ଭଦ୍ରକ, ୨୫ ସେପ୍ଟେମ୍ବର (ହି.ସ.) - ଗତକାଲି ଠାରୁ ଆରଂଭ ହୋଇଥିବା ଲଘୁଚାପ ବର୍ଷାରେ ଭଦ୍ରକ ସହରର ଓଟି ମାର୍କେଟ ଓ ପ୍ରସିଦ୍ଧ ଲୋକନାଥ ମନ୍ଦିର ଜଳାର୍ଣ୍ଣବ ହୋଇପଡିଛି। ବିଗତ ବହୁ ଲଗାଣ ବର୍ଷାରେ ସହର ମଝିରେ ଥିବା ଓଟି ମାର୍କେଟ ପ୍ରଭାବିତ ହୋଇ ନ ଥିବା ବେଳେ ଏବେ ପ୍ରଶାସନର ଦୁରଦୃଷ୍ଟିର ଅଭାବରୁ ନିର୍ମାଣ ହେଉଥିବା ଡ୍ରେନେଜ କାର୍ଯ୍ୟ ଯୋଗୁ ବହୁ ବ୍ୟବସାୟୀ ନାହିଁ ନ ଥିବା କ୍ଷତିର ସମ୍ମୁଖୀନ ହୋଇଛନ୍ତି। ବିଶେଷକରି ଲୋକନାଥ ମନ୍ଦିର ଚାରିପାଖରେ ୩/୪ ଫୁଟ ଉଚ୍ଚତାରେ ପାଣି ଜମି ରହୁଥିବା ଅଭିଯୋଗ ହୋଇଛି। ଫଳରେ ମନ୍ଦିରକୁ ଦର୍ଶନ ପାଇଁ ଆସୁଥିବା ଭକ୍ତ, ସ୍ଥାନୀୟ ବାସିନ୍ଦା ଓ ଦୋକାନୀମାନେ ନାନା ପ୍ରକାର ଅସୁବିଧାର ସମ୍ମୁଖୀନ ହେଉଛନ୍ତି। ବର୍ଷା ଦିନେ ମନ୍ଦିର ପରିସରରେ ଜଳ ନିଷ୍କାସନ ସମସ୍ୟା ଏକ ନୂଆ କଥା ନୁହେଁ। ବର୍ଷ ବର୍ଷ ଧରି ଏହି ସମସ୍ୟା ରହିଥିବା ସତ୍ୱେ ଏହାର ସ୍ଥାୟୀ ସମାଧାନ ନହେବାକୁ ନେଇ ଭକ୍ତ ଓ ସ୍ଥାନୀୟ ଲୋକଙ୍କ ମଧ୍ୟରେ ପ୍ରଶ୍ନ ଉଠିଛି। ଅଳ୍ପ ସମୟର ବର୍ଷାରେ ମଧ୍ୟ ଯଦି ଏକ ପ୍ରମୁଖ ଧାର୍ମିକ ପୀଠ ଜଳବନ୍ଦୀ ହୋଇପଡେ, ତେବେ ଅଧିକ ବର୍ଷା ସମୟରେ ପରିସ୍ଥିତି କେତେ ଗମ୍ଭୀର ହେଉଥିବ, ତାହା ସହଜରେ ଅନୁମାନ କରାଯାଇପାରେ। ସ୍ଥାନୀୟ ଲୋକଙ୍କ କହିବା ଅନୁସାରେ, ବର୍ଷା ହେବା ପରେ ମନ୍ଦିର ଆଖପାଖ ଅଂଚଳରୁ ବର୍ଷାଜଳ ସଠିକ୍ ଭାବେ ନିଷ୍କାସିତ ହୋଇପାରୁନାହିଁ। ଫଳରେ ପାଣି ମନ୍ଦିର ପରିସରକୁ ପ୍ରବେଶ କରି ଦୀର୍ଘ ସମୟ ଧରି ଜମି ରହୁଛି। କେତେକ ସମୟରେ ଏହି ଜଳ ସହ ନର୍ଦ୍ଦମା ପାଣି ମିଶିଯାଉଥିବାରୁ ପରିବେଶ ମଧ୍ୟ ଅସ୍ୱାସ୍ଥ୍ୟକର ହୋଇପଡୁଛି। ମନ୍ଦିରକୁ ଦର୍ଶନ ପାଇଁ ଆସୁଥିବା ବୟସ୍କ ଲୋକ, ମହିଳା, ଶିଶୁ ଓ ଦୂରଦୂରାନ୍ତରୁ ଆସୁଥିବା ଭକ୍ତମାନେ ଏଭଳି ଜଳବନ୍ଦୀ କାରଣରୁ ବିଶେଷ ଭାବେ ହଇରାଣ ହେଉଛନ୍ତି। ପାଣି ଭିତରେ ଚାଲି ମନ୍ଦିରକୁ ପ୍ରବେଶ କରିବାକୁ ପଡୁଥିବାରୁ ଭକ୍ତମାନଙ୍କ ମଧ୍ୟରେ ଅସନ୍ତୋଷ ଦେଖାଦେଉଛି। ପମ୍ପ ଲଗାଇ ପାଣି ବାହାର କରିବା କେତେଦିନ ବର୍ଷା ପରେ ମନ୍ଦିର ପରିସରରେ ଜମିଥିବା ପାଣିକୁ ପମ୍ପ ଲଗାଇ ବାହାର କରାଯାଉଥିବା କୁହାଯାଉଛି। ପାଣି ନିଷ୍କାସନ ପାଇଁ ଯନ୍ତ୍ର ଲଗାଇ ତୁରନ୍ତ ପାଣି ବାହାର କରିବା ଦ୍ୱାରା ସାମୟିକ ଭାବେ ସମସ୍ୟାରୁ ମୁକ୍ତି ମିଳୁଥିଲେ ମଧ୍ୟ ପରବର୍ତୀ ବର୍ଷାରେ ପୁଣି ସମାନ ସମସ୍ୟା ଦେଖାଦେଉଛି। ତେଣୁ କେବଳ ପମ୍ପ ଲଗାଇ ପାଣି ବାହାର କରିବା ନୁହେଁ, ମନ୍ଦିରର ଜଳବନ୍ଦୀ ସମସ୍ୟାର ମୂଳ କାରଣ ଖୋଜି ଏହାର ସ୍ଥାୟୀ ସମାଧାନ କରିବା ଆବଶ୍ୟକ ବୋଲି ଦାବି ହେଉଛି। ମନ୍ଦିର ପରିସରର ଉଚ୍ଚତା, ନିକଟସ୍ଥ ନାଳାର ଅବସ୍ଥା, ଡ୍ରେନର କ୍ଷମତା, ବର୍ଷାଜଳର ପ୍ରବାହ ଓ ନିଷ୍କାସନ ରାସ୍ତା ଆଦିର ବୈଜ୍ଞାନିକ ଅଧ୍ୟୟନ କରାଯାଇ ଏକ ସ୍ଥାୟୀ ଡ୍ରେନେଜ୍ ଯୋଜନା ପ୍ରସ୍ତୁତ କରାଯିବା ଆବଶ୍ୟକ ବୋଲି ମତ ପ୍ରକାଶ ପାଇଛି। ସମ୍ପୃକ୍ତ ବିଭାଗର ଅଭିଜ୍ଞ ଇଞ୍ଜିନିୟରମାନେ ମନ୍ଦିର ପରିସର ଓ ଏହାର ଚାରିପାଖ ଅଞ୍ଚଳର ସ୍ଥିତି ଅନୁଧ୍ୟାନ କରି ଏକ ସମନ୍ୱିତ ଜଳ ନିଷ୍କାସନ ବ୍ୟବସ୍ଥାର ନକ୍ସା ପ୍ରସ୍ତୁତ କଲେ ଭବିଷ୍ୟତରେ ଏହି ସମସ୍ୟାରୁ ମୁକ୍ତି ମିଳିପାରିବ ବୋଲି ସ୍ଥାନୀୟ ଲୋକେ ଆଶା ପ୍ରକାଶ କରିଛନ୍ତି। ଲୋକନାଥ ମନ୍ଦିର ଭଳି ଏକ ପ୍ରମୁଖ ଧାର୍ମିକ ପୀଠକୁ ପ୍ରତିଦିନ ବହୁ ସଂଖ୍ୟାରେ ଭକ୍ତ ଆସୁଥିବା ବେଳେ ଏଠାରେ ବର୍ଷାଜଳ ନିଷ୍କାସନ ସମସ୍ୟା ରହିବା ଭକ୍ତମାନଙ୍କ ପାଇଁ ଚିନ୍ତାର ବିଷୟ ହୋଇଛି। ମନ୍ଦିରର ପବିତ୍ରତା, ପରିବେଶ ଓ ଭକ୍ତଙ୍କ ସୁବିଧାକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ, ଉପଜିଲ୍ଲାପାଳ ଓ ସମ୍ପୃକ୍ତ ବିଭାଗ ତୁରନ୍ତ ଏହି ସମସ୍ୟାର ସମୀକ୍ଷା କରିବାକୁ ଦାବି ହୋଇଛି। ବର୍ଷା ଋତୁ ଆସିଲେ ପାଣି ଜମିବା ଓ ପରେ ପମ୍ପ ଲଗାଇ ପାଣି ବାହାର କରିବାର ଚକ୍ର ଯେପରି ଚାଲି ନରହେ, ସେଥିପାଇଁ ଦୀର୍ଘମିଆଦୀ ଯୋଜନା ଆବଶ୍ୟକ। ମନ୍ଦିର ପରିସରରେ ପାଣି ଜମିବ ନାହିଁ ଏବଂ ଭକ୍ତମାନେ ବର୍ଷା ଦିନରେ ମଧ୍ୟ ସୁବିଧାରେ ଦର୍ଶନ କରିପାରିବେ ଏହା ହିଁ ଏବେ ସ୍ଥାନୀୟ ଲୋକ ଓ ଭକ୍ତମାନଙ୍କର ପ୍ରମୁଖ ଦାବି। ଏହି ସମସ୍ୟା ନେଇ ପ୍ରଶାସନ କେବଳ ତାତ୍କାଳିକ ପଦକ୍ଷେପ ନେଇ ନ ରହି, ସ୍ଥାୟୀ ଜଳ ନିଷ୍କାସନ ବ୍ୟବସ୍ଥା ପାଇଁ ଠୋସ୍ ପଦକ୍ଷେପ ନେବା ଆବଶ୍ୟକ। ତେବେ ହିଁ ଲୋକନାଥ ମନ୍ଦିରକୁ ଆସୁଥିବା ହଜାର ହଜାର ଭକ୍ତଙ୍କ ଦୁର୍ଦ୍ଦଶା ଦୂର ହେବା ସହ ମନ୍ଦିର ପରିସରର ପରିବେଶ ମଧ୍ୟ ସ୍ୱଚ୍ଛ ଓ ସୁସ୍ଥ ରହିପାରିବ।ହିନ୍ଦୁସ୍ଥାନ ସମାଚାର / ପ୍ରମୋଦ

ହିନ୍ଦୁସ୍ଥାନ ସମାଚାର / ପ୍ରମୋଦ କୁମାର ରାୟ