ବଲାଙ୍ଗିର, ୭ ଅକ୍ଟୋବର (ହି.ସ.)- ସ୍ଥାନୀୟ ଟାଉନ ବାଳିକା ବିଦ୍ୟାଳୟ ପରିସରରେ ବଲାଙ୍ଗିର ଜିଲ୍ଲା ବରିଷ୍ଠ ନାଗରିକ ମଂଚ ତରଫରୁ ଆନ୍ତର୍ଜାତିକ ବରିଷ୍ଠ ନାଗରିକ ଦିବସ ସଭାପତି ପ୍ରଭାକର ମିଶ୍ରଙ୍କ ସଭାପତିତ୍ୱରେ ପାଳନ କରାଯାଇଥିଲା । ମଧୁସୂଦନ ନାୟକ ଅତିଥିମାନଙ୍କୁ ମଂଚାସିନ ହେବା ପାଇଁ ଆମନ୍ତ୍ରଣ କରିଥିଲେ । ସମ୍ମାନିତ ଅତିଥି ଭାବରେ ପୌରାଧ୍ୟକ୍ଷା ଲିକା ସାହୁ, ମୁଖ୍ୟବକ୍ତା ଭାବରେ ଅଧ୍ୟାପକ ରାଜମଣି ସାହୁ କେନ୍ଦ୍ରୀୟ ବିଦ୍ୟାଳୟ ବଡମାଲ ଉକ୍ତ ସମାରୋହରେ ଯୋଗଦାନ କରି ବରିଷ୍ଠ ନାଗରିକ ମାନଙ୍କୁ ଉଦ୍‌ବୋଧନ ଦେଇଥିଲେ । ମଂଚର ସାଧାରଣ ସଂପାଦକ କପିଳେଶ୍ୱର ଖମାରୀଙ୍କ ପ୍ରାରମ୍ଭିକ ସୂଚନା ଓ ସଂପାଦକୀୟ ବିବରଣୀ ପ୍ରଦାନ କରିବା ପରେ ସଭାକାର୍ଯ୍ୟ ଆଗେଇ ଥିଲା । ପୌରାଧ୍ୟକ୍ଷା ଶ୍ରୀମତୀ ସାହୁ ବରିଷ୍ଠ ନାଗରିକ ମାନଙ୍କ ସୁନ୍ଦର ସ୍ୱାସ୍ଥ୍ୟ ଏବଂ ନିରୋଗ ଜୀବନ ପାଇଁ ଭଗବାନଙ୍କ ଠାରେ କାମନା କରିଥିଲେ ଏବଂ ବରିଷ୍ଠ ନାଗରିକମାନଙ୍କ ଏକ ଅଫିସ ଗୃହ ଅତିଶିଘ୍ର ଯୋଗାଇ ଦେବା ପାଇଁ ପ୍ରତିଶୃତି ଦେଇଥିଲେ । ମୁଖ୍ୟବକ୍ତା ରାଜମଣି ସାହୁ ଅତ୍ୟନ୍ତ ସୁନ୍ଦର ଭାବରେ ଏକ ସାରଗର୍ଭକ ଅଭିଭାଷଣ ମାଧ୍ୟମରେ ବରିଷ୍ଠ ନାଗରିକମାନଙ୍କର ସୁବିଧା, ଅସୁବିଧା ଏବଂ ସେମାନଙ୍କର ବୁଦ୍ଧିମତା ଉପରେ ଆଲୋକପାତ କରିଥିଲେ । ଏହି ଅବସରରେ ବଲାଙ୍ଗିର ଜିଲ୍ଲାର ଏକ ସ୍ୱନାମଧନ୍ୟ ସାମାଜିକ ଅନୁଷ୍ଠାନ ମାହେଶ୍ୱରୀ ସଂଗଠନ ଏବଂ ବରିଷ୍ଠ ସ୍ତ୍ରୀ ରୋଗ ବିଶେଷଜ୍ଞ ତଥା କବି ଓ କ୍ରୀଡାବିତ୍ ଡା. ବେଣୁଧର ପାଣ୍ଡେଙ୍କୁ ମଂଚ ତରଫରୁ ମାନପତ୍ର ଓ ଉପଢୈାକନ ଦେଇ ସମ୍ମାନିତ କରାଯାଇଥିଲା । ସଭ୍ୟ ପୀତବାସ ପଣ୍ଡା ଓ ଉପଦେଷ୍ଟା ପଦ୍ମଚରଣ ଆଚାର୍ଯ୍ୟ ମାନପତ୍ର ପଠନ କରିଥିଲେ । ଏତଦ୍ ବ୍ୟତିତ ମଂଚ ପ୍ରତି ଆନୁଷ୍ଠାନିକ ସହାୟତା ପ୍ରଦାନ କରିଥିବା ନିମନ୍ତେ ସଦସ୍ୟ ବିପିନ ବିହାରି ପୁରୋହିତଙ୍କୁ ଉପଢୈାକନ ଦେଇ ସମ୍ମର୍ଦ୍ଧିତ କରାଯାଇଥିଲା ।

ଏହି କାର୍ଯ୍ୟକ୍ରମ ସଫଳ କରିବାରେ କୋଷାଧ୍ୟକ୍ଷ ଚୁଡେନ୍ଦ୍ର କୁମାର ବେହେରା, ମୁଖ୍ୟ ଉପଦେଷ୍ଟା ନାରାୟଣ ପାଢି, ଚିତ୍ତ ରଂଜନ ପଟେଲ, ସୁରେନ୍ଦ୍ର କୁମାର ନେଗୀ, ବ୍ରଜ କିଶୋର ପଣ୍ଡା, କୃଷ୍ଣଚନ୍ଦ୍ର ନାଥ, ଅଶୋକ ମିଶ୍ର ସହଯୋଗ କରିଥିଲେ । ଶେଷରେ ସଭାପତିଙ୍କ ଅଭିଭାଷଣ ପରେ ମଂଚର ସହ ସଂପାଦକ ସୁନିଲ ଚନ୍ଦ୍ର ବିଶ୍ୱାଲ ଧନ୍ୟବାଦ ଅର୍ପଣ କରିଥିଲେ ଏବଂ ସଭା ସାଙ୍ଗ ହୋଇଥିଲା ।

ହିନ୍ଦୁସ୍ଥାନ ସମାଚାର / ଗୋପବନ୍ଧୁ