ଖୋର୍ଦ୍ଧା, ୦୫ ଜୁଲାଇ(ହି.ସ.) – ଦୀର୍ଘଦିନ ଅପେକ୍ଷାରେ ଅନ୍ତ ଘଟିଛି। ଭାରତ ସରକାରଙ୍କ ସଂସ୍କୃତି ମନ୍ତ୍ରାଳୟ ଅନ୍ତର୍ଗତ ଭାରତୀୟ ପ୍ରତ୍ନତତ୍ୱ ସର୍ବେକ୍ଷଣ ବିଭାଗ(ଏଏସଆଇ) ପକ୍ଷରୁ ବାଣପୁର ବଙ୍କାଡ଼ଗଡ଼ର ପ୍ରଭୁ ଶ୍ରୀ ସ୍ୱପ୍ନେଶ୍ୱର ମହାଦେବ ମନ୍ଦିରକୁ “ସୁରକ୍ଷିତ ସ୍ମାରକ” ଭାବରେ ଘୋଷଣା କରାଯାଇଛି। ଏନେଇ ଚିଲିକା ନିର୍ବାଚନ ମଣ୍ଡଳୀର ବିଧାୟକ ତଥା ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ସୂଚନା ଦେଇଛନ୍ତି। ଶ୍ରୀ ହରିଚନ୍ଦନ ସୋସିଆଲ ମିଡିଆରେ ଏହାର ସୂଚନା ଦେଇଛନ୍ତି। ଯାହାକୁ ନେଇ ଅଂଚଳବାସୀଙ୍କ ଖୁସିରେ ଲହରୀ ଖେଳିଯାଇଛି।ଆଇନ ମନ୍ତ୍ରୀ ଲେଖିଛନ୍ତି ଯେ, ”ମୋ ନିର୍ବାଚନ ମଣ୍ଡଳୀ ଅନ୍ତର୍ଗତ ଆମ ବୀର ଐତିହାସିକ ବାଣପୁର ମାଟିର ଗାରିମା କୀର୍ତିରାଜି ଆଜିକାଲିର ନୁହେଁ, ଏହାର ଇତିହାସ କିମ୍ୱଦନ୍ତୀ ସର୍ବ ପୁରାତନ। ଏହାର ଅନେକ ଉଦାହରଣ ରହିଛି ଆମ ଇତିହାସରେ। ଇତିମଧ୍ୟରୁ ଖ୍ରୀଷ୍ଟାବ୍ଦ ୬ଷ୍ଠ ଓ ୮ମ ଶତାବ୍ଦୀ ସମୟର ଶୈଳୋଦ୍ଭବ ରାଜବଂଶର ରାଜଧାନୀ ଥିବା ବଙ୍କାଡ ଗଡ ଯାହାକି ରହିଅଛି ଆଜିର ଆଧୁନିକ ବାଣପୁର ପଂଚାୟତ ସମିତି ଅନ୍ତର୍ଗତ ଦୁର୍ଭେଦ୍ୟ ଅପନ୍ତରା ସବୁଜିମା ଭରା ଜଙ୍ଗଲ ମଧ୍ୟରେ ବନବାସୀ ଅଧ୍ୟୁଷିତ ଅଂଚଳ ନିଳାଦ୍ରୀପ୍ରସାଦ ଗ୍ରାମରେ। ତତ୍କାଳୀନ ଉତ୍କଳୀୟ କଳା ଭାସ୍କର୍ଯ୍ୟର ପରାକାଷ୍ଠାର ପରିପକ୍ୱତା ସିଦ୍ଧ କରିବା ନିମିତ ତତ୍କାଳୀନ ରାଜା ମହାରାଜା ମାନେ ସମଗ୍ର ସାମ୍ରାଜ୍ୟରେ ଅନେକ କାରୁକାର୍ଯ୍ୟରେ ପରିପୂର୍ଣ୍ଣ ମନ୍ଦିର ନିର୍ମାଣ କରାଇଥିଲେ। ଏଥିମଧ୍ୟରୁ ଅନ୍ୟତମ ହେଉଛି ଆଶ୍ଚର୍ଯ୍ୟ କିର୍ତିରାଜି “ବଙ୍କାଡ଼ଗଡ଼ର ପ୍ରଭୁ ଶ୍ରୀ ସ୍ୱପ୍ନେଶ୍ୱର ମହାଦେବ ମନ୍ଦିର”। ଶ୍ରୀ ହରିଚନ୍ଦନ ଆହୁରୀ ଲେହିଛନ୍ତି ଯେ, “ଏହି ଐତିହାସିକ ସ୍ୱପ୍ନେଶ୍ୱର ମନ୍ଦିରକୁ ଭାରତ ସରକାରଙ୍କ ସଂସ୍କୃତି ମନ୍ତ୍ରାଳୟ ଅନ୍ତର୍ଗତ ଭାରତୀୟ ପ୍ରତ୍ନତତ୍ୱ ସର୍ବେକ୍ଷଣ ବିଭାଗ(ଏଏସଆଇ) ପକ୍ଷରୁ “ସୁରକ୍ଷିତ ସ୍ମାରକ” ଭାବରେ ଘୋଷଣା କରାଯାଇଥିବାରୁ ମାନନୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜୀ, ମାନନୀୟ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, କେନ୍ଦ୍ର ସଂସ୍କୃତି ମନ୍ତ୍ରୀ ଗଜେନ୍ଦ୍ର ସିଂହ ଶେଖ?ୱାତ୍ ଓ ପୂର୍ବତନ କେନ୍ଦ୍ର ସଂସ୍କୃତି ମନ୍ତ୍ରୀ ଜି.କିଶାନ ରେଡ୍ଡୀ ଙ୍କୁ ଆନ୍ତରିକ କୃତଜ୍ଞତା ଜ୍ଞାପନ କରିବା ସହ ଧନ୍ୟବାଦ୍ ଅର୍ପଣ କରୁଛି।”ଏହି ଘୋଷଣା ଓଡ଼ିଆ ଅସ୍ମିତା ଓ ପୁରାତନ ଐତିହ୍ୟ କୀର୍ତିରାଜିର ରକ୍ଷା କରିବା ପାଇଁ ସୂଚିତ କରୁଅଛି। ଏହି ମନ୍ଦିର ସ୍ଥାନୀୟ ଅଂଚଳରେ ଆଧ୍ୟାତ୍ମିକ ଚେତନା ଜାଗ୍ରତ କରିବା ସହ ଆମ ଐତିହ୍ୟର ଗାଥା ବହନ କରିଥାଏ।

୧୯୭୭-୭୮ ମସିହାରେ ସେତେବେଳ ସମୟରେ ରାଜ୍ୟ ସରକାରଙ୍କ ସଂସ୍କୃତି ମନ୍ତ୍ରୀ ବିଭାଗ ଦାୟିତ୍ୱରେ ଥିବା ସମୟରେ ବିଶ୍ୱଭୂଷଣ ହରିଚନ୍ଦନ ରାଜ୍ୟ ପ୍ରତ୍ନତତ୍ୱ ବିଭାଗକୁ ଦାୟିତ୍ୱ ଦେଇଥିଲେ। ପରବର୍ତୀ ସମୟରେ ଏହା ଅବହେଳିତ ଅବସ୍ଥାକୁ ଚାଲିଆସିଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜୀ ପ୍ରଧାନମନ୍ତ୍ରୀ ଦାୟିତ୍ୱ ଗ୍ରହଣ କରିବା ପରେ ଏଏସଆଇ ଏହାର ଦାୟିତ୍ୱ ବହନ ଗ୍ରହଣ କରିବା ପ୍ରକ୍ରିୟା କରାଇଥିଲେ। ୨୦୨୪ରେ ଓଡିଶାରେ ଡବଲ ଇଞ୍ଜିନ ସରକାର ଗଠିତ ହେବା ପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପ୍ରଚେଷ୍ଟାରେ ଏହି ପ୍ରକ୍ରିୟା ଦ୍ରୁତ ହୋଇ ବର୍ତମାନ ଏହାକୁ ସରକାରୀ ଭାବେ ଏଏସ୍‌ଆଇ ଦ୍ୱାରା ‘ସୁରକ୍ଷିତ ସ୍ମାରକ’ ଘୋଷଣା କରାଯାଇଛି।

ହିନ୍ଦୁସ୍ଥାନ ସମାଚାର/ରାକେଶ/ବୀଣାପାଣି

.......................................

ହିନ୍ଦୁସ୍ଥାନ ସମାଚାର / ରାକେଶ