ଫାଜିଲ୍କା, ୦୧ ସେପ୍େଟମ୍ବର (ହି.ସ.)- ଭାରତ-ପାକିସ୍ତାନ ସୀମା ନିକଟରେ ଫାଜିଲ୍କାର ନୂରଶାହ ଗାଁ ନିକଟରେ ପୋଲରୁ ପଡ଼ି ସୀମା ସୁରକ୍ଷା ବଳ (ବିଏସଏଫ)ର ସହାୟକ ଉପନିରୀକ୍ଷକ (ଏଏସଆଇ) ଲଖ୍ଖା ସିଂହଙ୍କ ମୃତ୍ୟୁ ହୋଇଛି। ବିଏସଏଫର ୧୯ତମ ବାଟାଲିୟନରେ ନିଯୁକ୍ତ ଏଏସଆଇ ଡ୍ରେନର ପୋଲ ଉପରେ ନାକାବନ୍ଦୀ ସମୟରେ ସନ୍ଦିଗ୍ଧ ଯାନଗୁଡ଼ିକୁ ଯାଂଚ କରୁଥିଲେ।
ବିଏସଏଫ ଅନୁଯାୟୀ ଡ୍ରେନର ପୋଲ ଉପରେ ନାକାବନ୍ଦୀ ସମୟରେ ଯାତାୟାତ କରୁଥିବା ସନ୍ଦିଗ୍ଧ ଯାନଗୁଡ଼ିକୁ ଯାଂଚ କରାଯାଉଥିଲା। ଏହି ସମୟରେ ମୋଗା ଜିଲ୍ଲାର ବାସିନ୍ଦା ଏଏସଆଇ ଲଖ୍ଖା ସିଂହ ଏକ ଯାନକୁ ଅଟକାଇ ତାହାର ତଲାସି ନେଉଥିଲେ। ପୋଲର ଗୋଟିଏ ପାର୍ଶ୍ୱରେ ରେଲିଂ ନଥିବାରୁ ଯାଂଚ ସମୟରେ ତାଙ୍କର ସନ୍ତୁଳନ ବିଗିଡ଼ିଗଲା ଏବଂ ସେ ସିଧା ପୋଲ ତଳକୁ ପଡ଼ି ଗୁରୁତର ଭାବେ ଆହତ ହୋଇଥିଲେ। ଘଟଣାସ୍ଥଳରେ ଉପସ୍ଥିତ ବିଏସଏଫ ଯବାନମାନେ ତୁରନ୍ତ ତାଙ୍କୁ ବାହାରକୁ ଆଣି ଫାଜିଲ୍କାର ସରକାରୀ ହସ୍ପିଟାଲକୁ ନେଇଥିଲେ, ଯେଉଁଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ।
ଦୁର୍ଘଟଣା ପରେ ସ୍ଥାନୀୟ ଗ୍ରାମବାସୀମାନେ ପୋଲର ସୁରକ୍ଷା ବ୍ୟବସ୍ଥାକୁ ନେଇ ପ୍ରଶ୍ନ ଉଠାଇଛନ୍ତି। ଗାଁର ବାସିନ୍ଦା ଜାଗୀର ସିଂହ ଏବଂ ଅନ୍ୟମାନଙ୍କ ଅନୁଯାୟୀ ଡ୍ରେନର ଏହି ପୋଲର ଗୋଟିଏ ପାର୍ଶ୍ୱରେ ଦୀର୍ଘ ସମୟ ଧରି ରେଲିଂ ନାହିଁ। ଏହା ଯୋଗୁଁ ଏଠାରେ ଲଗାତାର ଦୁର୍ଘଟଣାର ଆଶଙ୍କା ରହିଛି।
ସରକାରୀ ହସ୍ପିଟାଲର ଡାକ୍ତର ପ୍ରତୀକ କହିଛନ୍ତି ଯେ ଶବକୁ ପୋଷ୍ଟମର୍ଟମ ପାଇଁ ମର୍ଚ୍ଚୁରୀରେ ରଖାଯାଇଛି। ମାମଲାର ସୂଚନା ସମ୍ପୃକ୍ତ ଥାନାକୁ ଦିଆଯାଇଛି। ଡାକ୍ତରଙ୍କ ଅନୁଯାୟୀ ପୋଷ୍ଟମର୍ଟମ ରିପୋର୍ଟ ଆସିବା ପରେ ଆଗାମୀ ଆଇନଗତ କାର୍ଯ୍ୟାନୁଷ୍ଠାନ କରାଯିବ।
-----------------------------
---------------
ହିନ୍ଦୁସ୍ଥାନ ସମାଚାର / ଗଗନ