ଜୟପୁର, ୩ ସେପ୍ଟେମ୍ବର (ହି.ସ.)- ଜୟପୁର ବିକ୍ରମ ଦେବ ବିଶ୍ୱବିଦ୍ୟାଳୟ, ଜୟପୁରରେ ସାପ୍ତାହିକ ଏକାଡେମିକ ଅଧ୍ୟାପକ ଡେଭେଲପମେଣ୍ଟ ପ୍ରୋଗ୍ରାମ ଅନ୍ତର୍ଗତ ଚତୁର୍ଥ ଅଧ୍ୟାପକ ଡେଭେଲପମେଣ୍ଟ ପ୍ରୋଗ୍ରାମ ଆଜି ଅନୁଷ୍ଠିତ ହୋଇଯାଇଛି। କୁଳପତିଙ୍କ ନିଷ୍ପତ୍ତି ଅନୁଯାୟୀ ଆୟୋଜିତ ଏହି କାର୍ଯ୍ୟକ୍ରମ ବିଶ୍ୱବିଦ୍ୟାଳୟର ଏଲ-୨ କକ୍ଷରେ ଅନୁଷ୍ଠିତ ହୋଇଥିଲା। ଏହି ଅଧିବେଶନରେ ବିଶେଷଜ୍ଞ ଆଲୋଚନା କରାଯାଇଥିଲା। ବିକ୍ରମ ଦେବ ବିଶ୍ୱବିଦ୍ୟାଳୟର ପ୍ରାଣୀବିଜ୍ଞାନ ବିଭାଗର ଡ. ଉଦୟ କୁମାର ଦାସ ଏହି ବିଷୟରେ ବିସ୍ତୃତ ଓ ସଚେତନତାମୂଳକ ବକ୍ତବ୍ୟ ପ୍ରଦାନ କରିଥିଲେ। ତାଙ୍କ ଆଲୋଚନାରେ ବଜ୍ରପାତ ଓ ଘଡ଼ଘଡ଼ି ସହିତ ଝଡ଼ର କାରଣ, ଏହାର ପ୍ରଭାବ, ବିପଦ ସମୟରେ ଅବଲମ୍ବନ କରିବାକୁ ଥିବା ସୁରକ୍ଷାମୂଳକ ପଦକ୍ଷେପ ଏବଂ ବିପର୍ଯ୍ୟୟ ପରିଚାଳନା ସମ୍ପର୍କରେ ଉପଯୋଗୀ ତଥ୍ୟ ପ୍ରଦାନ କରାଯାଇଥିଲା। ବଜ୍ରପାତ ସମୟରେ ସଚେତନତା ଓ ଠିକ୍ ପଦକ୍ଷେପ ଗ୍ରହଣ ଦ୍ୱାରା ମାନବଜୀବନ ଓ ସମ୍ପତ୍ତିର କ୍ଷୟକ୍ଷତିକୁ ଅନେକାଂଶରେ ରୋକାଯାଇପାରିବ ବୋଲି ବକ୍ତା ଗୁରୁତ୍ୱାରୋପ କରିଥିଲେ।
ବିଶ୍ୱବିଦ୍ୟାଳୟର ବିଭିନ୍ନ ବିଭାଗର ଶିକ୍ଷକ-ଶିକ୍ଷୟିତ୍ରୀମାନେ ଏହି ଅଧ୍ୟାପକ ଡେଭେଲପମେଣ୍ଟ ପ୍ରୋଗ୍ରାମରେ ଯୋଗଦେଇ ବିଷୟଭିତ୍ତିକ ଆଲୋଚନାରୁ ଉପକୃତ ହୋଇଥିଲେ। ଏପରି କାର୍ଯ୍ୟକ୍ରମ ଶିକ୍ଷକମାନଙ୍କର ଜ୍ଞାନବୃଦ୍ଧି ସହିତ ସାମାଜିକ ସଚେତନତା ଓ ବିପର୍ଯ୍ୟୟ ପରିଚାଳନା ସମ୍ପର୍କରେ ଦାୟିତ୍ୱବୋଧ ବୃଦ୍ଧି କରିବାରେ ସହାୟକ ହେବ।
ହିନ୍ଦୁସ୍ଥାନ ସମାଚାର / ପିକେପି
