ବଲାଙ୍ଗିର 30 ଜୁଲାଇ (ହି.ସ.) ପ୍ରଦେଶକଂଗ୍ରେସରେ ଭକ୍ତଚରଣ ଦାସ ପିସିସି ସଭାପତି ହେବାପରେ କିଛି ନୂଆଲୋକଙ୍କୁ ତାଙ୍କ ଟିମରେ ନେଇଛନ୍ତି । ସେଥିରେ ବଲାଙ୍ଗୀରର ବରିଷ୍ଠ ସାମ୍ବାଦିକ ତଥା ସଂଗଠକ ଅରବିନ୍ଦ ଦାସଙ୍କୁ ପ୍ରଦେଶକଂଗ୍ରେସର ମିଡିଆ,ପ୍ରଚାର ଓ ପ୍ରସାର କମିଟିର ଅଧ୍ୟକ୍ଷ ଦାୟୀତ୍ୱ ମିଳିଛି । ସେଥିପାଇଁ ବଲାଙ୍ଗୀରରେ ଲୋକଙ୍କ ମଧ୍ୟରେ ଉତ୍ସାହ ଦେଖାଦେଇଛି । ଆଜି ଅରବିନ୍ଦ ଦାସଙ୍କ ବଲାଙ୍ଗୀର ଗସ୍ତ ସମୟରେ ବଲାଙ୍ଗୀରରେ ତାଙ୍କୁ ବିଭିନ୍ନ ସଂଗଠନ ପକ୍ଷରୁ ନାଗରିକ ସମ୍ବର୍ଦ୍ଧନା ଦିଆଯାଇଛି । ସଂଧ୍ୟାରେ ସ୍ଥାନୀୟ ଜିଲ୍ଲା ସାମ୍ବାଦିକଭବନର ସଭାକକ୍ଷରେ ଆୟୋଜିତ ଏହି ସମ୍ବର୍ଦ୍ଧନା ସଭାରେ ସମାଜକର୍ମି ଅରୁଣ ମିଶ୍ରଙ୍କ ସଭାପତିତ୍ୱ କରିଥିବା ବେଳେ ଓ ହିମାନୀ ତ୍ରୀପାଠୀ ସଂଯୋଜନା କରିଥିଲେ । ଏଥିରେ ନାଗରିକ କମିଟିର ସଭାପତି ତଥା ସାଇଟ ଅନୁଷ୍ଠାନର ପ୍ରତିଷ୍ଠାତା ଡ.ଶ୍ରୀକର ମିଶ୍ର,ଖ୍ରୀଷ୍ଟିୟାନ କମ୍ୟୁନିଟିର ସଭାପତି ତଥା ସିସିଏଫଏର ସଭାପତି ଭଞ୍ଜକିଶୋର ନାଗ,ବରିଷ୍ଠ ଆଇନଜୀବି ରତନକୁମାର ମହାରଣା ପ୍ରମୁଖ ମଞ୍ଚାସୀନ ଥିଲେ । ଏହି ଅବସରରେ ଶ୍ରୀ ଦାସ ତାଙ୍କର ଅଶିଦଶକର ଛାତ୍ରରାଜନୀତିରୁ ଆରମ୍ଭ କରି ନବେ ଦଶକର ଅଧ୍ୟାପନା,ଦୁଇଦଶନ୍ଧିର ସାମ୍ବାଦିକତାର ଅଭିଜ୍ଞତା ବର୍ଣ୍ଣନା କରିଥିଲେ । ପୂର୍ବରୁ ବୃତ୍ତିରେ ଥାଇ ବଲାଙ୍ଗୀରର ଅନେକଗୁଡିଏ ସାମାଜିକ ଆନ୍ଦୋଳନ,ସମସ୍ୟା ତଥା ଅନୁଷ୍ଠାନର ବିକାଶରେ ସହଭାଗୀ ହୋଇଥିବା ଓ ଏବେ ସିଧାସଳଖ ରାଜନୀତିକୁ ଆସି ସାମାଜିକ ଜୀବନରେ ଲୋକଙ୍କ ସହିତ ମିଶି ଲୋକଙ୍କ ସମସ୍ୟାର ସମାଧାନରେ ସହଭାଗୀ ହେବାକୁ କହିଥିଲେ । ଠିକ ସେହିପରି ବଲାଙ୍ଗୀର ବିକାଶ ପାଇଁ ସେ ଆହ୍ୱାନ ଦେଇ ଜନସମସ୍ୟାର କିଭଳି ସମାଧାନ କରାଯାଇ ପାରିବ ସେନେଇ ଲୋକମାନଙ୍କ ସହଯୋଗ କାମନା କରିଥିଲେ । ଏହି କାର୍ଯ୍ୟକ୍ରମରେ ବଲାଙ୍ଗୀରର ବିଶିଷ୍ଟବ୍ୟକ୍ତି ବିଶେଷ ଶ୍ରୀ ଦାସଙ୍କ ବିଭିନ୍ନ କାର୍ଯ୍ୟକଳାପକୁ ପ୍ରଶଂସା କରିବା ସହିତ ତାଙ୍କର ରାଜନୈତିକ ଜୀବନର ସଫଳତା କାମନା କରିଥିଲେ । ବଲାଙ୍ଗୀର ନାଗରିକ କମିଟିର ଡ.ଶ୍ରୀକର ମିଶ୍ର,ବରିଷ୍ଠ ନାଗରିକ ମଞ୍ଚ ପ୍ରଭାକର ମିଶ୍ର ଓ କପିଳେଶ୍ୱର ଖମାରୀ,ସାଗୁଆ ବଲାଙ୍ଗୀରର ଅରୁଣ ମିଶ୍ର,ହିମାନୀ ତ୍ରୀପାଠୀ,ଅଜୟ ବାଲି,ବିଙ୍ଗହ୍ୟୁମେନ ଫାଉଣ୍ଡେସନର ସୋମନାଥ ମିଶ୍ର,ଜିଲ୍ଲା ଆଉଟସୋର୍ସିଂ କର୍ମଚାରୀସଂଘର ରାଜେଶ ଝାଙ୍କର ଓ ଦିଲିପ ସାହୁ,ଜିଲ୍ଲା କ୍ରୀଡାସଂସଦର ହରିନାରାୟଣ ପୂଜାହାରୀ,ମାଛବଜାରଛକ ମହାରାଜମଠ କମିଟିର ପ୍ରଦୀପ ମହାନ୍ତି,ଶଶିଶେଖର ପଣ୍ଡା,ରଜନୀ ସେଠ,ସହ ଯୋଗ ଫାଉଣ୍ଡେସନ ଅନୀଳ ମୋଦୀ,ରଚନା ଅନୁଷ୍ଠାନର ଭାଗୀରଥି ମିଶ୍ର,ପୂର୍ବତନ ସୈନିକସଂଘର ପ୍ରତାପ ରଥ ପ୍ରମୁଖଙ୍କ ସହ ଶତାଧିକ ସଂଗଠନ ଶ୍ରୀ ଦାସଙ୍କୁ ଫୁଲତୋଡା ଓ ଉପଢୌକନ ଦେଇ ସମ୍ବର୍ଦ୍ଧିତ କରିଥିଲେ ।
ହିନ୍ଦୁସ୍ଥାନ ସମାଚାର / ଗୋପବନ୍ଧୁ
