ଧର୍ମଶାଳା, ୩୧ ଅଗଷ୍ଟ (ହି.ସ.) - ରବିବାର ସନ୍ଧ୍ୟାରେ ନଦୀ ବନ୍ଧ ଉପରେ ଛିଡା ହୋଇଥିବା ଏକ କାରକୁ ଧକ୍କା ଦେଲା ପଲସର ବାଇକ୍ । ଫଳରେ କାର ଭିତରେ ଥିବା ଚାଳକ ସମେତ ମୋଟ୍ ୪ ଜଣ ଏକ ବଡ ଦୁର୍ଘଟଣାରୁ ବର୍ତି ଯାଇଛନ୍ତି । ତେବେ ବାଇକ୍ ଚାଳକ ସାମାନ୍ୟ ଆହତ ହୋଇଥିବା ଜଣାପଡିଛି । ଏଭଳି ଘଟଣା ଦେଖିବାକୁ ମିଳିଛି ଯାଜପୁର ଜିଲା ବ୍ରହ୍ମବରଦା ଥାନା ଅନ୍ତର୍ଗତ ବ୍ରାହ୍ମଣୀ ନଦୀ ବନ୍ଧ ରାସ୍ତା ଖଣ୍ଡାସ ନିକଟରେ । ସନ୍ଧ୍ୟାରେ ଝାଲପଡା ଅଂଚଳରୁ ଏକ ହୁଣ୍ଡାଇ କାର ନମ୍ବର (ଓଡି୦୨ଏପି୧୮୫୭) ବାଲିଚନ୍ଦ୍ରପୁର ଅଂଚଳକୁ ଆସୁଥିବା ବେଳେ ବିପରୀତ ଦିଗରୁ ଏକ ଟ୍ରାକ୍ଟର ଆସୁଥିବାରୁ କାର ଚାଳକ ରାସ୍ତା କଡରେ ଛିଡା କରାଇ ଥିଲେ । ସେହି ସମୟରେ ଟ୍ରାକ୍ଟରଟିକୁ ଓଭର ଟେକ୍ କରି ଦୃତ ଗତିରେ ଆସୁଥିବା ଏକ କଳା ରଂଗର ପଲସର ବାଇକ୍‌ ନମ୍ବର(ଓଡି୩୪କେ୪୮୧୫) କାରକୁ ଧକ୍କା ଦେଇଥିଲା । ଫଳରେ କାର ସମ୍ମୁଖ ଭାଙ୍ଗି ଯାଇଥିବା ବେଳେ ଭିତରେ ଥିବା ଚାଳକ ସମେତ ମୋଟ ୪ ଜଣ ଏକ ବଡ ଦୁର୍ଘଟଣାରୁ ବର୍ତି ଯାଇଥିବା ବେଳେ ବାଇକ ଚାଳକ ସାମାନ୍ୟ ଆହତ ହୋଇଥିଲେ । ସ୍ଥାନୀୟ ଲୋକେ ଘଟଣାସ୍ଥଳରେ ପଂହଚି ସେମାନଙ୍କୁ ଉଦ୍ଧାର କରିଥିଲେ ।

ହିନ୍ଦୁସ୍ଥାନ ସମାଚାର / ଚିନ୍ମୟ