କନ୍ଧମାଳ, କୋରାପୁଟ, ଖୋର୍ଦ୍ଧା, କଟକ ଏବଂ ନବରଙ୍ଗପୁର ଜିଲ୍ଲାର ବିଭିନ୍ନ ବର୍ଷାମାପକ କେନ୍ଦ୍ରରେ ମଧ୍ୟ ୬୪ରୁ ୯୯ ମିଲିମିଟର ମଧ୍ୟରେ ପ୍ରବଳ ବର୍ଷା ରେକର୍ଡ ହୋଇଛି। ବିଶେଷକରି ମୟୂରଭଞ୍ଜ, ଗଞ୍ଜାମ ଓ ଯାଜପୁର ଜିଲ୍ଲାର ଏକାଧିକ କେନ୍ଦ୍ରରେ ପ୍ରବଳ ବର୍ଷା ହୋଇଛି।
ପାଣିପାଗ ବିଭାଗର ତଥ୍ୟ ଅନୁଯାୟୀ, ଗଭୀର ଅବପାତର ପ୍ରଭାବରେ ରାଜ୍ୟର ବିଭିନ୍ନ ଅଞ୍ଚଳରେ ବର୍ଷାର ତୀବ୍ରତା ବୃଦ୍ଧି ପାଇଛି। ପାଣିପାଗର ସ୍ଥିତି ଉପରେ ସମ୍ପୃକ୍ତ ବିଭାଗ ଓ ଏଜେନ୍ସିଗୁଡ଼ିକ ପକ୍ଷରୁ ନିରନ୍ତର ନଜର ରଖାଯାଉଛି।
---------------
ହିନ୍ଦୁସ୍ଥାନ ସମାଚାର / ସମନ୍ୱୟ
