ମୁଖୀଗୁଡା, ୩୧ ଅଗଷ୍ଟ (ହି.ସ.)- ମୁଖ୍ୟମନ୍ତ୍ରୀ କଳାହାଣ୍ଡି ଜିଲ୍ଲାର ଜୟପାଟଣାକୁ ଏନଏସି ଘୋଷଣା କରିବା ପରେ ଅଞ୍ଚଳର ଜନସାଧାରଣଙ୍କ ମଧ୍ୟରେ ଖୁସିର ଲହରି ଖେଳିଯାଇଛି। ରାଜ୍ୟ ସରକାରଙ୍କ ନିଷ୍ପତ୍ତିକୁ ସ୍ବାଗତ ଜଣାଇଛନ୍ତି ଜନତା। ବିଜେଡି ସରକାର ସମୟରେ ଜୟପାଟଣାକୁ ଏନଏସି ଘୋଷଣା କରାଯାଇଥିଲା। କିନ୍ତୁ, ସରକାର ବଦଳିବା ପରେ ଏବେ ନୂତନ ସରକାର ଏନଏସି ଘୋଷଣା କରିଛନ୍ତି। ଏଥି ପୂର୍ବରୁ ସରକାର ଘୋଷଣା କରିଥିବା ତାଲିକାରେ ଜୟପାଟଣା ବାଦ ପଡିଥିଲା ଫଳରେ ବିଜେଡି ତରଫରୁ ଜୟପାଟଣାର ସମସ୍ତ ଦୋକାନ ବଜାର ସରକାରୀ କାର୍ଯ୍ୟାଳୟ ବନ୍ଦ କରି ଦେଇ ଜୟପାଟଣାକୁ ଏନଏସି ଘୋଷଣା କରିବାକୁ ଦାବି କରିଥିଲେ । ଏବେ ଜୟପାଟଣାକୁ ଏନଏସି ଘୋଷଣା ବିକାଶ ପାଇଁ ନୂଆ ଆଶା ସଞ୍ଚାର କରିଛି। ହେଲେ ଲୋକଙ୍କ ମନରେ ଦ୍ଵନ୍ଦ ରହିଛି ଯେ, ପୂର୍ବ ସରକାର ବି ଘୋଷଣା କରିଥିଲେ ଏବେ ନୂଆ ସରକାର ବି ଘୋଷଣା କଲେ ହେଲେ କାର୍ଯ୍ୟକାରୀ ହେବ କେବେ ବୋଲି।

ଅନ୍ୟପକ୍ଷରେ ଜୟପାଟଣାକୁ ଏନଏସି ଘୋଷଣା ପରେ ବିଜେପି ଏବଂ ବିଜେଡି ନେତାଙ୍କ ଭିନ୍ନ ଭିନ୍ନ ମତ ପ୍ରକାଶ ପାଇଛି । କିଛି ବରିଷ୍ଠ ବିଜେପି ନେତା ସେମାନେ ମୁଖ୍ୟମନ୍ତ୍ରୀଙ୍କୁ ଦାବି ଜଣାଇବା ପରେ ଜୟପାଟଣାକୁ ଏନଏସି ଘୋଷଣା କରାଯାଇଛି ବୋଲି କହୁଥିବା ବେଳେ ବିଜେଡିର ନେତାମାନେ ସେମାନେ ଆନ୍ଦୋଳନ କରିବା ପରେ ସେମାନଙ୍କ ଦାବି ପୂରଣ ହୋଇଛି ବୋଲି କହୁଛନ୍ତି ।

ହିନ୍ଦୁସ୍ଥାନ ସମାଚାର / ନିହାର