ନୂଆଦିଲ୍ଲୀ, ୧୫ ଫେବୃୟାରୀ (ହି.ସ)- କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଆଜି ଗୁଜରାଟର ଗାନ୍ଧୀନଗରଠାରେ ସେଣ୍ଟ୍ରାଲ ବ୍ୟାଙ୍କ ଡିଜିଟାଲ ମୁଦ୍ରା (ସିବିଡିସି) ଉପରେ ଆଧାରିତ ଏକ ସ୍ୱଚ୍ଛ, ଆଧୁନିକ ଏବଂ ସରଳ ସାଧାରଣ ବଣ୍ଟନ ବ୍ୟବସ୍ଥା (ପିଡିଏସ)ର ଶୁଭାରମ୍ଭ କରିଛନ୍ତି। ଏହି ଅବସରରେ ଗୁଜରାଟର ମୁଖ୍ୟମନ୍ତ୍ରୀ ଶ୍ରୀ ଭୂପେନ୍ଦ୍ର ପଟେଲ, କେନ୍ଦ୍ର ଖାଉଟି ବ୍ୟାପାର, ଖାଦ୍ୟ ଏବଂ ସାଧାରଣ ବଣ୍ଟନ ମନ୍ତ୍ରୀ ଶ୍ରୀ ପ୍ରହ୍ଲାଦ ଯୋଶୀ ଏବଂ ଅନ୍ୟ ଅନେକ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।

କେନ୍ଦ୍ର ଗୃହମନ୍ତ୍ରୀ ତାଙ୍କ ଅଭିଭାଷଣରେ କହିଥିଲେ ଯେ, ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ଅନୁପ୍ରାଣିତ ହୋଇ ଡିଜିଟାଲ ଇଣ୍ଡିଆ ଏବେ ଖାଦ୍ୟ ଏବଂ ଯୋଗାଣ ବ୍ୟବସ୍ଥା ପର୍ଯ୍ୟନ୍ତ ସମ୍ପ୍ରସାରିତ ହେଉଛି। ସେ କହିଥିଲେ, ପ୍ରଧାନମନ୍ତ୍ରୀ ମୋଦୀ ଦେଶର ସମ୍ବଳ ଉପରେ ପ୍ରଥମ ଅଧିକାର ଗରିବ, ଦଳିତ, ପଛୁଆ ବର୍ଗ ଏବଂ ଆଦିବାସୀ ସମ୍ପ୍ରଦାୟକୁ ଦେଇଛନ୍ତି। ପୂର୍ବରୁ ଭାରତରେ ୬୦ କୋଟି ଲୋକ ଥିଲେ, ଯେଉଁମାନଙ୍କ ସମଗ୍ର ପରିବାରର ଗୋଟିଏ ବି ବ୍ୟାଙ୍କ ଆକାଉଣ୍ଟ ନଥିଲା, କିନ୍ତୁ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ ବିଶ୍ୱର ଅଧା ଡିଜିଟାଲ କାରବାର ଏବେ ଭାରତରେ ହେଉଛି। ସେହି ଡିଜିଟାଲ ଇଣ୍ଡିଆ ଏବେ ଦେଶର ଗରିବ ଲୋକଙ୍କୁ ସୁଲଭ ମୂଲ୍ୟରେ ଖାଦ୍ୟଶସ୍ୟ ଯୋଗାଇବା କ୍ଷେତ୍ରରେ ପ୍ରବେଶ କରୁଛି। ଶ୍ରୀ ଶାହ କହିଥିଲେ ଯେ, ଏହି ବ୍ୟବସ୍ଥା ଗରିବ ଲୋକଙ୍କୁ ରାସନ ଯୋଗାଇଦେବା ବ୍ୟବସ୍ଥାରୁ ଦୁର୍ନୀତିକୁ ସମ୍ପୂର୍ଣ୍ଣ ରୂପେ ଦୂର କରିବ।

ଶ୍ରୀ ଅମିତ ଶାହ କହିଛନ୍ତି ଯେ ସାରା ଦେଶରେ ଯୋଗାଯୋଗ ସମ୍ପ୍ରସାରଣ ସହିତ, ବର୍ତ୍ତମାନ ଗରିବମାନେ ସିଧାସଳଖ ଡିଜିଟାଲ୍ ମାଧ୍ୟମରେ ଖାଦ୍ୟ ଶସ୍ୟ ପାଇବା ସୁନିଶ୍ଚିତ କରିବା ପାଇଁ ବ୍ୟବସ୍ଥା କରାଯିବ। ସେ ମନ୍ତବ୍ୟ ଦେଇଛନ୍ତି ଯେ ଯେପରି ପ୍ରତ୍ୟକ୍ଷ ଲାଭ ହସ୍ତାନ୍ତର (ଡିବିଟି) ଦେଶରେ ଠକେଇ ଏବଂ ଜାଲିଆତିକୁ ସମାପ୍ତ କରିଛି, ଖାଦ୍ୟ ଏବଂ ସାଧାରଣ ବଣ୍ଟନ ମନ୍ତ୍ରଣାଳୟର ଏହି ପଦକ୍ଷେପ ଆଗାମୀ ଦିନରେ ଏକ ସ୍ୱଚ୍ଛ ବିତରଣ ବ୍ୟବସ୍ଥା ସୁନିଶ୍ଚିତ କରିବ। ଶ୍ରୀ ଶାହ କହିଥିଲେ ଯେ ପ୍ରଧାନମନ୍ତ୍ରୀ ମୋଦୀଙ୍କ ‘ସର୍ବନିମ୍ନ ସରକାର, ସର୍ବାଧିକ ଶାସନ’ ମନ୍ତ୍ର ଆଜି ଏକ ନୂତନ କ୍ଷେତ୍ରରେ କାର୍ଯ୍ୟକାରୀ ହେଉଛି।

କେନ୍ଦ୍ର ଗୃହମନ୍ତ୍ରୀ କହିଥିଲେ ଯେ ଏହି ବିତରଣ ବ୍ୟବସ୍ଥା, ଯାହା ଜ୍ଞାନକୌଶଳର ଏକ ଅନନ୍ୟ ମିଶ୍ରଣ ଏବଂ ଗରିବଙ୍କ ପ୍ରତି ପ୍ରଧାନମନ୍ତ୍ରୀ ମୋଦୀଙ୍କ ସମ୍ବେଦନଶୀଳତା, ସୁରକ୍ଷିତ ଏବଂ ସ୍ୱଚ୍ଛ ଢଙ୍ଗରେ ଗରିବଙ୍କ ଅଧିକାରର ସୁରକ୍ଷା କରିବାର ଏକ ମାଧ୍ୟମ ହେବ। ସେ ଉଲ୍ଲେଖ କରିଥିଲେ ଯେ ଆଜି 'ଅନ୍ନପୂର୍ଣ୍ଣା' ମେସିନ୍ ମଧ୍ୟ ଉଦଘାଟିତ ହୋଇଛି, ଯାହା ମାତ୍ର ୩୫ ସେକେଣ୍ଡରେ ୨୫ କିଲୋଗ୍ରାମ ଖାଦ୍ୟଶସ୍ୟ ବଣ୍ଟନ କରୁଛି। ଶ୍ରୀ ଶାହ କହିଥିଲେ ଯେ ଆଗାମୀ ୩ରୁ ୪ ବର୍ଷ ମଧ୍ୟରେ ଏହି ବ୍ୟବସ୍ଥା ସମଗ୍ର ଦେଶରେ ଲାଗୁ କରାଯିବ। ସେ କହିଥିଲେ ଯେ ଏହି ଖାଦ୍ୟଶସ୍ୟ ବଣ୍ଟନ ବ୍ୟବସ୍ଥା ସମ୍ପୂର୍ଣ୍ଣ ସ୍ୱଚ୍ଛ ହେବ ଏବଂ ଏହା କାର୍ଯ୍ୟକାରୀ ହେବା ପରେ ଦେଶର ପ୍ରତ୍ୟେକ ଗରିବ୍ୟକ୍ତି ୫ କିଲୋଗ୍ରାମ ମାଗଣା ଖାଦ୍ୟଶସ୍ୟ ପାଇପାରିବେ। ସେ ଆହୁରି ମଧ୍ୟ କହିଛନ୍ତି ଯେ 'ଅନ୍ନପୂର୍ଣ୍ଣା' ମେସିନ୍ ଉନ୍ନତ ଗୁଣବତ୍ତା, ସଠିକ୍ ପରିମାଣ ଏବଂ ସ୍ୱଚ୍ଛ ବଣ୍ଟନ ସୁନିଶ୍ଚିତ କରିବାରେ ସାହାଯ୍ୟ କରିବ। ଶ୍ରୀ ଶାହ କହିଥିଲେ ଯେ ଧୀରେ ଧୀରେ ଏହି ବ୍ୟବସ୍ଥା କାଶ୍ମୀରରୁ କନ୍ୟାକୁମାରୀ ଏବଂ ଦ୍ୱାରକା ଠାରୁ କାମାକ୍ଷା ପର୍ଯ୍ୟନ୍ତ ଆମ ବିଶାଳ ଦେଶରେ ଲାଗୁ ହେବା ଉଚିତ।

ଶ୍ରୀ ଅମିତ ଶାହ କହିଥିଲେ ଯେ ଆଜି ଦେଶର ୧ ଲକ୍ଷ ୭ ହଜାର ଗ୍ରାମରେ ଯୋଗାଯୋଗ ହୋଇପାରିଛି। ସେ କହିଥିଲେ ଯେ ପ୍ରଧାନମନ୍ତ୍ରୀ ମୋଦୀ ଦେଶର ୮୦ କୋଟି ଲୋକଙ୍କୁ ପ୍ରତି ମାସରେ ବ୍ୟକ୍ତି ପିଛା ୫ କିଲୋଗ୍ରାମ ମାଗଣା ଖାଦ୍ୟଶସ୍ୟ ଯୋଗାଇ ଦେଇଛନ୍ତି। ଶ୍ରୀ ଶାହ କହିଥିଲେ ଯେ ଖାଦ୍ୟ ସୁରକ୍ଷା ଏବେ ସ୍ୱଚ୍ଛ ହୋଇଯାଇଛି। ସେ ଉଲ୍ଲେଖ କରିଥିଲେ ଯେ ପ୍ରଧାନମନ୍ତ୍ରୀ ମୋଦୀ ଜୀ ପ୍ରଧାନମନ୍ତ୍ରୀ ରାସ୍ତାକଡ ବିକ୍ରେତାଙ୍କ ଆତ୍ମନିର୍ଭର ନିଧି (ପିଏମ ସ୍ୱନିଧି) ଯୋଜନାର ଲାଭ ସାରା ଦେଶର ୧ କୋଟି ୯ ଲକ୍ଷ ରାସ୍ତାକଡ ବିକ୍ରେତାଙ୍କୁ ପ୍ରଦାନ କରିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ଦୃଢ଼ ନୀତି ମାଧ୍ୟମରେ ମୋଦୀ ସରକାର ଗତ ୧୦ ବର୍ଷ ମଧ୍ୟରେ ୬୦ କୋଟିରୁ ଅଧିକ ଲୋକଙ୍କ ଜୀବନଧାରଣ ମାନରେ ଉନ୍ନତି କରିଛନ୍ତି ଏବଂ ୨୭ କୋଟି ଲୋକଙ୍କୁ ଦାରିଦ୍ର‌୍ୟ ସୀମାରେଖା ଉପରକୁ ଉଠାଇଛନ୍ତି।

କେନ୍ଦ୍ର ଗୃହମନ୍ତ୍ରୀ କହିଥିଲେ ଯେ ମୁଖ୍ୟ ବିରୋଧୀ ଦଳ ଏବଂ ସେମାନଙ୍କ ସରକାର ସବୁବେଳେ ମିଛ କହି ଜନସାଧାରଣଙ୍କୁ ବିଭ୍ରାନ୍ତ କରିଥାନ୍ତି। ଶ୍ରୀ ଶାହ କହିଥିଲେ ଯେ ପୂର୍ବ ସରକାର ସମୟରେ କୃଷି ବଜେଟ୍ ମାତ୍ର ୨୬ ହଜାର କୋଟି ଟଙ୍କା ଥିଲା, ଯାହାକୁ ପ୍ରଧାନମନ୍ତ୍ରୀ ମୋଦୀ ଜୀ ବୃଦ୍ଧି କରି ୧ ଲକ୍ଷ ୨୯ ହଜାର କୋଟି ଟଙ୍କା କରିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ପୂର୍ବ ସରକାର ୭୦ ବର୍ଷ ମଧ୍ୟରେ କେବଳ ଥରେ ଋଣ ଛାଡ ଘୋଷଣା କରି କୃଷକମାନଙ୍କୁ ବିଭ୍ରାନ୍ତ କରିଥିଲେ, ଯେତେବେଳେ କି ପ୍ରଧାନମନ୍ତ୍ରୀ ମୋଦୀ ଗତ ୧୦ ବର୍ଷ ଧରି ପ୍ରତ୍ୟେକ କୃଷକଙ୍କ ବ୍ୟାଙ୍କ ଆକାଉଣ୍ଟକୁ ପ୍ରତିବର୍ଷ ୬୦୦୦ ଟଙ୍କା ସିଧାସଳଖ ଭାବେ ପଠାଉଛନ୍ତି, ଏପରି ଏକ ବ୍ୟବସ୍ଥା ସୃଷ୍ଟି କରିଛନ୍ତି ଯେଉଁଠାରେ କୃଷକମାନଙ୍କୁ ଆଦୌ ଋଣ ନେବାକୁ ପଡିବ ନାହିଁ।

ଶ୍ରୀ ଶାହ କହିଥିଲେ ଯେ, ୟୁରୋପୀୟ ସଂଘ ଏବଂ ବ୍ରିଟେନ ସହିତ ସ୍ୱାକ୍ଷରିତ ମୁକ୍ତ ବାଣିଜ୍ୟ ରାଜିନାମା (ଏଫଟିଏ) ଏବଂ ଆମେରିକା ସହିତ ହୋଇଥିବା ବାଣିଜ୍ୟ ରାଜିନାମା ସମ୍ପର୍କରେ ବିରୋଧୀ ଦଳ ଦେଶକୁ ବିଭ୍ରାନ୍ତ କରୁଛନ୍ତି। ସେ କହିଥିଲେ ପୂର୍ବ ସରକାର ଡଙ୍କେଲ ପ୍ରସ୍ତାବରେ ସ୍ୱାକ୍ଷର କରି କୃଷକମାନଙ୍କୁ ଅସୁରକ୍ଷିତ କରିଥିଲେ। ୟୁରୋପୀୟ ସଂଘ ଏବଂ ବ୍ରିଟେନ ସହିତ ମୁକ୍ତ ବାଣିଜ୍ୟ ରାଜିନାମା ଏବଂ ଆମେରିକା ସହିତ ବାଣିଜ୍ୟ ରାଜିନାମା ଜରିଆରେ ପ୍ରଧାନମନ୍ତ୍ରୀ ଦେଶର କୃଷକମାନଙ୍କ ସ୍ୱାର୍ଥକୁ ସମ୍ପୂର୍ଣ୍ଣ ଭାବେ ସୁରକ୍ଷିତ ରଖିଛନ୍ତି। ସେ ଗୁରୁତ୍ୱାରୋପ କରିଥିଲେ ଯେ, ପ୍ରଧାନମନ୍ତ୍ରୀ ଏହି ରାଜିନାମା ଜରିଆରେ ଭାରତର ଦୁଗ୍ଧ କ୍ଷେତ୍ରକୁ ମଧ୍ୟ ସୁରକ୍ଷା ପ୍ରଦାନ କରିଛନ୍ତି। ଏହି ରାଜିନାମା ଭାରତର କୃଷି ଏବଂ ମତ୍ସ୍ୟଜୀବୀଙ୍କ ଉତ୍ପାଦ ବିଶ୍ୱବ୍ୟାପୀ ବଜାରରେ ପହଞ୍ଚିବାର ମାର୍ଗ ଉନ୍ମୁକ୍ତ କରିଛି। ସେ ଦୃଢ଼ତାର ସହ କହିଥିଲେ ଯେ ପ୍ରଧାନମନ୍ତ୍ରୀ କୃଷକ, ମତ୍ସ୍ୟଜୀବୀ ଏବଂ ପଶୁପାଳକଙ୍କ ସ୍ୱାର୍ଥ ସହ କେବେ ବି ସାଲିସ୍ କରିବେ ନାହିଁ। ସେ ଆହୁରି ମଧ୍ୟ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ଆଜି ଦେଶର କୃଷକମାନଙ୍କୁ ସୁରକ୍ଷା ଦେବାରେ ଏକ ପଥର ଭଳି ଠିଆ ହୋଇଛନ୍ତି।

କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ଆଜି ଦୁର୍ନୀତି ଏବଂ ଖାଦ୍ୟ ବଣ୍ଟନ ତଥା ଖାଦ୍ୟ ନିରାପତ୍ତାରେ ସ୍ୱଚ୍ଛତାର ଅଭାବ ଦୂର ହୋଇଛି। ସେ କହିଥିଲେ ଯେ ଏହା ସୁନିଶ୍ଚିତ କରିବ ଯେ ପ୍ରତ୍ୟେକ ଗରିବ ନାଗରିକଙ୍କ ଖାଦ୍ୟ ଅଧିକାର ସୁରକ୍ଷିତ ରହିବ ଏବଂ ମଧ୍ୟସ୍ଥିଙ୍କ ପାଇଁ କୌଣସି ସ୍ଥାନ ରହିବ ନାହିଁ।

---------------

ହିନ୍ଦୁସ୍ଥାନ ସମାଚାର / ବନ୍ଦନା