ଜୟପୁର, ୨୦ ଅକ୍ଟୋବର (ହି.ସ.)- ଜୟପୁରକୁ ପ୍ରସ୍ତାବିତ ନବରଙ୍ଗପୁର ଡାକ ବିଭାଗ ଅଧୀନକୁ ସ୍ଥାନାନ୍ତର କରିବା ପ୍ରସ୍ତାବକୁ ବିରୋଧ କଲେ କୋରାପୁଟ ସାଂସଦ ସପ୍ତଗିରି ଶଙ୍କର ଉଲାକା । ଏନେଇ ସାଂସଦ ଶ୍ରୀ ଉଲାକା କେନ୍ଦ୍ର ସରକାରଙ୍କୁ ଚିଠି ଲେଖିଛନ୍ତି ।

କୋରାପୁଟ ସାଂସଦ ସପ୍ତଗିରି ଶଙ୍କର ଉଲାକା, ଜୟପୁର ସହରକୁ ନୂତନ ଭାବେ ପ୍ରସ୍ତାବିତ 'ନବରଙ୍ଗପୁର ଡାକ ବିଭାଗ' ଅଧୀନକୁ ଆଣିବା ପ୍ରସ୍ତାବକୁ ବିରୋଧ କରିଛନ୍ତି। ସେ କେନ୍ଦ୍ର ଯୋଗାଯୋଗ ମନ୍ତ୍ରୀ ଜ୍ୟୋତିରାଦିତ୍ୟ ଏମ୍. ସିନ୍ଧିଆଙ୍କୁ ଏଥିରେ ହସ୍ତକ୍ଷେପ କରିବାକୁ ଅନୁରୋଧ କରିବା ସହ ଜୟପୁରକୁ ବର୍ତ୍ତମାନର 'କୋରାପୁଟ ଡାକ ବିଭାଗ' ଅଧୀନରେ ହିଁ ରଖିବାକୁ ଦାବି କରିଛନ୍ତି। ଅକ୍ଟୋବର ୧୯ ତାରିଖରେ କେନ୍ଦ୍ର ମନ୍ତ୍ରୀଙ୍କୁ ଲେଖିଥିବା ଏକ ଚିଠିରେ, ଶ୍ରୀ ଉଲାକା ପ୍ରଶାସନିକ ଦକ୍ଷତା ଏବଂ ଡାକ ସେବାର ଉନ୍ନତି ପାଇଁ ଏକ ସ୍ୱତନ୍ତ୍ର 'ନବରଙ୍ଗପୁର ଡାକ ବିଭାଗ' ଗଠନକୁ ସମର୍ଥନ କରିଛନ୍ତି। ତେବେ, ଜୟପୁରକୁ କୋରାପୁଟ ଡାକ ବିଭାଗରୁ ଅନ୍ୟତ୍ର ସ୍ଥାନାନ୍ତର କରିବା ନେଇ ରହିଥିବା ପ୍ରସ୍ତାବ ଉପରେ ସେ ଚିନ୍ତା ବ୍ୟକ୍ତ କରିଛନ୍ତି। କୋରାପୁଟ ଓ କଳାହାଣ୍ଡି ଡାକ ବିଭାଗର ପୁନର୍ଗଠନ ପାଇଁ ଓଡ଼ିଶା ସର୍କଲର 'ଚିଫ୍ ପୋଷ୍ଟମାଷ୍ଟର ଜେନେରାଲ୍'ଙ୍କ ଦ୍ୱାରା ସେପ୍ଟେମ୍ବର ୧୪, ୨୦୨୬ରେ ଦାଖଲ କରାଯାଇଥିବା ଏକ ପ୍ରସ୍ତାବର ଉଲ୍ଲେଖ କରି ସାଂସଦ କହିଛନ୍ତି ଯେ, ଯଦି କୋରାପୁଟ ଜିଲ୍ଲାର ଅନ୍ୟ ଅଂଶଗୁଡ଼ିକୁ ବର୍ତ୍ତମାନର ଡାକ ବିଭାଗ ଅଧୀନରେ ରଖି କେବଳ ଜୟପୁରକୁ ନବରଙ୍ଗପୁର ଡାକ ବିଭାଗକୁ ସ୍ଥାନାନ୍ତର କରାଯାଏ, ତେବେ ଏହା ଜିଲ୍ଲାର ଡାକ ପ୍ରଶାସନିକ କ୍ଷେତ୍ରକୁ ଖଣ୍ଡବିଖଣ୍ଡିତ କରିଦେବ।

ଶ୍ରୀ ଉଲାକା କହିଛନ୍ତି ଯେ, ଜୟପୁର ହେଉଛି କୋରାପୁଟ ଜିଲ୍ଲାର ଏକ ପ୍ରମୁଖ ପ୍ରଶାସନିକ, ବାଣିଜ୍ୟିକ ଏବଂ ଶିକ୍ଷାଗତ କେନ୍ଦ୍ର। କୋରାପୁଟ ସହିତ ଏହାର ଦୀର୍ଘଦିନର ଐତିହାସିକ ଓ ସଂସ୍ଥାଗତ ସମ୍ପର୍କ ରହିଛି। ସେ ଚେତାବନୀ ଦେଇଛନ୍ତି ଯେ, ଏହି ପ୍ରସ୍ତାବିତ ପରିବର୍ତ୍ତନ ଦ୍ୱାରା ପ୍ରଶାସନିକ ଜଟିଳତା ସୃଷ୍ଟି ହୋଇପାରେ ଏବଂ ସାଧାରଣ ଜନତା ଅସୁବିଧାର ସମ୍ମୁଖୀନ ହୋଇପାରନ୍ତି ବୋଲି ଚିଠିରେ ଉଲ୍ଲେଖ ରହିଛି ।

ଏହି ସ୍ଥାନାନ୍ତର ପ୍ରସ୍ତାବ ପଛର ଯୁକ୍ତିଯୁକ୍ତତା ଉପରେ ପ୍ରଶ୍ନ ଉଠାଇ ନୂତନ ନବରଙ୍ଗପୁର ଡାକ ବିଭାଗ ଗଠନ ପ୍ରକ୍ରିୟା ଜାରି ରଖିବା ସହିତ, ଜୟପୁର ସହରକୁ କୋରାପୁଟ ଡାକ ବିଭାଗ ଅଧୀନରେ ରଖିବା ପାଇଁ ପ୍ରସ୍ତାବରେ ସଂଶୋଧନ କରିବାକୁ ଡାକ ବିଭାଗକୁ ନିର୍ଦ୍ଦେଶ ଦେବା ନିମନ୍ତେ କୋରାପୁଟ ସାଂସଦ ଦାବି କରିଛନ୍ତି l ଏହି ପ୍ରସ୍ତାବକୁ ଚୂଡ଼ାନ୍ତ ଅନୁମୋଦନ ମିଳିବା ପୂର୍ବରୁ ଏଥିରେ ହସ୍ତକ୍ଷେପ କରିବାକୁ ସାଂସଦ ମନ୍ତ୍ରୀଙ୍କୁ ଅନୁରୋଧ କରିଛନ୍ତି।

ହିନ୍ଦୁସ୍ଥାନ ସମାଚାର / ପିକେପି