ଭୁବନେଶ୍ୱର, ୦୭ ଅକ୍ଟୋବର (ହି.ସ.) - ଓଡ଼ିଶା ମୁଖ୍ୟ ସଚିବ ଶ୍ରୀ ମନୋଜ ଆହୁଜା ଆଜି ରାଜଧାନୀ କ୍ଷେତ୍ର ସହରାଞ୍ଚଳ ପରିବହନ (କ୍ରୁଟ୍ ) ମୁଖ୍ୟ କାର୍ଯ୍ୟାଳୟ ଏବଂ ଗାଡକଣା ଇଲେକ୍ଟ୍ରିକ୍ ବସ୍ ଡିପୋ ପରିଦର୍ଶନ କରି ଭୁବନେଶ୍ୱରରେ ଚାଲିଥିବା ସାଧାରଣ ପରିବହନ କାର୍ଯ୍ୟ ଏବଂ ବର୍ଦ୍ଧିତ ବୈଦ୍ୟୁତିକ ବସ୍ ନେଟୱାର୍କର ସମୀକ୍ଷା କରିଛନ୍ତି। ପରିଦର୍ଶନ ସମୟରେ, ଶ୍ରୀ ଆହୁଜା ବସ୍ କ୍ରୁ ସଦସ୍ୟ, ଗାଇଡ୍ ଏବଂ ବୈଷୟିକ କର୍ମଚାରୀଙ୍କ ସହ ଆଲୋଚନା କରି ସୁଗମ, ନିରାପଦ ଏବଂ ନିର୍ଭରଯୋଗ୍ୟ ସାର୍ବଜନୀନ ପରିବହନ ସେବା ସୁନିଶ୍ଚିତ କରିବାରେ ସେମାନଙ୍କର ଅଭିଜ୍ଞତା ଏବଂ ଚ୍ୟାଲେଞ୍ଜଗୁଡ଼ିକୁ ବୁଝିଥିଲେ।

କ୍ରୁଟ୍ କମାଣ୍ଡ ଆଣ୍ଡ୍ କେଂଟ୍ରାଲ୍ ସେଂଟରରେ, ସେ ସମୟାନୁବର୍ତିତା, ଦକ୍ଷତା ଏବଂ ଯାତ୍ରୀ ସନ୍ତୁଷ୍ଟି ବୃଦ୍ଧି କରିବାରେ ସାହାଯ୍ୟ କରୁଥିବା ରିଅଲ୍‌-ଟାଇମ୍ ମନିଟରିଂ ସିଷ୍ଟମ୍‌, ଡାଟା ଆନାଲିଟିକ୍ସ ଏବଂ ସିଡ୍ୟୁଲ୍ ଅପ୍ଟିମାଇଜେସନ୍ ପ୍ରକ୍ରିୟାଗୁଡ଼ିକର ସମୀକ୍ଷା କରିଥିଲେ।

କ୍ରୁଟ୍ ର ପଦକ୍ଷେପଗୁଡ଼ିକୁ ପ୍ରଶଂସା କରି, ଶ୍ରୀ ଆହୁଜା ସାର୍ବଜନୀନ ପରିବହନ ପରିଚାଳନାରେ ଡିଜିଟାଲ୍ ପ୍ରଯୁକ୍ତିର ଅଭିନବ ବ୍ୟବହାରକୁ ପ୍ରଶଂସା କଲେ। ସେ ସେମାନଙ୍କୁ ଉଚ୍ଚ ସେବା ମାନଦଣ୍ଡ ବଜାୟ ରଖିବା ଏବଂ ସବୁଜ ଗତିଶୀଳତା ସମାଧାନକୁ ପ୍ରୋତ୍ସାହିତ କରିବା ପାଇଁ ପରାମର୍ଶଦେଇଛନ୍ତି। ସେ ସହରାଞ୍ଚଳ ପରିବହନକୁ ସ୍ୱଚ୍ଛ ଏବଂ ଅଧିକ ସ୍ଥାୟୀ କରିବା ପାଇଁ ବୈଦ୍ୟୁତିକ ବସ୍ ପରିଚାଳନାକୁ ବିସ୍ତାର କରିବା ଉପରେ ମଧ୍ୟ ଗୁରୁତ୍ୱାରୋପ କରିଛନ୍ତି ।କ୍ରୁଟ୍ ପରିଚାଳନା ନିର୍ଦ୍ଦେଶକ ଡକ୍ଟର ଏନ. ଥିରୁମାଲା ନାଏକ ମୁଖ୍ୟ ସଚିବଙ୍କୁ ଚାଲୁଥିବା କାର୍ଯ୍ୟ ଏବଂ ଆଗାମୀ ପଦକ୍ଷେପ ବିଷୟରେ ସୂଚନା ଦେଇଥିଲେ। ଅନ୍ୟମାନଙ୍କ ମଧ୍ୟରେ, ମହାପ୍ରବନ୍ଧକ ସଞ୍ଜୟ ବିଶ୍ୱାଳ ଏବଂ ସହଦେବ ସମାଧିଆ, ବରିଷ୍ଠ କ୍ରୁଟ୍ ଅଧିକାରୀମାନଙ୍କ ସହିତ ମୂଖ୍ୟ ଶାସନ ସଚିବଙ୍କ ଗସ୍ତ ସମୟରେ ଉପସ୍ଥିତ ଥିଲେ।

---------------

ହିନ୍ଦୁସ୍ଥାନ ସମାଚାର / ବନ୍ଦନା