ମାଲକାନଗିରି, ୧୫ ମାର୍ଚ୍ଚ (ହି.ସ.)- କେନ୍ଦ୍ର ସରକାରଙ୍କ ପ୍ରମୁଖ ଯୋଜନା 'ଉଲ୍ଲାସ'-ନବ ଭାରତ ସାକ୍ଷରତା କାର୍ଯ୍ୟକ୍ରମ ଅନ୍ତର୍ଗତ ଆଜି ମାଲକାନଗିରି ଜିଲ୍ଲାରେ ଫାଉଣ୍ଡେସନାଲ ଲିଟ୍ରେସି ଏଣ୍ଡ ନ୍ୟୁମେରେସି ଆସେସମେଣ୍ଟ ଟେଷ୍ଟ ସଫଳତାର ସହ ସମ୍ପନ୍ନ ହୋଇଯାଇଛି। ଜିଲ୍ଲାର ପ୍ରାୟ ୮୬୫ଟି କେନ୍ଦ୍ରରେ ଏହି ପରୀକ୍ଷା ଆୟୋଜନ କରାଯାଇଛି । ଏହା କେନ୍ଦ୍ର ସରକାରଙ୍କ ଏକ ଫ୍ଲାଗସିପ ପ୍ରୋଗ୍ରାମ, ଯାହାର ଲକ୍ଷ୍ୟ ହେଉଛି ୧୫ ବର୍ଷ ବୟସରୁ ଉର୍ଦ୍ଧ୍ବ ଗୋଷ୍ଠିର ନିରକ୍ଷରଙ୍କୁ ସାକ୍ଷର କରିବା । ଜିଲ୍ଲା ଶିକ୍ଷା ଅଧିକାରୀ ଚିତ୍ତରଞ୍ଜନ ପାଣିଗ୍ରାହୀଙ୍କ ଅନୁସାରେ

ଜିଲ୍ଲାରେ ଯେତେ ସ୍କୁଲରୁ ୟୁଡାଇସ୍ କୋଡ୍ ଅଛି, ସେଗୁଡିକ ଏଫ୍.ଏଲ୍.ଏନ୍.ଏଟି ପରୀକ୍ଷା କେନ୍ଦ୍ର ରୂପେ ନିର୍ଦ୍ଧାରିତ ହୋଇଅଛି। ଏହା ସହ ମାଲକାନଗିରି ଜିଲ୍ଲା ଜେଲ୍ ରେ ଏକ ସ୍ପେସାଲ ଏଫ୍.ଏଲ୍.ଏନ୍.ଏଟି କେନ୍ଦ୍ର ସ୍ଥାପିତ ହୋଇଛି, ଯେଉଁଠାରେ ପ୍ରାୟ ୨୦୦ ଜଣ କାରାବାସୀ ପରୀକ୍ଷାରେ ସାମିଲ ହୋଇଛନ୍ତି ।

ଜିଲ୍ଲାର ଲିଟେରେସି ଟାର୍ଗେଟ ୩୫୦୦୦ ଥିଲାବେଳେ ଆଜିର ପରୀକ୍ଷାରେ ପ୍ରାୟ ୯୬୦୩ ଜଣ ( ଦିନ ୧୨ଟା ପର୍ଯ୍ୟନ୍ତ) ଲିଟେରେସି ପରୀକ୍ଷା ଦେଇଥିବାର ସୂଚନା ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ମଞ୍ଜୁଲତା ଭୋଇ ତଦାରଖ ସମୟରେ ସୂଚନା ଦେଇଛନ୍ତି। ମାଲକାନଗିରି ଜିଲ୍ଲାର ସମସ୍ତ ପରୀକ୍ଷା କେନ୍ଦ୍ରରେ ଏହି ପରୀକ୍ଷାକୁ ବିଦ୍ୟାଳୟ ଏବଂ ଗଣଶିକ୍ଷା ବିଭାଗର କର୍ମଚାରୀ ପରିଚାଳନା କରିଥିଲେ ।

ହିନ୍ଦୁସ୍ଥାନ ସମାଚାର / ଶିବବ୍ରତ