ପୁରୀ ସାତପଡା ରାସ୍ତାର ମଙ୍ଗଳାଘାଟ ରାସ୍ତାରେ ଆଣ୍ଠୁଏ ପାଣି

ପୁରୀ,, 25 ସେପ୍ଟେମ୍ବର (ହି.ସ.)ଚାରିଦିନ ଧରି ଲଘୁଚାପଜନିତ ତୁହାକୁ ତୁହା ଲଗାଣ ବର୍ଷାରେ ବେହାଲ ପୁରୀ ସହର । ଗତକାଲି ରାତିରୁ ଅବିଶ୍ରାନ୍ତ ବର୍ଷା ଲାଗି ରହିଥିବାରୁ ଜନଜୀବନ ଅସ୍ତବ୍ୟସ୍ତ । ୪୦ ରୁ ୫୦ କିଲୋମିଟର ବେଗରେ ପବନ ବେଗ ବଢିବା ସହ କୋହଲା ପାଗ ଓ ଝିପି ଝିପି ବର୍ଷା ହେଉଛି । ପୁରୀ ସାତପଡା ରାସ୍ତାର ମଙ୍ଗଳାଘାଟ ବାସେଳୀ ସାହି ଥାନା ନିକଟରେ ବର୍ଷା ପାଣି ଜମି ରହିଥିବା ଦେଖିବାକୁ ମିଳିଛି । ରାସ୍ତାରେ ବଡ ବଡ ଖାଲରେ ପାଣି ଭର୍ତ୍ତି ହୋଇଥିବାରୁ ଯାନବାହନ ଆରୋହୀ ଜାଣି ନପାରି ଦୁର୍ଘଟଣାର ସମ୍ମୁଖୀନ ହେଉଛନ୍ତି । ଏହା ଦେଖି କିଛି ସ୍ଥାନୀୟ ଯୁବକ ଗାତ ଚାରିପଟେ ତ୍ରୀଭୁଜ ଆକୃତି ବାଉଁଶ ବାନ୍ଧି ସେହି ପଟେ ନଯିବା ପାଇଁ ସଙ୍କେତ ଦେଇଛନ୍ତି । ଏହି ରାସ୍ତାଟି ବ୍ଯସ୍ତବହୁଳ ରାସ୍ତା ହୋଇଥିବାରୁ ପର୍ଯ୍ୟଟକଙ୍କ ଗାଡି ଯିବାରେ ବିଳମ୍ବ ହେଉଛି । ସେହି ବାଟଦେଇ ସାତପଡା, ବ୍ରହ୍ମଗିରି, ସୁରାଜମଲ ଶାହାକଲେଜ, ଷ୍ଟର୍ଲିଙ୍ଗ ରାସ୍ତା, ତ୍ରିଦେବ ନଗର, ହରେକୃଷ୍ଣପୁର ବାଇପାସ, ସମଙ୍ଗ ପାର୍କିଙ୍ଗ, ମାର୍କଣ୍ଡେଶ୍ୱର ସାହି ଓ ଗୋଶାଲା ଛକକୁ ସଂଯୋଗ କରିଛି । ଏହା ଜାତୀୟ ରାଜପଥ ୩୧୬ (କ) ହୋଇଥିବା ବେଳେ ରାସ୍ତା ନିର୍ମାଣ ଶୈଳୀ ତ୍ରୁଟିପୂର୍ଣ୍ଣ, ନିମ୍ନ ମାନର ପିଚୁ ଓ ଗୋଡି ବ୍ଯବହାର ଯୋଗୁ ଗର୍ତ୍ତ ସୃଷ୍ଟି ହୋଇଛି । ରାସ୍ତା ନିର୍ମାଣ ବେଳେ ପାଣି ନିଷ୍କାସନ ସୁବିଧା ହୋଇନଥିବାରୁ ପାଣି ଜମି ରହୁଛି । ଅଞ୍ଚଳବାସୀ ବିଭିନ୍ନ ଅଧିକାରୀ ମାନଙ୍କୁ ଅବଗତ କରିଥିଲେ ମଧ୍ଯ କେହି କର୍ଣ୍ଣପାତ କରୁନଥିବା ଅଞ୍ଚଳବାସୀ ଅଭିଯୋଗ କରିଛନ୍ତି । ପୁରୀ ପୌରସଂସ୍ଥା ଏବେ ପୁରୀ ମହାନଗର ନିଗମ ପାଇ ମଧ୍ଯ ପୂର୍ବ ପରି ଅଚଳାବସ୍ଥା ଲାଗି ରହିଥିବାରୁ ଅଞ୍ଚଳବାସୀ କ୍ଷୋଭ ପ୍ରକାଶ କରିଛନ୍ତି । ଏହି ରାସ୍ତା ନିକଟରେ ଗୋପବନ୍ଧୁ ବିଦ୍ଯାନିକେତନ ରହିଥିବାରୁ ଛୋଟ ଛୋଟ ଛାତ୍ରଛାତ୍ରୀ ମାନେ ଯାତାୟାତରେ ନାହିଁନଥିବା ହିନସ୍ତା ହେଉଛନ୍ତି । ବାଇକ ଆରୋହୀ, ଅଟୋ, କାର,ବ୍ଯାଟେରୀ ଜନିତ ଅଟୋ, ବଡବଡ ବସ ଓ ଚାଲିକି ଆସୁଥିବା ଲୋକମାନେ ପାଣି ଭିତରେ ପଶି ଯାଆଆସ କରୁଛନ୍ତି । ଲୋକମାନେ ନାହିଁ ନଥିବାର ଅସୁବିଧାର ସମ୍ମୁଖୀନ ଭୋଗୁଛନ୍ତି । ଜାତୀୟ ରାଜପଥ ଓ ପିଏମସି ଏଥିପ୍ରତି ଦୃଷ୍ଟି ଦେବା ପାଇଁ ଅଞ୍ଚଳବାସୀ ଦାବି କରିଛନ୍ତି ।

---------------

ହିନ୍ଦୁସ୍ଥାନ ସମାଚାର / ବିଜୟ