ନୂଆଦିଲ୍ଲୀ, ଜୁନ୍ ୨୭ (ହିସ)- ଉତରାଖଣ୍ଡ, ମହାରାଷ୍ଟ୍ର ଏବଂ ପଶ୍ଚିମବଙ୍ଗରେ ବିଜେପି ରାଜ୍ୟ ସଭାପତି ପରିବର୍ତନ ପାଇଁ କସରତ ତୀବ୍ର ହୋଇଛି। ବିଜେପି ଏହି ତିନୋଟି ରାଜ୍ୟ ପାଇଁ ନିର୍ବାଚନ ଅଧିକାରୀ ଘୋଷଣା କରିଛି। ଶୁକ୍ରବାର ଦିନ ବିଜେପି ସଂଗଠନ ନିର୍ବାଚନର ନିର୍ବାଚନ ଅଧିକାରୀ ଡକ୍ଟର କେ. ଲକ୍ଷ୍ମଣଙ୍କ ଦ୍ୱାରା ଏକ ଚିଠି ଜାରି କରାଯାଇଛି। ଏଥିରେ ମହାରାଷ୍ଟ୍ର, ପଶ୍ଚିମବଙ୍ଗ ଏବଂ ଉତରାଖଣ୍ଡର ରାଜ୍ୟ ସଭାପତି ଏବଂ ଜାତୀୟ ପରିଷଦର ସଦସ୍ୟଙ୍କ ନିର୍ବାଚନ ପାଇଁ ତିନି ଜଣ ନେତାଙ୍କୁ ବଡ଼ ଦାୟିତ୍ୱ ଦିଆଯାଇଛି। କେନ୍ଦ୍ରମନ୍ତ୍ରୀ ହର୍ଷ ମାଲହୋତ୍ରାଙ୍କୁ ଉତରାଖଣ୍ଡରେ ରାଜ୍ୟ ସଭାପତି ଏବଂ ଜାତୀୟ ପରିଷଦର ସଦସ୍ୟଙ୍କ ନିର୍ବାଚନର ଦାୟିତ୍ୱ ଦିଆଯାଇଛି। ମହାରାଷ୍ଟ୍ରର ଦାୟିତ୍ୱ କେନ୍ଦ୍ର କ୍ୟାବିନେଟ ମନ୍ତ୍ରୀ କିରଣ ରିଜିଜୁଙ୍କୁ ଦିଆଯାଇଛି। ପଶ୍ଚିମବଙ୍ଗର ଦାୟିତ୍ୱ ରବି ଶଙ୍କର ପ୍ରସାଦଙ୍କୁ ଦିଆଯାଇଛି। ଏହି ନିର୍ଦ୍ଦେଶ ତୁରନ୍ତ ପ୍ରଭାବରୁ କାର୍ଯ୍ୟକାରୀ ହେବ। ଉଲ୍ଲେଖନୀୟ ଯେ ମହେନ୍ଦ୍ର ଭଟ୍ଟ ବର୍ତମାନ ଉତରାଖଣ୍ଡରେ ବିଜେପିର ରାଜ୍ୟ ସଭାପତି ଅଛନ୍ତି। ଭଟ୍ଟଙ୍କ କାର୍ଯ୍ୟକାଳ ବହୁ ପୂର୍ବରୁ ଶେଷ ହୋଇଯାଇଛି। ଏବେ ସଂଗଠନ ରାଜ୍ୟରେ ରାଜ୍ୟ ସଭାପତି ନିର୍ବାଚନ କରି ଏକ ନୂତନ ମୁହଁକୁ ସୁଯୋଗ ଦେଇପାରେ। ଚନ୍ଦ୍ରଶେଖର ବାୱଙ୍କୁଲେ ହେଉଛନ୍ତି ମହାରାଷ୍ଟ୍ରର ବିଜେପି ରାଜ୍ୟ ସଭାପତି। ସେ ଅଗଷ୍ଟ ୨୦୨୨ରେ ମହାରାଷ୍ଟ୍ର ବିଜେପିର ସଭାପତି ହୋଇଥିଲେ। ବିଜେପି ଏବେ ଏକ ନୂତନ ମୁହଁ ଖୋଜୁଛି। ଡକ୍ଟର ସୁକାନ୍ତ ମଜୁମଦାର ବର୍ତମାନ ପଶ୍ଚିମବଙ୍ଗରେ ରାଜ୍ୟ ସଭାପତି ଅଛନ୍ତି।

-----------

---------------

ହିନ୍ଦୁସ୍ଥାନ ସମାଚାର / ଗଗନ