ବଲାଙ୍ଗିର, ୧ ଜୁଲାଇ (ହି.ସ.)- ବଲାଙ୍ଗୀର ଜିଲ୍ଲା ଆଗଲପୁର ବ୍ଲକ ପରିସର ନୂତନ ସଭାଗୃହରେ ଯୁଗ୍ମ ଅଭିଯୋଗ ଜନ ଶୁଣାଣି ଶିବିର ଅନୁଷ୍ଠିତ ହୋଇଯାଇଛି l ମୁଖ୍ୟଅତିଥି ଭାବେ ଜିଲ୍ଲାପାଲ ଗୌରବ ଶିବାଜି ଇସଲ୍ ୱାର, ଆରକ୍ଷୀ ଅଧିକ୍ଷକ ଅଭିଳାଷ ଜି, ଜିଲ୍ଲା ଉନ୍ନୟନ ଅଧିକାରୀ ପ୍ରଭାତ କୁମାର ମହାପାତ୍ର, ବ୍ଲକ ଅଧ୍ୟକ୍ଷା ଗୀତାଞ୍ଜଳି ଦାସ, ବିଡ଼ିଓ ମହାପାତ୍ର କୁଲଦୀପ ମହାନ୍ତି, ମଂଚାସୀନ ଅଧିକାରୀ ଭାବେ ଯୋଗ ଦେଇଥିଲେ । ବ୍ଲକ ଅଞ୍ଚଳର ୨୦ଟି ଗ୍ରାମପଞ୍ଚାୟତର ସରପଞ୍ଚ, ସମିତି ସଭ୍ୟ, ଜନସାଧାରଣ ବିଭିନ୍ନ ସମସ୍ୟା ଉପରେ ଅଭିଯୋଗ କରିଥିବା ବେଳେ ଏହାର ଶୁଣାଣି ଅତିଥି ମାନେ କରିଥିଲେ l ସର୍ବମୋଟ ୩୭ଟି ଅଭିଯୋଗର ଶୁଣାଣି ହୋଇଥିଲା । ମୁଖ୍ୟତଃ ବର୍ତ୍ତମାନ ଖରିଫ ଋତୁ ଯୋଗୁଁ ଚାଷ କାର୍ଯ୍ୟ ପାଇଁ କୃଷି, ଉଦ୍ୟାନ ଉପରେ ଧ୍ୟାନ ଦିଆଯାଇଥିଲା ଓ ଗତ ଗ୍ରୀଷ୍ମ ଋତୁରେ ପ୍ରତ୍ୟେକ ଗ୍ରାମରେ ଜମି ଉନ୍ନତିକରଣ, ମନରେଗା ଯୋଜନାରେ କାର୍ଯ୍ୟକୁ ତଦନ୍ତ କରାଯାଇଥିଲା l

ଶିକ୍ଷା, ସ୍ବାସ୍ଥ୍ୟ, ଗମନାଗମନ, ଆବାସ ଗୃହ, ଗୁହାଳ ନିର୍ମାଣ, ପୋଖରୀରେ ପାହାଚ ନିର୍ମାଣ, ଉଦ୍ୟାନ, ସରକାରଙ୍କ ଲୋକାଭିମୁଖୀ କାର୍ଯ୍ୟ, ସୁଭଦ୍ରା ଯୋଜନା ପ୍ରଭୃତି ଉପରେ ଆଲୋଚନା କରାଯାଇଥିଲା l ଏହିପରି ଜିଲ୍ଲାପାଳ ଆସିବାରେ ବିଳମ୍ବ ହେତୁ ସାଧାରଣରେ କିଛି ସମୟ ପାଇଁ ଅଶାନ୍ତି ଦେଖାଯାଇଥିଲା l ଜିଲ୍ଲାର ବିଭିନ୍ନ ବିଭାଗର ଅଧିକାରୀ ମାନେ ଉପସ୍ଥିତ ରହି ଶିବିରକୁ ସହଯୋଗ କରିବା ସହ ବ୍ଲକର ପ୍ରତ୍ୟେକ ବିଭାଗ କର୍ମଚାରୀ ମାନେ ସହଯୋଗ କରିଥିଲେ l

ହିନ୍ଦୁସ୍ଥାନ ସମାଚାର / ଗୋପବନ୍ଧୁ