ପୁରୀ, ୩୧ ମଇ (ହି.ସ.)- ଜୁନ ୧୧ ତାରିଖରେ ପବିତ୍ର ସ୍ନାନପୂର୍ଣ୍ଣିମା । ଚତୁର୍ଦ୍ଧାମୂର୍ତ୍ତି ରତ୍ନସିଂହାସନ ଛାଡି ପହଣ୍ଡି ହୋଇ ସ୍ନାନ ମଣ୍ଡପରେ ବିଜେ କରିବେ । ସେହିଦିନ ପ୍ରତି ରଥରେ ଚାରି ନାହାକା ଉଠିବ । ଏଥିପାଇଁ ୪୨ ଚକ ୨୧ ଅଖ ସଂଯୋଗ ହୋଇ ରଥଖଳାରେ ଡେରା ହୋଇଛି । ଅଖକୁ ବାନ୍ଧି ରଖିବା ପାଇଁ ଦଣ୍ଡା ବାଡିଆ ହୋଇ ଦୁଇଟି ଲେଖାଏଁ ପ୍ରତି ରଥରେ ଗରଗରା ପଡିଡ। ଗରଗରାରେ ଚାରଟି ବିନ୍ଧ କରାଯାଇ ଚାରି ନାହାକା ଫିଟିଙ୍ଗ ହେବ । ପବିତ୍ର ଅକ୍ଷୟ ତୃତୀୟା ଦିନ ରଥ ନିର୍ମାଣ କାର୍ଯ୍ଯ ଆରମ୍ଭ ହୋଇଥିଲା । ଶ୍ରୀକ୍ଷେତ୍ର ଭଉଁରି ଦିନ ପ୍ରତି ରଥର ଦୁଇଟି ଚକ ସହ ଅଖ ସଂଯୁକ୍ତ କରାଯାଇ ତିନୋଟି ଅଲଗା ଅଲଗା ସ୍ଥାନରେ ଦଣ୍ଡାୟମାନ କରାଯାଇଛି । ନାହାକା ଚକଅଖ ପରେ ଅନ୍ଯ ଅଖ ଓ ଚକ ପର୍ଯ୍ଯାୟ କ୍ରମେ ଡେରା ଯିବ । ଚକ ନିର୍ମାଣ ପାଇଁ ଅଧିକ ସମୟ ଲାଗିଥାଏ । ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥରେ ୧୬ଟି ଚକ ୮ଟି ଅଖ, ଶ୍ରୀବଳଭଦ୍ରଙ୍କ ତାଳଧ୍ବଜ ରଥରେ ୧୪ଟି ଚକ ଓ ୭ଟି ଅଖ ଓ ମା ସୁଭଦ୍ରାଙ୍କ ଦର୍ପଦଳନ ରଥରେ ୧୨ଟି ଚକ ଓ ୬ଟି ଅଖ ସଂଯୋଗ କରାଯାଇ ଡେରା ଯିବ । ଅକ୍ଷୟ ତୃତୀୟା ପରଦିନ ଫାଶି କାଠଗଣ୍ଡିରେ ରଥ ଅମିନ ମାପଚୂପ ଦେବା ପରେ ତୁମ୍ବ କଟା ଆରମ୍ଭ ହୋଇଥିଲା । କରତୀ ସେବକ କାଠ ଗଣ୍ଡି ଗୁଡିକ କାଟିଥିଲେ । ସୂତାର ସେବକ ମାନେ କଳା ସୂତାରେ ଚିହ୍ନଟ କରିଥିଲେ । ମହାରଣା ମାନେ ତୁମ୍ବକୁ ମର୍ଦଳ ପରି ଗୋଲାକାର କରିବା ସହ ମାଠେଣି କରିଥିଲେ । ଗୋଟିଏ ତୁମ୍ବ ପୋଲା ପଡିବାରୁ ନୂଆ ତୁମ୍ବ କଟାଯାଇଥିଲା । ତୁମ୍ବ ଗୁଡିକରେ ତିନି ଗୁଣନ ପାଞ୍ଚ ଇଞ୍ଚର ବିନ୍ଧ କରାଯାଇଥିଲା । ପ୍ରତି ତୁମ୍ବରେ ୧୬ ଯୋଡା ବିନ୍ଧ କରାଯାଇଥିଲା । ପରେ ପରେ ଅର ସଂଯୋଗ ପାଇଁ ଅରବିନ୍ଧ କରାଯାଇଥିଲା । ତୁମ୍ବ ବଳା ଓ ତୁମ୍ବ ପନ୍ଦାରି ପାଇଁ ଗାଢ କରାଯାଇଥିଲା । ତୁମ୍ବରେ ଅଖବିନ୍ଧ ପାଇଁ ମେସିନ ସାହାଯ୍ଯରେ ଦୁଇ ଇଞ୍ଚିଆ ଗାତ ଖୋଳିବା ପରେ ପନ୍ଦାରି ମାପର ଅଖବିନ୍ଧ ପାଇଁ ବଡ ନିହଣ ସାହାଯ୍ଯରେ ଅଖବିନ୍ଧ କରାଯାଇଥିଲା । ନୃସିଂହ ଚତୁର୍ଦ୍ଦଶୀ ଦିନ ତୁମ୍ବରେ ଅର ସଂଯୋଗ, ଗୁଜ ଅନୁକୂଳ ପୂଜା ଓ ଯନ୍ତା ଗାଡରେ ସିଙ୍ଗଡା ବାଡିଆ କାର୍ଯ୍ୟ ଆରମ୍ଭ ହୋଇଥିଲା । ରୂପକାର ସେବକ ମାନେ ଚଉପଟ ହୋଇଥିବା ସାଲଗୁଜରେ ଶ୍ରୀ ନୃସିଂହ ଦେବଙ୍କ ରୂପ ଖୋଦେଇ କରିଥିଲେ । ପ୍ରଥମେ ନାହାକା ଚକ ୬ଟି ସମ୍ପୂର୍ଣ୍ଣ କରାଯାଇଥିଲା । ନାହାକା ଅଖ ନିର୍ମାଣ ଅନୁକୂଳ କରାଯାଇ ତୁମ୍ବ ଭିତରେ ଅଖ ପସିବା ପାଇଁ ଗୋଲେଇ ଓ ମାଠେଣି କରାଯାଇଥିଲା । ରୂପକାର ସେବକ ମାନେ ୧୧ଟି ସାଲଗୁଜରେ ଖୋଦେଇ କାର୍ଯ୍ଯ ଜାରି ରଖିଛନ୍ତି । ୧୨ ଫୁଟିଆ ପ୍ରଥମ ଭୂଇଁ ଓରା ଚଉପଟ ଓ ବିନ୍ଧ, ଭୂଇଁ ଖମ୍ବୀ ଚଉପଟ କରାଯାଇଥିଲା । ୧୧ଟି ସାଲଗୁଜ, ୨୪ଟି ତୀଖଗୁଜ, ୨୭ଟି ଜଳଯନ୍ତ୍ର, ୩୨ଟି କୁଡୁକା, ୧୨ଟି ଓରା, ପ୍ରଥମ ଭୂଇଁ ଖମ୍ବୀ ୧୨ଟି ନିର୍ମାଣ କରାଯାଇ ରଥଖଳାରେ ରଖାଯାଇଛି । ରଥ ନିର୍ମାଣର ଚବିଶତମ ଦିବସରେ ୧୪ ନାହାକା ଚଉପଟ କାମ ହୋଇଥିଲା । ଭୂଇଁ ଚଉତା, ବିନ୍ଧ କାମ, ପାଖୁଡା ବିନ୍ଧ, ପ୍ରଥମ ଭୂଇଁ, ଦ୍ବିତୀୟ ଭୂଇଁ ଆଗ ମୁହାଁଟ କାମ ଆଗେଇ ଚାଲିଛି । ଅଖ, କୁଟୁକା, ଗୟଳ, ନିରାଡିକୁ ମଜବୁତ କରି ବାନ୍ଧି ରଖିବ ୧୮ ଫୁଟିଆ ଯୋକା । ପ୍ରତି ରଥର ବ୍ରେକ ପାଇଁ ୪୦ ଫୁଟିଆ ବ୍ରେକ ଅଖ ଚଉପଟ କରାଯାଉଛି । ୪୦ ଫୁଟିଆ ଧଉରା କାଠରେ ଚାରି ନାହାକା ଗରଗରା, ପୋଲ ଗୟଳ କାମ ଆଗେଇ ଚାଲିଛି । ପଞ୍ଚଦଣ୍ଡା ଚଉପଟ ପାଇଁ କାଠ ସାଇତା ହେବା ପରେ ଚଉପଟ କାମ ଆରମ୍ଭ ହୋଇଥିଲା । ୧୪ ନାହାକାର ଚଉପଟ କାମ ଶେଷ ହୋଇଛି । ଏବେ ରୂପକାର ସେବକ ମାନେ ସିଂହାସନ ମୁହାଁଟ ଖୋଦେଇ କରୁଛନ୍ତି । ସାଲଗୁଜ ଖୋଦେଇ ଶେଷ ପର୍ଯ୍ଯାୟରେ ପହଞ୍ଚିଛି । ପ୍ରତି ରଥର ୮ଟି ଲେଖାଏଁ ନାଟ ଗୋଡରେ ଗନ୍ଧର୍ବ ରୂପ ଖୋଦେଇ ଆରମ୍ଭ ହୋଇଛି । ଶନିବାର ୩୧ ତମ ରଥନିର୍ମାଣ ଦିବସରେ ପୂର୍ବ କାମ ଜାରି ରହିଛି ।
ଦୋଳବେଦି ଅସ୍ଥାୟୀ କମାରଶାଳରେ ଦଣ୍ଡା ବାଡିଆ କଣ୍ଟା, ବିଡିଆ କଣ୍ଟା, ଗୟଳ କଣ୍ଟା ଓ ଗରଗର କଣ୍ଟା ନିର୍ମାଣ ଆଗେଇ ଚାଲିଛି । ରଥଖଳାରେ ମହାରଣା ସେବକ, ଭୋଇ ସେବକ, କରତୀ ସେବକ, ରୂପକାର ସେବକ, ତୁମ୍ବ ବିନ୍ଧ କାରୀଗର, ପାହି ମହାରଣା, ରଥଖଳା ସହାୟକ ଓ କମାର ସେବକ ରଥନିର୍ମାଣରେ ନିମଗ୍ନ ରହିଛନ୍ତି ।
ହିନ୍ଦୁସ୍ଥାନ ସମାଚାର / ବିଜୟ
