ନୂଆଦିଲ୍ଲୀ, ୨୬ ସେପ୍ଟେମ୍ବର (ହି.ସ.)। ବୈଜ୍ଞାନିକ ତଥ୍ୟ ଓ ଜ୍ଞାନକୁ ଦେଶର ଅଧିକରୁ ଅଧିକ ଲୋକଙ୍କ ନିକଟରେ ସେମାନଙ୍କ ନିଜ ଭାଷାରେ ପହଞ୍ଚାଇବା ଦିଗରେ ବୈଜ୍ଞାନିକ ଓ ଔଦ୍ୟୋଗିକ ଗବେଷଣା ପରିଷଦ (ସିଏସଆଇଆର) ଏକ ବଡ଼ ପଦକ୍ଷେପ ନେଇଛି। ସିଏସଆଇଆରର ୮୫ତମ ପ୍ରତିଷ୍ଠା ଦିବସ ଅବସରରେ କେନ୍ଦ୍ର ବିଜ୍ଞାନ ଓ ପ୍ରଯୁକ୍ତି ରାଷ୍ଟ୍ରମନ୍ତ୍ରୀ (ସ୍ୱାଧୀନ ଦାୟିତ୍ୱ) ଡ. ଜିତେନ୍ଦ୍ର ସିଂହ ପାଞ୍ଚଟି ଭାରତୀୟ ଭାଷାରେ ନୂଆ ଲୋକପ୍ରିୟ ବିଜ୍ଞାନ ପତ୍ରିକାର ଶୁଭାରମ୍ଭ କରିଛନ୍ତି।
ସିଏସଆଇଆରର ଜାତୀୟ ବିଜ୍ଞାନ ଯୋଗାଯୋଗ ଓ ନୀତି ଗବେଷଣା ପ୍ରତିଷ୍ଠାନ (ସିଏସଆଇଆର-ନିସ୍ପର) ପକ୍ଷରୁ ଆରମ୍ଭ କରାଯାଇଥିବା ଏହି ପତ୍ରିକାଗୁଡ଼ିକ ତାମିଲ, ତେଲୁଗୁ, ମରାଠୀ, ବଙ୍ଗଳା ଓ ଆସାମିଆ ଭାଷାରେ ପ୍ରକାଶ ପାଇବ। ଏଥିରେ ଆସାମୀ ଭାଷାର ‘ବିଜ୍ଞାନ ଲହର’, ବଙ୍ଗଳାର ‘ବିଜ୍ଞାନ ବୃତ୍ତାନ୍ତ’, ମରାଠୀର ‘ବିଜ୍ଞାନ କ୍ଷିତିଜ’, ତାମିଲର ‘ଅରିଭିୟାଲ ଅରିକ୍କୈୟାଲର’ ଏବଂ ତେଲୁଗୁର ‘ବିଜ୍ଞାନ ବେଲୁଗୁ’ ସାମିଲ ରହିଛି।
ଏହି ପଦକ୍ଷେପ ସିଏସଆଇଆର-ନିସ୍ପରର ଦୀର୍ଘଦିନର ବିଜ୍ଞାନ ଯୋଗାଯୋଗ ପରମ୍ପରାର ଏକ ବିସ୍ତାର। ପ୍ରତିଷ୍ଠାନର ପ୍ରମୁଖ ବିଜ୍ଞାନ ପତ୍ରିକାଗୁଡ଼ିକ ମଧ୍ୟରେ ଇଂରାଜୀର ‘ସାଇନ୍ସ ରିପୋର୍ଟର’, ହିନ୍ଦୀର ‘ବିଜ୍ଞାନ ପ୍ରଗତି’ ଏବଂ ଉର୍ଦ୍ଦୁର ‘ସାଇନ୍ସ କି ଦୁନିଆ’ ରହିଛି।
ଏହି ପତ୍ରିକାଗୁଡ଼ିକର ବିଶେଷତ୍ୱ ହେଉଛି, ଏଥିରେ କୃତ୍ରିମ ବୁଦ୍ଧିମତ୍ତା (ଏଆଇ) ଭଳି ଆଧୁନିକ ପ୍ରଯୁକ୍ତିର ମଧ୍ୟ ବ୍ୟବହାର କରାଯିବ। ସିଏସଆଇଆର-ନିସ୍ପରର ବର୍ତ୍ତମାନର ବିଜ୍ଞାନ ପତ୍ରିକାଗୁଡ଼ିକର ଚୟନିତ ବିଷୟବସ୍ତୁକୁ ଏଆଇ ସହାୟତାରେ ବିଭିନ୍ନ ଭାରତୀୟ ଭାଷାରେ ଅନୁବାଦ କରାଯିବ। ଏହା ପରେ ବୈଜ୍ଞାନିକ ତଥ୍ୟର ସଠିକତା ଓ ଭାଷାର ଗୁଣବତ୍ତା ବଜାୟ ରଖିବା ପାଇଁ ମାନବ ବିଶେଷଜ୍ଞମାନେ ଏହାର ସମୀକ୍ଷା, ପ୍ରୁଫ୍ରିଡିଂ, ତଥ୍ୟ ଯାଞ୍ଚ ଏବଂ ସମ୍ପାଦନା କରିବେ।
ଅନୁବାଦିତ ବିଷୟବସ୍ତୁ ସହିତ ସମ୍ପୃକ୍ତ ଭାରତୀୟ ଭାଷାଗୁଡ଼ିକରେ ମୌଳିକ ଲେଖା ମଧ୍ୟ ପତ୍ରିକାଗୁଡ଼ିକରେ ପ୍ରକାଶ ପାଇବ। ଏହାଦ୍ୱାରା ଆଞ୍ଚଳିକ ଭାଷାରେ ବିଜ୍ଞାନ ଲେଖନକୁ ପ୍ରୋତ୍ସାହନ ମିଳିବା ସହ ବିଭିନ୍ନ ଅଞ୍ଚଳର ବୈଜ୍ଞାନିକ ଉପଲବ୍ଧି, ନବସୃଜନ ଓ ପ୍ରଯୁକ୍ତିଗତ ବିକାଶ ସମ୍ପର୍କରେ ମଧ୍ୟ ଲୋକଙ୍କୁ ଅବଗତ କରାଯାଇପାରିବ।
କାର୍ଯ୍ୟକ୍ରମରେ ସିଏସଆଇଆର ମହାନିର୍ଦ୍ଦେଶିକା ତଥା ଡିଏସଆଇଆର ସଚିବ ଡ. ଏନ୍. କଳାଇସେଲଭୀ, ସିଏସଆଇଆର-ନିସ୍ପର ନିର୍ଦ୍ଦେଶିକା ଡ. ଗୀତା ବାଣୀ ରାୟସମଙ୍କ ସମେତ ବିଭିନ୍ନ ପତ୍ରିକାର ସମ୍ପାଦକ ଓ ସମ୍ପାଦକୀୟ ଦଳର ସଦସ୍ୟମାନେ ଉପସ୍ଥିତ ଥିଲେ।
ହିନ୍ଦୁସ୍ଥାନ ସମାଚାର / ସମନ୍ୱୟ
