ଖଡଗପୁର, 16 ଡିସେମ୍ବର (ହି.ସ.)- ଭାରତୀୟ ପ୍ରଯୁକ୍ତିବିଦ୍ୟା ସଂସ୍ଥାନ (ଆଇଆଇଟି) ଖଡ଼ଗପୁରର
ପ୍ରଫେସରଙ୍କୁ ଅଷ୍ଟ୍ରେଲିଆର ବିଶ୍ୱବିଦ୍ୟାଳୟମାନଙ୍କ ସହ ସ୍ୱୀକୃତ ଶିକ୍ଷାଗତ ଓ ଗବେଷଣା ସହଯୋଗ
ସମ୍ବର୍ଧନ ଯୋଜନା (ସ୍ପାର୍କ)ର ଚରଣ 4ଏ ପ୍ରକଳ୍ପଗୁଡ଼ିକ ଅନ୍ତର୍ଗତ ଆନ୍ତର୍ଜାତୀୟ ସ୍ତରରେ
ସମ୍ମାନିତ ହୋଇଛନ୍ତି।
ନୂଆଦିଲ୍ଲୀରେ ଆୟୋଜିତ ତୃତୀୟ ଭାରତ–ଅଷ୍ଟ୍ରେଲିଆ ଶିକ୍ଷା ଓ କୌଶଳ
ପରିଷଦ ବୈଠକ ସମୟରେ ସୋମବାର ଆଇଆଇଟି ଖଡ଼ଗପୁରର ପ୍ରଫେସର କିଂଶୁକ ନସ୍କର (ପ୍ରଧାନ ଅନ୍ବେଷକ), ଡ଼. ପାର୍ଥସାରଥୀ
ଚକ୍ରବର୍ତ୍ତୀ (ସହ–ପ୍ରଧାନ ଅନ୍ବେଷକ) ଏବଂ ପ୍ରଫେସର ନାରାୟଣ ଚନ୍ଦ୍ର ଦାସ (ପ୍ରଧାନ
ଅନ୍ବେଷକ)ଙ୍କୁ ଔପଚାରିକ ସ୍ୱୀକୃତି ଆଦେଶ ଓ ସ୍ମୃତିଚିହ୍ନ ପ୍ରଦାନ କରାଯାଇଥିଲା। ଏହି ସମ୍ମାନ
ଭାରତ ସରକାରଙ୍କ ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ଅଷ୍ଟ୍ରେଲିଆର ଶିକ୍ଷା ମନ୍ତ୍ରୀ
ଜେସନ କ୍ଲେୟାରଙ୍କ ଦ୍ୱାରା ସଂଯୁକ୍ତ ଭାବେ ପ୍ରଦାନ କରାଯାଇଥିଲା।
ସ୍ପାର୍କ ଯୋଜନାର ଉଦ୍ଦେଶ୍ୟ ହେଉଛି ଭାରତୀୟ ଉଚ୍ଚ ଶିକ୍ଷା
ସଂସ୍ଥାନଗୁଡ଼ିକ ଓ ବିଶ୍ୱର ପ୍ରମୁଖ ବିଶ୍ୱବିଦ୍ୟାଳୟମାନଙ୍କ ମଧ୍ୟରେ ଗବେଷଣା ଏବଂ ଶିକ୍ଷାଗତ
ସହଯୋଗକୁ ସଶକ୍ତ କରିବା। ଏହି ସଫଳତା ଆନ୍ତର୍ଜାତୀୟ ଗବେଷଣା ସହଯୋଗରେ ଆଇଆଇଟି ଖଡ଼ଗପୁରର
ଅଗ୍ରଣୀ ଭୂମିକାକୁ ଓ ତାହାର ବିଶ୍ୱବ୍ୟାପୀ ଶିକ୍ଷାଗତ ପ୍ରତିଷ୍ଠାକୁ ଆହୁରି ମଜବୁତ କରିଛି।
ଏହି ଅବସରରେ ସଂସ୍ଥାନର ନିର୍ଦ୍ଦେଶକ ପ୍ରଫେସର ସୁମନ ଚକ୍ରବର୍ତ୍ତୀ
କହିଥିଲେ ଯେ ସ୍ପାର୍କ ଚରଣ 4ଏ କାର୍ଯ୍ୟକ୍ରମ ଅନ୍ତର୍ଗତ ମିଳିଥିବା ଏହି ସମ୍ମାନ ଆଇଆଇଟି
ଖଡ଼ଗପୁରର ଉଚ୍ଚ ପ୍ରଭାବଶାଳୀ ଆନ୍ତର୍ଜାତୀୟ ଗବେଷଣା ସହଯୋଗ ପ୍ରତି ଥିବା ପ୍ରତିବଦ୍ଧତାକୁ
ପ୍ରତିଫଳିତ କରେ। ସେ ସମ୍ମାନିତ ପ୍ରାଧ୍ୟାପକମାନଙ୍କୁ ଅଭିନନ୍ଦନ ଜଣାଇ କହିଥିଲେ ଯେ
ଅଷ୍ଟ୍ରେଲିଆର ପ୍ରମୁଖ ବିଶ୍ୱବିଦ୍ୟାଳୟମାନଙ୍କ ସହ ଏପରି ସହଯୋଗଗୁଡ଼ିକ କେବଳ ଶିକ୍ଷାଗତ
ଉତ୍କୃଷ୍ଟତାକୁ ଉତ୍ସାହିତ କରେ ନୁହେଁ, ବରଂ ବିଶ୍ୱବ୍ୟାପୀ ଚ୍ୟାଲେଞ୍ଜଗୁଡ଼ିକର ସମାଧାନ ପାଇଁ ସହଯୋଗାତ୍ମକ
ନବୀନତାକୁ ମଧ୍ୟ ସଶକ୍ତ କରେ।
---------------
ହିନ୍ଦୁସ୍ଥାନ ସମାଚାର / ସ୍ୱାଗତିକା
