ନୂଆଦିଲ୍ଲୀ, ୧୬ ଜାନୁଆରୀ (ହି.ସ.)- ଭାରତୀୟ ଜନତା ପାର୍ଟି (ବିଜେପି) ଜାନୁଆରୀ ୨୦ ତାରିଖରେ ତା’ର ନୂତନ ରାଷ୍ଟ୍ରୀୟ ଅଧ୍ୟକ୍ଷ ନିର୍ବାଚିତ କରିବ । ଦଳ ଶୁକ୍ରବାର ଏଠାରେ ଜାତୀୟ ସଭାପତି ନିର୍ବାଚନ ପାଇଁ ପ୍ରକ୍ରିୟାର ଆନୁଷ୍ଠାନିକ ଘୋଷଣା କରି କହିଛି ଯେ, ବିଜେପିର ସଂଗଠନ ପର୍ବ ୨୦୨୪ ଅନ୍ତର୍ଗତ ପାର୍ଟିର ରାଷ୍ଟ୍ରୀୟ ଅଧ୍ୟକ୍ଷ ନିର୍ବାଚନ ପାଇଁ ନାମାଙ୍କନ ଜାନୁଆରୀ ୧୯ ତାରିଖରେ ହେବ ଏବଂ ଜାନୁଆରୀ ୨୦ ରେ ଅଧ୍ୟକ୍ଷଙ୍କ ନାମ ଆନୁଷ୍ଠାନିକ ଭାବେ ଘୋଷଣା କରାଯିବ ।
ବିଜେପି ଜାତୀୟ ନିର୍ବାଚନ ଅଧିକାରୀ ଏବଂ ରାଜ୍ୟସଭା ସାଂସଦ ଡଃ. କେ. ଲକ୍ଷ୍ମଣଙ୍କ ଦ୍ୱାରା ପ୍ରକାଶିତ କାର୍ଯ୍ୟସୂଚୀ ଅନୁଯାୟୀ, ସମ୍ପୂର୍ଣ୍ଣ ପ୍ରକ୍ରିୟା ଦଳର କେନ୍ଦ୍ରୀୟ କାର୍ଯ୍ୟାଳୟ, ୬-ଏ, ଦୀନଦୟାଲ ଉପାଧ୍ୟାୟ ମାର୍ଗ, ନୂଆଦିଲ୍ଲୀରେ ଅନୁଷ୍ଠିତ ହେବ । ନିର୍ବାଚନ କାର୍ଯ୍ୟସୂଚୀ ଅନୁଯାୟୀ, ଜାତୀୟ ନିର୍ବାଚନ ବୋର୍ଡ ତାଲିକା ଜାନୁଆରୀ ୧୬, ଶୁକ୍ରବାର ଦିନ ମଧ୍ୟାହ୍ନ ୧୨ ଟାରେ ପ୍ରକାଶିତ ହେବ । ଏହାପରେ ଜାନୁଆରୀ ୧୯ ତାରିଖ ସୋମବାର ଦିନ ନାମାଙ୍କନ ଦାଖଲ କରାଯିବ । ସେହି ଦିନ ଅପରାହ୍ନ ୨ଟାରୁ ୪ଟା ପର୍ଯ୍ୟନ୍ତ ନାମାଙ୍କନ ଦାଖଲ, ଅପରାହ୍ନ ୪ଟାରୁ ୫ଟା ପର୍ଯ୍ୟନ୍ତ ଯାଂଚ୍ ଏବଂ ସନ୍ଧ୍ୟା ୫ଟାରୁ ୬ଟା ପର୍ଯ୍ୟନ୍ତ ପ୍ରାର୍ଥୀପତ୍ର ପ୍ରତ୍ୟାହାର କରାଯାଇପାରିବ । ନାମାଙ୍କନ ପ୍ରକ୍ରିୟା ସମାପ୍ତ ହେବା ପରେ, ଜାତୀୟ ନିର୍ବାଚନ ଅଧିକାରୀଙ୍କ ଦ୍ୱାରା ସନ୍ଧ୍ୟା ୬ଟା ୩୦ ରେ ଏକ ପ୍ରେସ୍ ବିବୃତି ଜାରି କରାଯିବ ।
କାର୍ଯ୍ୟସୂଚୀ ଅନୁଯାୟୀ, ଜାନୁଆରୀ ୨୦ ତାରିଖ ମଙ୍ଗଳବାର ଦିନ ପୂର୍ବାହ୍ନ ୧୧ଟା ୩୦ରୁ ଅପରାହ୍ନ ୧ଟା ୩୦ ପର୍ଯ୍ୟନ୍ତ ମତଦାନ ଅନୁଷ୍ଠିତ ହେବ । ଏହାପରେ ନୂତନ ବିଜେପି ରାଷ୍ଟ୍ରୀୟ ଅଧ୍ୟକ୍ଷଙ୍କ ନାମ ଆନୁଷ୍ଠାନିକ ଭାବରେ ଘୋଷଣା କରାଯିବ ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ
