ଗଞ୍ଜାମ, ୩୧ ଅଗଷ୍ଟ (ହି.ସ.)- ଏକ ଆନ୍ତଃରାଜ୍ୟ ବାଘ ଛାଲ ଲୁଟେରା ଗ୍ୟାଙ୍ଗକୁ ଧରିବାରେ ସଫଳ ହୋଇଛି ବନ ବିଭାଗ । ବିକ୍ରି ହେବା ପୂର୍ବରୁ ଏକ କଲରାପତରିଆ ବାଘ ଛାଲ ସହ କାତି, ଭୁଜାଲି ଜବତ କରାଯାଇଛି । ଏଥିରେ ସମ୍ପୃକ୍ତି ଅଭିଯୋଗରେ ଜଣେ ଅବସରପ୍ରାପ୍ତ ପୁଲିସ କର୍ମଚାରୀଙ୍କ ସମେତ ମୋଟ୍ ୭ ଜଣକୁ ଗିରଫ କରାଯାଇଛି ।

ସୂଚନାନୁସାରେ, ଗଞ୍ଜାମ ଜିଲ୍ଲା ଭଞ୍ଜନଗର ଉତର ଘୁମୁସର ବନଖଣ୍ଡ ଅନ୍ତର୍ଗତ ଜଗନ୍ନାଥ ପ୍ରସାଦ ରେଞ୍ଜ ର ଗୁଣ୍ଡୁରିବାଡ଼ି ଗ୍ରାମରେ ଅତର୍କିତ ଚଢ଼ଉ କରି ବାଘ ଛାଲ ସହିତ ଭୁଜାଲି, କାତି ଜବତ କରିଛି ବନ ବିଭାଗର ସ୍ୱତନ୍ତ୍ର ଟିମ୍ । ମାମଲାରେ ୭ ଜଣଙ୍କୁ ଗିରଫ କରାଯାଇଛି । ତନ୍ମଧ୍ୟରୁ ୪ ଜଣ ଗଞ୍ଜାମ ଜିଲ୍ଲାର ହୋଇଥିବା ବେଳେ ୩ ଜଣ ଗଜପତି ଜିଲ୍ଲାର ବୋଲି ଜଣାପଡିଛି । ଗିରଫ ଅଭିଯୁକ୍ତଙ୍କ ମଧ୍ୟରେ ଜଣେ ଅବସରପ୍ରାପ୍ତ ପୁଲିସ କର୍ମଚାରୀ ରହିଥିବା ଡିଏଫଓ ହିମାଂଶୁ ଶେଖର ମହାନ୍ତି ସୂଚନା ଦେଇଛନ୍ତି । ଜବତ କଲରାପତରିଆ ବାଘ ଛାଲର ଲମ୍ବ ୭ ଫୁଟ୍ ହୋଇଥିବା ବେଳେ ଏହାର ଆନୁମାନିକ ମୂଲ୍ୟ ଲକ୍ଷାଧିକ ଟଙ୍କା ହେବ ବୋଲି ସେ କହିଛନ୍ତି ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ