ଧର୍ମଶାଳା, ୩୧ଅଗଷ୍ଟ (ହି.ସ.)- ଦୀର୍ଘ ଦିନର ଅପେକ୍ଷାର ଅନ୍ତ ଘଟିଲା । ଏନ୍‌ଏସି ପାଇଁ ଅଂଚଳବାସୀଙ୍କ ବହୁ ବର୍ଷରୁ ଦାବି ହୋଇ ଆସୁଥିଲା । ରାଜ୍ୟ ସ୍ତରୀୟ ସ୍ୱାୟତ ଶାସନ ଦିବସ ଅବସରରେ ଆଜି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବଡ ଘୋଷଣା କରିଛନ୍ତି । ରାଜ୍ୟରେ ୭ଟି ପୌରପାଳିକା ଓ ୧୬ଟି ବିଜ୍ଞାପିତ ଅଂଚଳ ପରିଷଦ (ଏନ୍‌ଏସି) ଗଠିତ ହୋଇଛି । ଏହି କ୍ରମରେ ଯାଜପୁର ଜିଲାର ଚଣ୍ଡିଖୋଲକୁ ଏନ୍‌ଏସି ଘୋଷଣା ହେବା ଖବର ପ୍ରଚାରିତ ହେବା ପରେ ସ୍ଥାନୀୟ ଅଂଚଳରେ ଅଦିନିଆ ହୋଲି ପାଳିତ ହୋଇଥିବା ଦେଖିବାକୁ ମିଳିଛି । ତିନୋଟି ଜାତୀୟ ରାଜପଥ ସଂଗମସ୍ଥଳ ଓ ସହରୀକରଣ ପାଇଁ ସମସ୍ତ ମାପ ଦଣ୍ଡ ଥାଇ ଦୀର୍ଘ ଦିନ ହେବ ଏନ୍‌ଏସିର ମାନ୍ୟତା ମିଳି ପାରି ନ ଥିଲା । ସରକାର ବଦଳିବା ପରେ ନିକଟରେ ସରକାର ନୂଆ ଏନ୍‌ଏସି ଘୋଷଣା କରିଥିଲେ । ସେଥିରୁ ଚଣ୍ଡିଖୋଲ ବାଦ ପଡିଥିଲା । ଯାହାକୁ ନେଇ ଗତ ସପ୍ତାହରେ ବିଜୁ ଜନତା ଦଳ ପକ୍ଷରୁ ଏନ୍‌ଏସି ଦାବି ପାଇଁ ଆନ୍ଦୋଳନକୁ ଓହ୍ଲାଇ ଥିଲା । ଏବଂ ୧୫ ଦିନ ଭିତରେ ଏନ୍‌ଏସି ଘୋଷଣା ନ ହେଲେ ରାଜପଥକୁ ସମ୍ପୂର୍ଣ୍ଣଭାବେ ବନ୍ଦ କରିବାକୁ ଚେତାବନୀ ଦେଇଥିଲେ । ତେବେ ଆଜି ଏନଏସି ଘୋଷଣା ହେବା ପରେ ବିଜେପି ଜିଲା ସଭାନେତ୍ରୀ ଦେବଯାନୀ ପ୍ରଧାନ, ସମ୍ପାଦକ ପ୍ରମୋଦ କୁମାର ଜେନା, ମଣ୍ଡଳ ସଭାପତି ବିମଳ ପ୍ରସନ୍ନ ପ୍ରଧାନ, ଜିଲା ପରିଷଦ ସଭ୍ୟ ଯତିନ୍ଦ୍ର ନାୟକ, ସରପଂଚ ଅଞ୍ଜୁଲତା ସ୍ୱାଇଁ, ରଂଜନ କୁମାର ଦାସ,ନଦଦ୍ୱୀପ ନାୟକ, ଯଯାତି କେଶରୀ ରାଉତ, ରବିନ୍ଦ୍ର ରାଉତ, ପ୍ରୀତମ ନାୟକ, ଅକ୍ଷୟ ସ୍ୱାଇଁ, ସୁବ୍ରତ ନାୟକ, ଅଭୟ ତରାଇ, ପ୍ରକାଶ ସାହୁ, ବିଜୟ ଦାସ, ପ୍ରଶାନ୍ତ ଦାସ, କ୍ରୀତିରାଜ ସ୍ୱାଇଁ, ସ୍ମୃତି ରଂଜନ ଜେନା ଓ ଲିଗୁନ ସେନାପତିଙ୍କ ସମେତ ଶତାଧିକ ଭାଜାପା କର୍ମୀ ଚଣ୍ଡିଖୋଲ ଛକ ଠାରେ ଏକତ୍ର ହୋଇ ବାଜାବାଣ ଓ ଅବିର ଖେଳି ଖୁସି ମନାଇବା ସହିତ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ନଗର ଉନ୍ନୟନ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର ଓ ବଡଚଣା ବିଧାୟକ ଅମର ନାୟକଙ୍କୁ କୃତଜ୍ଞତା ଜଣାଇ ଥିଲେ ।

ହିନ୍ଦୁସ୍ଥାନ ସମାଚାର / ଚିନ୍ମୟ