ନୂଆଦିଲ୍ଲୀ, ୪ ଅକ୍ଟୋବର (ହି.ସ) କେନ୍ଦ୍ରୀୟ ପରିବେଶ, ବନ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ଭୂପେନ୍ଦ୍ର ଯାଦବ ରବିବାର ରାଜସ୍ଥାନର ଜୈସଲମେରସ୍ଥିତ ଡେଜର୍ଟ ନ୍ୟାସନାଲ ପାର୍କର ସମ ଅଞ୍ଚଳରେ ଗ୍ରେଟ୍ ଇଣ୍ଡିଆନ୍ ବଷ୍ଟାର୍ଡ ଅର୍ଥାତ୍ ଗୋଡାବଣର ଦୁଇଟି ପୁରୁଷ ପକ୍ଷୀକୁ ଜଙ୍ଗଲରେ ଛାଡ଼ିଛନ୍ତି। ଏହି ଅବସରରେ ରାଜସ୍ଥାନର ବନ ଓ ପରିବେଶ ରାଜ୍ୟମନ୍ତ୍ରୀ ସଞ୍ଜୟ ଶର୍ମାଙ୍କ ସମେତ କେନ୍ଦ୍ର ଓ ରାଜ୍ୟ ସରକାରଙ୍କ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ। ଗୋଡାବଣ ରାଜସ୍ଥାନର ରାଜ୍ୟ ପକ୍ଷୀ। ଏହା କେବଳ ଭାରତୀୟ ଉପମହାଦେଶରେ ଦେଖାଯାଉଥିବା ଅତ୍ୟନ୍ତ ବିରଳ ପକ୍ଷୀ ନୁହେଁ, ବରଂ ବିଶ୍ୱର ସବୁଠାରୁ ଭାରୀ ଉଡ଼ନ୍ତା ପକ୍ଷୀମାନଙ୍କ ମଧ୍ୟରୁ ଏକ ବିଶାଳ ସ୍ଥଳଚର ପକ୍ଷୀ ଅଟେ।

କେନ୍ଦ୍ରୀୟ ପରିବେଶ ମନ୍ତ୍ରଣାଳୟ ଅନୁଯାୟୀ, ଯାଦବ କହିଛନ୍ତି ଯେ ଏହି ସଫଳତା ବୈଜ୍ଞାନିକ, ଗବେଷକ ଏବଂ ତୃଣମୂଳସ୍ତରରେ କାର୍ଯ୍ୟ କରୁଥିବା କର୍ମଚାରୀମାନଙ୍କ ପ୍ରାୟ ଏକ ଦଶନ୍ଧି ଧରି ଚାଲିଥିବା ନିରନ୍ତର ପ୍ରୟାସର ଫଳ। ଗ୍ରେଟ୍ ଇଣ୍ଡିଆନ୍ ବଷ୍ଟାର୍ଡ ସମେତ ଅନ୍ୟ ପ୍ରଜାତିର ସଂରକ୍ଷଣ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମାର୍ଗଦର୍ଶନ ଓ ସହଯୋଗ ପାଇଁ ସେ ତାଙ୍କୁ କୃତଜ୍ଞତା ଜଣାଇଛନ୍ତି।

ଏହା ଫଳରେ ଭାରତର ଗ୍ରେଟ୍ ଇଣ୍ଡିଆନ୍ ବଷ୍ଟାର୍ଡ ସଂରକ୍ଷଣ କାର୍ଯ୍ୟକ୍ରମରେ ସଂରକ୍ଷଣ-ପ୍ରଜନନ ମାଧ୍ୟମରେ ଏକ ସ୍ଥାୟୀ ଜନସଂଖ୍ୟା ପ୍ରସ୍ତୁତ କରିବାର ପରବର୍ତ୍ତୀ ପଦକ୍ଷେପ ଭାବେ ପକ୍ଷୀମାନଙ୍କୁ ସେମାନଙ୍କ ପ୍ରାକୃତିକ ଆବାସରେ ପୁନଃସ୍ଥାପିତ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନିଆଯାଇଛି। ଏହି ପକ୍ଷୀମାନଙ୍କୁ ଜଙ୍ଗଲରେ ଛାଡ଼ିବାରୁ ମିଳିଥିବା ଅଭିଜ୍ଞତା ଆଧାରରେ ଭବିଷ୍ୟତରେ ଏହି ପ୍ରକ୍ରିୟା ସହ ଜଡ଼ିତ ପ୍ରୋଟୋକଲକୁ ଆହୁରି ଉନ୍ନତ କରାଯିବ।

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା