ବଲାଙ୍ଗିର, 17 ଡିସେମ୍ବର (ହି.ସ.)ଡିସେମ୍ବର ୧୭ ତାରିଖ ସୁଦ୍ଧା ବଲାଙ୍ଗୀର ଜିଲ୍ଲାର ମଣ୍ଡିମାନଙ୍କରେ ଧାନକିଣା ଆରମ୍ଭ ହୋଇନାହିଁ । ଏହାକୁ ନେଇ ବଲାଙ୍ଗୀର ବିଧାୟକ କଳିକେଶନାରାୟଣ ସିଂଦେଓ ଉଦବେଗ ପ୍ରକାଶ କରିବା ସହ ସମାଧାନ ପାଇଁ ମୁଖ୍ୟମନ୍ତ୍ରୀ ମୋହନଚରଣ ମାଝିଙ୍କୁ ଚିଠିଲେଖି ଜଣାଇଛନ୍ତି । ଆଜି ଦିନ ୧୧ଟା ବେଳେ ବଲାଙ୍ଗୀର ସଦରବ୍ଲକ ଅନ୍ତର୍ଗତ କୁଡାସିଂହା ପେକ୍ସ ସହିତ ଅନ୍ୟ କିଛି ପେକ୍ସକୁ ପରିଦର୍ଶନ କରି ଚାଷିଙ୍କ ସମସ୍ୟା ବିଷୟରେ ଆଲୋଚନା କରିବା ସହିତ ଧାନକିଣାରେ ପ୍ରଶାସନିକ ଅବହେଳାକୁ ନେଇ ଉଦବେଗ ପ୍ରକାଶ କରିଛନ୍ତି । ବିଧାୟକ ଏନେଇ ଗଣମାଧ୍ୟମକୁ କହିଛନ୍ତି ଯେ,ବଲାଙ୍ଗୀର ଜିଲ୍ଲାର ଧାନକିଣା ବୈଠକ(ଡିଏଲପିସି) ରେ ଡିସେମ୍ବର ୫ ତାରିଖ ସୁଦ୍ଧା ମଣ୍ଡିଖୋଲି ଧାନ କିଣିବାକୁ ନିସ୍ପତ୍ତି ନିଆଯାଇଥିଲା । କିନ୍ତୁ ଆଜି ଡିସେମ୍ବର ୧୭ ତାରିଖ ସୁଦ୍ଧା କୌଣସି ପେକ୍ସରେ ଧାନ କିଣାଯାଇନାହିଁ । ଚାଷିମାନେ ଧାରଉଧାର କରି ଚାଷ କରିଛନ୍ତି । ଶ୍ରମିକମାନଙ୍କର ତଥା ଧାନଅମଳରେ ବ୍ୟବହାର କରିଥିବା ମେସିନର ପାଉଣା ପରିଶୋଧ ପାଇଁ ଚାଷିମାନେ ବ୍ୟଗ୍ରଥିବା ବେଳେ ପ୍ରଶାସନର ବିଳମ୍ବିତ ମଣ୍ଡି ବ୍ୟବସ୍ଥାରେ ଅତିଷ୍ଠ ହୋଇଯାଇଛନ୍ତି ବୋଲି ଚାଷିମାନେ ବିଧାୟକ ଶ୍ରୀ ସିଂଦେଓଙ୍କ ପାଖରେ ଅଭିଯୋଗ କରିଥିଲେ । ଜିଲ୍ଲାର ଛୋଟ ଓ ନାମମାତ୍ର ଚାଷି ହଇରାଣ ହେବା ସହିତ କମଦରରେ ଦଲାଲ ହାତରେ ଧାନ ବିକ୍ରୀକରିଦେଉଛନ୍ତି ବୋଲି ବିଧାୟକ କହିଛନ୍ତି । ଆଜି ବିଧାୟକ କୁଡାସିଂହାରେ ପହଞ୍ଚିଲା ବେଳେ କିଛି ଚାଷି ତାଙ୍କର ଧାନକୁ ଆଣି ପେକ୍ସରେ ରଖିଥିଲେ । ସେମାନେ ଟୋକନ ପାଇଥିଲେ ହେଁ ମିଲର୍ସ ଆସୁନଥିବାରୁ ପେକ୍ସରେ ସେହିଧାନକୁ ଓଜନ କରି କିଣୁନାହିଁ । ମିଲର୍ସ ଆସିଲାପରେ ଧାନ ଏଣ୍ଟ୍ରିହେବ ବୋଲି କୁହାଯାଇଛି । ମଣ୍ଡିକୁ ଆସିଥିବା ଧାନକୁ ତୁରନ୍ତ ଏଣ୍ଟ୍ରିକରିବାକୁ ବିଧାୟକ ପେକ୍ସର ସଂପାଦକ ଆଶିଷ ସାହୁଙ୍କୁ ନିର୍ଦ୍ଦେଶ କରିଥିଲେ । ସେପଟେ ଚାଷିଙ୍କୁ ପେକ୍ସରେ ଅଖାବସ୍ତା ମିଳିନଥିବା ବିଷୟ ମଧ୍ୟ ଜଣାପଡିଥିଲା । ଫଳରେ ବିଧାୟକ ଜିଲ୍ଲାପ୍ରଶାସନର ଏଭଳି କାର୍ଯ୍ୟକଳାପରେ ଅସନ୍ତୋଷ ବ୍ୟକ୍ତକରି ମଣ୍ଡିସମସ୍ୟାର ସମାଧାନ ପାଇଁ ମୁଖ୍ୟମନ୍ତ୍ରୀ ମୋହନଚରଣ ମାଝୀଙ୍କୁ ଚିଠିଲେଖି ଦାବି କରିଛନ୍ତି ବୋଲି ଗଣମାଧ୍ୟମକୁ କହିଛନ୍ତି । ବିଧାୟକ ମୁଖ୍ୟମନ୍ତ୍ରୀଙ୍କୁ ଲେଖିଥିବା ଚିଠିରେ ବଲାଙ୍ଗୀର ଜିଲ୍ଲାରେ ମଣ୍ଡି ଖୋଲାଯାଇନଥିବା,ଚାଷିଙ୍କୁ ଠିକରେ ଟୋକନ ଦିଆଯାଇନଥିବା ତଥା ଚାଷିଙ୍କ ପାଖକୁ ବସ୍ତା ପହଞ୍ଚିନଥିବା ପ୍ରମୁଖ ସମସ୍ୟା ବିଷୟରେ ଉଲ୍ଲେଖ କରି ଏହାର ତୁରନ୍ତ ସମାଧାନ କରିବାକୁ ନିର୍ଦ୍ଦେଶ କରିବାକୁ ଅନୁରୋଧ କରିଛନ୍ତି । ବିଧାୟକଙ୍କ ଏହି ଗସ୍ତ କାର୍ଯ୍ୟକ୍ରମରେ ଜିଲ୍ଲାପରିଷଦ ସଭାପତି ଦେବକୀ ସାହୁ,ପୂର୍ବତନ ବ୍ଲକଅଧ୍ୟକ୍ଷ ତଥା ସଦାଇପାଲି ସମିତିସଭ୍ୟ ଗୋଲାପ ବାଗ,ଯୁବନେତା ପ୍ରଦ୍ୟୁମ୍ନ ହୋତା,ବିଜେଡି ଆଇଟିସେଲର ସଂଯୋଜକ ବିଭୁତିଭୂଷଣ ମିଶ୍ର,ଲେଙ୍କା ସାହୁଙ୍କ ସମେତ ଅନ୍ୟାନ୍ୟ କାର୍ଯ୍ୟକର୍ତ୍ତାମାନେ ସାମିଲ ଥିଲେ ।
---------------
ହିନ୍ଦୁସ୍ଥାନ ସମାଚାର / ଗୋପବନ୍ଧୁ
