କିଭ (ୟୁକ୍ରେନ), ୧୪ ମଇ (ହି.ସ)-ରୁଷ ୟୁକ୍ରେନରେ ଏକ ବଡ଼ ଡ୍ରୋନ୍ ଏବଂ କ୍ଷେପଣାସ୍ତ୍ର ଆକ୍ରମଣ କରିଛି। ବୁଧବାର ସକାଳ ଠାରୁ ମଧ୍ୟରାତ୍ରି ପର୍ଯ୍ୟନ୍ତ ଆକ୍ରମଣ କରି ରୁଷ ତାଣ୍ଡବ ରଚାଇଛି। ଏହି ଆକ୍ରମଣରେ ଅତି କମରେ ୧୪ ଜଣଙ୍କ ମୃତ୍ୟୁ ହୋଇଛି ଏବଂ ୮୦ ରୁ ଅଧିକ ସାଧାରଣ ନାଗରିକ ଆହତ ହୋଇଛନ୍ତି।ରାଜଧାନୀ କିବରେ ରୁଷ ଆକ୍ରମଣ ଯୋଗୁଁ ଏକ ଆବାସିକ କୋଠା ଭୁଶୁଡ଼ି ପଡ଼ିଛି।ଭଗ୍ନାବଶେଷ ତଳେ ଫସି ରହିଥିବା ଦଶ ଜଣଙ୍କୁ ଉଦ୍ଧାର କରାଯାଇଛି। ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଛି ଏବଂ ୧୬ ଜଣ ଆହତ ହୋଇଛନ୍ତି।

ପ୍ରାୟ ୧ ଟା ସମୟରେ, ୟୁକ୍ରେନୀୟ ବାୟୁସେନା ଏକ ଦେଶବ୍ୟାପୀ ବାୟୁ ସତର୍କତା ଜାରି କରି ଚେତାବନୀ ଦେଇଛି ଯେ ରୁଷ ମିଗ୍-୩୧ ବୋମାବର୍ଷୀ ବିମାନ ମୁତୟନ କରିଛି। ଦେଶର ପ୍ରତ୍ୟେକ ଅଞ୍ଚଳ ବାଲିଷ୍ଟିକ୍ କ୍ଷେପଣାସ୍ତ୍ର ଆକ୍ରମଣର ବିପଦରେ ଅଛି।ଦି କିଭ ଇଣ୍ଡିପେଣ୍ଡେଣ୍ଟ ଖବରକାଗଜର ଏକ ରିପୋର୍ଟ ଅନୁଯାୟୀ, କିଭ ସାମରିକ ପ୍ରଶାସନର ମୁଖ୍ୟ, ତୈମୁର ଟକାଚେଙ୍କୋ, କିଛି ସମୟ ପରେ ଚେତାବନୀ ଦେଇଥିଲେ ଯେ ରୁଷ ଡ୍ରୋନ୍ ରାଜଧାନୀ ଆଡକୁ ମୁହାଁଇଛି ଏବଂ କ୍ଷେପଣାସ୍ତ୍ର ଆକ୍ରମଣ ଏକ ସମ୍ଭାବ୍ୟ ବିପଦ। ସ୍ଥାନୀୟ ସମୟ ସକାଳ ୩:୦୮ ଟାରେ, କିଭରେ ଜୋରଦାର ବିସ୍ଫୋରଣ ହୋଇଥିଲା। ୟୁକ୍ରେନୀୟ ବାୟୁ ପ୍ରତିରକ୍ଷା ପ୍ରଣାଳୀ ରୁଷୀୟ ଡ୍ରୋନ ସହିତ ଲଢ଼ିବା ପରି ମନେ ହେଉଥିଲା। ସକାଳ 3:15 ରୁ 3:20 ମଧ୍ୟରେ ବାଲିଷ୍ଟିକ୍ କ୍ଷେପଣାସ୍ତ୍ର ଆକ୍ରମଣ ଯୋଗୁଁ ବିସ୍ଫୋରଣ ଶୁଣାଯାଇଥିଲା। କିଛି ସମୟ ପରେ, ପ୍ରାୟ 3:44 ରେ, ପୁଣି ବାଲିଷ୍ଟିକ୍ କ୍ଷେପଣାସ୍ତ୍ର ଗର୍ଜନ କରିଥିଲା।

---------------

ହିନ୍ଦୁସ୍ଥାନ ସମାଚାର / ରଶ୍ମିତା