ଭବାନୀପାଟଣା, ୨୭ ସେପ୍ଟେମ୍ବର (ହି.ସ.)- ସୁନ୍ଦରଗଡରେ ଅନୁଷ୍ଠିତ ରାଜ୍ୟସ୍ତରୀୟ ତୀରନ୍ଦାଜ ପ୍ରତିଯୋଗିତାରେ କଳାହାଣ୍ଡି ଜିଲ୍ଲାର ଛାତ୍ରଛାତ୍ରୀ ଶ୍ରେଷ୍ଠ ପ୍ରଦର୍ଶନ କରି ୮ଗୋଟି ସ୍ଵର୍ଣ୍ଣ, ୩ ଗୋଟି ରୋପ୍ୟ, ଗୋଟିଏ କାଂସ୍ୟ ପଦକ ହାସଲ ଜିଲ୍ଲା ପାଇଁ ଗୌରବ ଆଣିଛନ୍ତି। ଏଥିରେ ଲାଞ୍ଜିଗଡ଼ ଉଚ୍ଚ ବିଦ୍ୟାଳୟର ତରୁଣ କୁମାର ମାଝୀ ତିନୋଟି ସ୍ଵର୍ଣ୍ଣ ପଦକ, ଲୀନ ମାଝୀ ତିନୋଟି ସ୍ଵର୍ଣ୍ଣ ପଦକ, ରୋହିତ କୁମାର ମାଝୀ ତିନୋଟି ରୋପ୍ୟ, ଗାୟତ୍ରୀ ମାଝୀ ଦୁଇଟି ସ୍ଵର୍ଣ୍ଣ, ଗୋଟିଏ କାଂସ୍ୟ ପଦକ ହାସଲ କରି କଳାହାଣ୍ଡି ଜିଲ୍ଲା ପାଇଁ ଗୌରବ ଆଣିଛନ୍ତି। ଗତକାଲି ଜିଲ୍ଲା ପ୍ରଶାସନ ତରଫରୁ ଜିଲ୍ଲାପାଳଙ୍କ ଆବାସିକ କାର୍ଯ୍ଯାଳୟରେ ଅନୁଷ୍ଠିତ ସମ୍ବର୍ଦ୍ଧନା ଉତ୍ସବରେ ଜିଲ୍ଲାପାଳ ପାୱାର ସଚିନ ପ୍ରକାଶ ସମସ୍ତଙ୍କୁ ଉତ୍ସାହିତ କରିବା ସହିତ ସମ୍ବର୍ଦ୍ଧିତ କରି ପୁରସ୍କାର ସ୍ଵରୂପ ପ୍ରତି ସ୍ଵର୍ଣ୍ଣ ପଦକ ବିଜେତାଙ୍କୁ ଏକ ହଜାର, ରୋପ୍ୟ ପଦକ ବିଜେତାଙ୍କୁ ପାଞ୍ଚଶହ ଟଙ୍କା ପ୍ରଦାନ କରି ସମସ୍ତ ପଦକ ବିଜେତାଙ୍କୁ ଉତ୍ସାହିତ କରିବା ସହିତ ସମସ୍ତଙ୍କର ଉଜ୍ଜ୍ଵଳ ଭବିଷ୍ୟତ କାମନା କରିଥିଲେ। ଏହି କାର୍ଯ୍ୟକ୍ରମରେ ଜିଲ୍ଲା ଶିକ୍ଷା ଅଧିକାରୀ ରାଧାକାନ୍ତ ଛତ୍ରୀ, ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ହଳଧର ନିଆଲ, ଜିଲ୍ଲା ଶାରୀରିକ ଶିକ୍ଷା ଅଧିକାରୀ ରୂପସୀଙ୍ଗ ରାଉତ, ଜିଲ୍ଲା ଶିକ୍ଷା ବିଭାଗ ର ଅଧିକାରୀ ପ୍ରମୁଖ ଯୋଗଦେଇ ଥିଲେ।
ହିନ୍ଦୁସ୍ଥାନ ସମାଚାର / ଜୟକୃଷ୍ଣ
