ଭୁବନେଶ୍ୱର, ୭ ସେପ୍ଟେମ୍ବର (ହି.ସ.)। ଓଡ଼ିଶାରେ ଚଳିତ ଖରିଫ

ଋତୁରେ ସରକାରୀ ସ୍ତରରେ ଧାନ ବିକ୍ରି କରିବା ପାଇଁ ରେକର୍ଡ ସଂଖ୍ୟକ ୨୧,୪୨,୭୨୩ ଜଣ ଚାଷୀ ପଞ୍ଜୀକରଣ କରିଛନ୍ତି। ସମବାୟ ମନ୍ତ୍ରୀ

ପ୍ରଦୀପ ବଳ ସାମନ୍ତ ସୋମବାର ଏହି ସୂଚନା ଦେଇଛନ୍ତି।

ମନ୍ତ୍ରୀ ସ୍ପଷ୍ଟ କରିଛନ୍ତି

ଯେ, ଧାନ ବିକ୍ରି ପାଇଁ ଚାଷୀଙ୍କ ପଞ୍ଜୀକରଣର ସମୟସୀମା

ଆଉ ବଢ଼ାଯିବ ନାହିଁ। ଚାଷୀଙ୍କ ସ୍ୱାର୍ଥକୁ ଦୃଷ୍ଟିରେ ରଖି ସରକାର ପୂର୍ବରୁ ପଞ୍ଜୀକରଣ ପାଇଁ

ଅତିରିକ୍ତ ୭ ଦିନ ସମୟ ଦେଇଥିଲେ।

ସେ କହିଛନ୍ତି ଯେ, ଯେଉଁ ଚାଷୀମାନେ ଏପର୍ଯ୍ୟନ୍ତ ପଞ୍ଜୀକରଣ

ସମ୍ପୂର୍ଣ୍ଣ କରିନାହାନ୍ତି, ସେମାନେ ସୋମବାର ରାତି ୧୧ଟା ପର୍ଯ୍ୟନ୍ତ

ଏହି ପ୍ରକ୍ରିୟା ପୂରା କରିପାରିବେ। ଏହାପରେ ପଞ୍ଜୀକରଣର ସମୟସୀମା ସ୍ଥାୟୀ ଭାବେ ଶେଷ ହୋଇଯିବ।

ସାମନ୍ତ କହିଛନ୍ତି ଯେ, ଗତବର୍ଷ ଧାନ ବିକ୍ରି ପାଇଁ ପ୍ରାୟ ୧୯.୬୭ ଲକ୍ଷ ଚାଷୀ

ପଞ୍ଜୀକରଣ କରିଥିଲେ। ଚଳିତ ବର୍ଷ ଏହି ସଂଖ୍ୟା ୨୧ ଲକ୍ଷ ଅତିକ୍ରମ କରିଛି, ଯାହା ରାଜ୍ୟରେ ଏପର୍ଯ୍ୟନ୍ତର ସର୍ବାଧିକ ପଞ୍ଜୀକରଣ।

ସେ କହିଛନ୍ତି ଯେ, ରାଜ୍ୟ ସରକାର ଚାଷୀଙ୍କ ସ୍ୱାର୍ଥରେ ନିରନ୍ତର

କାର୍ଯ୍ୟ କରୁଛନ୍ତି। ଏଥିସହ ପଞ୍ଜୀକରଣ ପ୍ରସଙ୍ଗରେ ବିରୋଧୀ ଦଳ ପକ୍ଷରୁ ଆନ୍ଦୋଳନର ଚେତାବନୀ

ଦିଆଯାଇଥିବା ନେଇ ମଧ୍ୟ ମନ୍ତ୍ରୀ ପ୍ରଶ୍ନ ଉଠାଇଛନ୍ତି।ସମବାୟ ମନ୍ତ୍ରୀ କହିଛନ୍ତି ଯେ, ରାଜ୍ୟରେ ସାରର ଉପଲବ୍ଧତା ଓ ବଣ୍ଟନ ବ୍ୟବସ୍ଥା ଉପରେ ସରକାର ନିରନ୍ତର ନଜର ରଖିଛନ୍ତି।

ସେ କହିଛନ୍ତି ଯେ, ବର୍ତ୍ତମାନ ଓଡ଼ିଶାରେ ପ୍ରାୟ ୨୪,୪୦୦ ଟନ୍ ସାର ମହଜୁଦ ରହିଛି। ସାର ବଣ୍ଟନରେ ଅବହେଳା କରୁଥିବା ଡିଲରମାନଙ୍କ ବିରୋଧରେ

କଡ଼ା କାର୍ଯ୍ୟାନୁଷ୍ଠାନ ନିଆଯାଉଛି।

ଉଲ୍ଲଂଘନର ଗମ୍ଭୀରତା

ଅନୁଯାୟୀ ସମ୍ପୃକ୍ତ ଡିଲରମାନଙ୍କ ଲାଇସେନ୍ସ ନିଲମ୍ବନଠାରୁ ଆରମ୍ଭ କରି ରଦ୍ଦ କରିବା ପର୍ଯ୍ୟନ୍ତ

କାର୍ଯ୍ୟାନୁଷ୍ଠାନ ନିଆଯାଇପାରେ।

---------------

ହିନ୍ଦୁସ୍ଥାନ ସମାଚାର / ସ୍ୱାଗତିକା