ଭୁବନେଶ୍ୱର 2 ଏପ୍ରିଲ୍ (ହି.ସ.)
କେନ୍ଦ୍ର ସରକାରଙ୍କ ଦ୍ବାରା ପୁରୁଣା ପେନସନ ବ୍ୟବସ୍ଥା ବଦଳରେ ୟୁପିଏସ ଲାଗୁ କରିବା ଏବଂ ୨୯ ଟି ଶ୍ରମ ଆଇନ ବଦଳରେ ଶ୍ରମିକ ସ୍ବାର୍ଥ ବିରୋଧୀ ୪ ଟି ଶ୍ରମ କୋଡ ଲାଗୁ କରିବା, ଶ୍ରମିକ ଛଟେଇ କରିବା, ସରକାରୀ ଉଦ୍ୟୋଗରୁ ପୁଞ୍ଜି ପ୍ରତ୍ୟାହାର ଆଦି ବିଭିନ୍ନ ଶ୍ରମିକମାରଣ ନୀତି ବିରୁଦ୍ଧରେ କେନ୍ଦ୍ରୀୟ ଶ୍ରମିକ ସଂଗଠନ ଏଆଇୟୁଟିୟୁସି ସର୍ବ ଭାରତୀୟ କମିଟିର ଆହ୍ବାନକ୍ରମେ ସାରା ଭାରତ ଦାବି ଦିବସ ପରିପ୍ରେକ୍ଷୀରେ ସଂଗଠନର ଭୁବନେଶ୍ୱର ଜିଲ୍ଲା କମିଟି ପକ୍ଷରୁ ଏକ ବିକ୍ଷୋଭ ଭୁବନେଶ୍ୱରସ୍ଥିତ ମାଷ୍ଟରକ୍ୟାଣ୍ଟିନ ଛକ ଠାରେ ଅନୁଷ୍ଠିତ ହୋଇଯାଇଅଛି। ଏଆଇୟୁଟିୟୁସି ଭୁବନେଶ୍ୱର ଜିଲ୍ଲା କମିଟିର ସଂପାଦକ ନିରଞ୍ଜନ ମହାନ୍ତିଙ୍କ ଅଧ୍ୟକ୍ଷତାରେ ଅନୁଷ୍ଠିତ ବିକ୍ଷୋଭ ସଭାରେ ସଂଗଠନର ରାଜ୍ୟ ସଂପାଦକ ଜୟସେନ ମେହେର ମୁଖ୍ୟବକ୍ତା ଭାବେ ଯୋଗଦେଇ କେନ୍ଦ୍ର ସରକାର ଗୋଟିଏ ପରେ ଗୋଟିଏ ଶ୍ରମିକ ସ୍ବାର୍ଥ ବିରୋଧୀ ନୀତି କାର୍ଯ୍ୟକାରୀ କରିବା ଫଳରେ ଶ୍ରମିକ ତଥା ସର୍ବ ସ୍ତରର ମେହନତୀ ଜନସାଧାରଣଙ୍କ ଜୀବନ ଆଜି ଦୁର୍ବୀସହ ବୋଲି ଉଲ୍ଲେଖ କରିବା ସହିତ ଖଟିଖିଆ ମେହନତୀ ଶ୍ରମିକ ଏହା ବିରୁଦ୍ଧରେ ଆନ୍ଦୋଳନକୁ ଦୁର୍ବାର କରିବା ପାଇଁ ସେ ଆହ୍ୱାନ ଦେଇଥିଲେ। ପ୍ରଧାନ ମନ୍ତ୍ରୀଙ୍କ ଉଦ୍ଦେଶ୍ଯରେ ଏକ ସ୍ମାରକପତ୍ର ଓଡ଼ିଶାର ରାଜ୍ୟପାଳଙ୍କୁ ପ୍ରଦାନ କରାଯାଇଛି।
ଏହି ବିକ୍ଷୋଭ କାର୍ଯ୍ୟକ୍ରମକୁ ଶ୍ରମିକ ନେତା ଅଶୋକ ସାହୁ, ବୁଗୁରୁ ତ୍ରିନାଥ, ପଦ୍ମ ଚରଣ ମଲ୍ଲିକ, ଜୀତେନ୍ଦ୍ର ବେହେରା, ନିଳେନ୍ଦ୍ର କାନ୍ତି ଆଚାର୍ଯ୍ୟ, ବିପ୍ଳବ କୁମାର ଜେନା ପ୍ରମୁଖ ପରିଚାଳନା କରିଥିଲେ ଓ ଏହି ବିକ୍ଷୋଭରେ ସଂଗଠିତ ତଥା ଅସଂଗଠିତ କ୍ଷେତ୍ରରେ କାର୍ଯ୍ୟ କରୁଥିବା ବିଭିନ୍ନ ବର୍ଗର ଶତାଧିକ ଶ୍ରମିକ ଅଂଶଗ୍ରହଣ କରିଥିଲେ।
---------------
ହିନ୍ଦୁସ୍ଥାନ ସମାଚାର / ରଶ୍ମିତା