ନୂଆଦିଲ୍ଲୀ, ୧୩ ଅକ୍ଟୋବର (ହି.ସ.)। ସୂଚନା ଓ ପ୍ରସାରଣ ତଥା ସଂସଦୀୟ ବ୍ୟାପାର ରାଷ୍ଟ୍ରମନ୍ତ୍ରୀ ଡ. ଏଲ୍. ମୁରୁଗନ୍ ମନ୍ତ୍ରିପରିଷଦ ଏବଂ ରାଜ୍ୟସଭାରୁ ଇସ୍ତଫା ଦେବାକୁ ଘୋଷଣା କରିଛନ୍ତି। ଏ ସମ୍ପର୍କରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପତ୍ର ଲେଖିଥିବା ବେଳେ ଏହାକୁ ସୋସିଆଲ୍ ମିଡିଆରେ ମଧ୍ୟ ସେୟାର କରିଛନ୍ତି।

ନିଜ ପୋଷ୍ଟରେ ମୁରୁଗନ୍ କହିଛନ୍ତି ଯେ ତାମିଲନାଡୁର ଏକ ଗାଁରେ ଜଣେ ଦିନମଜୁରିଆଙ୍କ ପୁଅ ଭାବେ ଜନ୍ମ ନେଇ କେନ୍ଦ୍ରମନ୍ତ୍ରୀ ହେବା ତାଙ୍କ ଜୀବନର ସବୁଠାରୁ ବଡ଼ ସୌଭାଗ୍ୟ। ଏବେ ସେ ନିଜର ସମସ୍ତ ସମୟ ତାମିଲନାଡୁରେ ବିଜେପି ସଂଗଠନ ଓ କାର୍ଯ୍ୟକର୍ତ୍ତାଙ୍କୁ ମଜଭୁତ କରିବାରେ ନିୟୋଜିତ କରିବେ। ବିଶେଷକରି ୨୦୨୯ ଲୋକସଭା ନିର୍ବାଚନ ପାଇଁ ସେ ଦଳୀୟ ସଂଗଠନକୁ ସୁଦୃଢ଼ କରିବା ଉପରେ ଧ୍ୟାନ ଦେବେ।

ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱକୁ ନିଜର ରାଜନୈତିକ ଯାତ୍ରାର ଶ୍ରେୟ ଦେଇ ମୁରୁଗନ୍ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି) ଏବଂ ବିଜେପି ସହ ନିଜର ଦୀର୍ଘଦିନର ସମ୍ପର୍କ ବିଷୟରେ ଉଲ୍ଲେଖ କରିଛନ୍ତି।

ସେ କହିଛନ୍ତି, “ମୁଁ ଏବେ ପୁଣି ତୃଣମୂଳ ସ୍ତରକୁ ଫେରିବାକୁ ଚାହୁଁଛି। ନିଜ କାର୍ଯ୍ୟକର୍ତ୍ତାଙ୍କ ସହ ରହି ୨୦୨୯ ଲୋକସଭା ନିର୍ବାଚନ ପୂର୍ବରୁ ତାମିଲନାଡୁରେ ବିଜେପିକୁ ମଜଭୁତ କରିବା ପାଇଁ ନିଜର ସମସ୍ତ ସମୟ ସମର୍ପଣ କରିବାକୁ ଚାହୁଁଛି।”

ଉଲ୍ଲେଖଯୋଗ୍ୟ, ମୁରୁଗନ୍ ମଧ୍ୟପ୍ରଦେଶରୁ ରାଜ୍ୟସଭା ସଦସ୍ୟ ରହିଛନ୍ତି ଏବଂ ତାଙ୍କର କାର୍ଯ୍ୟକାଳ ୨୦୩୦ରେ ଶେଷ ହେବାର ଥିଲା। ୨୦୨୧ରେ ପ୍ରଧାନମନ୍ତ୍ରୀ ମୋଦୀଙ୍କ ମନ୍ତ୍ରିପରିଷଦରେ ସେ ରାଷ୍ଟ୍ରମନ୍ତ୍ରୀ ଭାବେ ସାମିଲ ହୋଇଥିଲେ। ୨୦୨୪ରେ ମୋଦୀ ସରକାରଙ୍କ ତୃତୀୟ ପାଳିରେ ମଧ୍ୟ ସେ ଏହି ଦାୟିତ୍ୱରେ ରହିଥିଲେ।

ହିନ୍ଦୁସ୍ଥାନ ସମାଚାର / ସମନ୍ୱୟ