ଭୁବନେଶ୍ୱର,୦୧ ଅଗଷ୍ଟ (ହି.ସ)- ପୂର୍ବତଟ ରେଳପଥ ଏହାର ଅଧୀନରେ ଥିବା ରେଳ ଷ୍ଟେସନ୍, ଟ୍ରେନ୍, ଅଫିସ୍, କର୍ମଶାଳା, ରକ୍ଷଣାବେକ୍ଷଣ ଡିପୋ, ଡାକ୍ତରଖାନା ଏବଂ ଆବାସିକ ଅଂଚଳରେ ସ୍ୱଚ୍ଛତା ଉପରେ ଧ୍ୟାନ ଦେଇ ଏକ ୧୫ ଦିନର ସ୍ୱଚ୍ଛତା ଅଭିଯାନ ଆରମ୍ଭ କରିଛି। ଏହି ବିଶାଳ ସ୍ୱଚ୍ଛତା ଅଭିଯାନ ସଚେତନତା ସୃଷ୍ଟି କରିବା ଏବଂ ଏକ ସ୍ୱଚ୍ଛ ଏବଂ ସବୁଜ ଭାରତ ବଜାୟ ରଖିବା ଦିଗରେ ସାମୂହିକ କାର୍ଯ୍ୟକୁ ପ୍ରେରଣା ଯୋଗାଇବା ପାଇଁ ସମର୍ପିତ କରାଯାଉଛି ।
ସ୍ୱଚ୍ଛତା ଅଭିଯାନର ଉଦ୍ଘାଟନୀ ଦିବସରେ ପୂର୍ବତଟ ରେଳପଥର ମହାପ୍ରବନ୍ଧକ ପରମେଶ୍ୱର ଫୁଙ୍କୱାଲ ସମସ୍ତ କର୍ମଚାରୀ ଏବଂ ଅଧିକାରୀଙ୍କୁ ସ୍ୱଚ୍ଛତା ଅଭିଯାନର ଶପଥ ପାଠ କରାଇଛନ୍ତି । ସ୍ୱଚ୍ଛତା ବଜାୟ ରଖିବାରେ ବ୍ୟକ୍ତିଗତ ଦାୟିତ୍ୱ ଉପରେ ଗୁରୁତ୍ୱାରୋପ କରାଯାଇଥିଲା ବେଳେ କର୍ମଚାରୀମାନେ ସେମାନଙ୍କ ଘର, କର୍ମସ୍ଥଳୀକୁ ପରିଷ୍କାର ରଖିବା ପାଇଁ ଶପଥ ନେଇଥିଲେ ଏବଂ ସାଧାରଣ ଜନତାଙ୍କୁ ଏହି ଅଭିଯାନରେ ସାମିଲ କରାଇବା ପାଇଁ ମଧ୍ୟ ଶପଥ ନେଇଥିଲେ।
ସ୍ୱଚ୍ଛତା ଅଭିଯାନର ଏକ ଅଂଶ ଭାବରେ, ରେଳ କର୍ମଚାରୀ, ରେଳଯାତ୍ରୀ ଏବଂ ହିତାଧିକାରୀମାନଙ୍କୁ ନିରନ୍ତର ପରିଷ୍କାର ପରିଚ୍ଛନ୍ନତା କାର୍ଯ୍ୟରେ ନିୟୋଜିତ କରିବା ଉପରେ ଗୁରୁତ୍ୱ ଦେଇ ପୂର୍ବତଟ ରେଳପଥ ଅନେକ ସ୍ୱଚ୍ଛତା କାର୍ଯ୍ୟକଳାପର ଯୋଜନା କରିଛି। ରେଳ ଷ୍ଟେସନ, ଟ୍ରେନ୍, ଅଫିସ୍, କର୍ମଶାଳା ଏବଂ ଆବାସିକ ଅଞ୍ଚଳରେ ସ୍ୱତନ୍ତ୍ର ଅଭିଯାନ ଚାଲିବ। ସଚେତନତା ସୃଷ୍ଟି କରିବା ପାଇଁ ପରିଷ୍କାର ପରିଚ୍ଛନ୍ନତା ଉପରେ ଚିତ୍ରାଙ୍କନ, ରଚନା ପ୍ରତିଯୋଗିତା ଅନୁଷ୍ଠିତ ହେବ। ଷ୍ଟେସନ ଏବଂ ଟ୍ରେନରେ ଅଳିଆ ଆବର୍ଜନାର ବିପଦ ବିଷୟରେ ସଚେତନତା ଅଭିଯାନ ହେବ। ଟ୍ରେନ୍ ମଧ୍ୟରେ ବିଶେଷ କରି କୋଚ୍, ଟଏଲେଟ୍ ବ୍ଲକ୍ ଏବଂ ପାଣ୍ଟ୍ରି କାରରେ ସ୍ୱଚ୍ଛତା ବଜାୟ ରଖିବା ଉପରେ ଧ୍ୟାନ ଦେବା । ଜଳ ଯୋଗାଣ ସ୍ଥାନ ମାନଙ୍କରେ ପରିଷ୍କାର ପରିଚ୍ଛନ୍ନତା, ପାନୀୟ ଜଳ ଟ୍ୟାପ୍ ଏବଂ ଷ୍ଟେସନଗୁଡିକରେ ଜଳ ଗୁଣବତା ଯାଂଚ ସହ ପରିବେଷିତ ଖାଦ୍ୟର ଗୁଣବତା, ଷ୍ଟେସନ ପରିସର ଏବଂ ସୁବିଧାଗୁଡ଼ିକର ସ୍ୱଚ୍ଛତା ଉପରେ ଯାତ୍ରୀଙ୍କ ମତାମତ ସଂଗ୍ରହ କରାଯିବ ।
ପୂର୍ବତଟ ରେଳପଥ କର୍ମଚାରୀଙ୍କ ଦ୍ୱାରା ନିଆଯାଇଥିବା ଶପଥ ମଧ୍ୟରେ କର୍ମଚାରୀମାନେ ପ୍ରତିବର୍ଷ ୧୦୦ ଘଣ୍ଟା ପରିଷ୍କାର ପରିଚ୍ଛନ୍ନତା ପ୍ରତି ଉତ୍ସର୍ଗ କରିବା ଏବଂ ଅତି କମରେ ୧୦୦ ଜଣ ବ୍ୟକ୍ତିଙ୍କୁ ମଧ୍ୟ ଏହା କରିବାକୁ ଉତ୍ସାହିତ କରିବା ପାଇଁ ଶପଥ ନେଇଛନ୍ତି । ଏହି ପଦକ୍ଷେପ ଏକ ସ୍ୱଚ୍ଛ ଭାରତ ପାଇଁ ମହାତ୍ମା ଗାନ୍ଧୀଙ୍କ ଆଦର୍ଶକୁ ପ୍ରତିଫଳିତ କରେ ।
ପୂର୍ବତଟ ରେଳପଥ ଏହାର ସମସ୍ତ ରେଳ ମଣ୍ଡଳ ଗୁଡିକରେ ସ୍ୱଚ୍ଛତା ହାସଲ କରିବାର ଲକ୍ଷ୍ୟ ପାଇଁ ପ୍ରତିସୃତିବଦ୍ଧ ଥିବାବେଳେ ଜନସମୂଦାୟଙ୍କର ବ୍ୟାପକ ଯୋଗଦାନକୁ ପ୍ରେରଣା ଦେବା ପାଇଁ ଲକ୍ଷ୍ୟ ରଖିଛି । ରେଳ ଯାତ୍ରୀ, ରେଳ ବ୍ୟବହାରକାରୀ ଏବଂ ସାଧାରଣ ଜନତାଙ୍କ ସହଯୋଗରେ ପୂର୍ବତଟ ରେଳପଥ ଏକ ପରିଷ୍କାର ଏବଂ ସ୍ୱାସ୍ଥ୍ୟକର ପରିବେଶ ମାର୍ଗକୁ ଆହୁରି ଅଧିକ ବୃଦ୍ଧି କରିଛି ।
---------------
ହିନ୍ଦୁସ୍ଥାନ ସମାଚାର / ବନ୍ଦନା