ଇସଲାମାବାଦ, ୧୩ ଅକ୍ଟୋବର (ହି.ସ.)। ପାକିସ୍ତାନର ପଞ୍ଜାବ ପ୍ରଦେଶର ମୁଲତାନରେ ମଙ୍ଗଳବାର ଭୋର୍ରେ ଘଟିଥିବା ରେଳ ଦୁର୍ଘଟଣାରେ ଅନେକ ଲୋକଙ୍କ ମୃତ୍ୟୁ ହୋଇଛି। ପୁଲିସ ଓ ଉଦ୍ଧାରକାରୀ ଅଧିକାରୀମାନେ ନିଶ୍ଚିତ କରିଛନ୍ତି ଯେ, ମୁଲତାନର ଶେର ଶାହ ବ୍ରିଜ୍ ନିକଟରେ ରହମାନ ବାବା ଏକ୍ସପ୍ରେସ୍ ଲାଇନଚ୍ୟୁତ ହେବା ଫଳରେ ଅତି କମ୍ରେ ୬ ଜଣ ଯାତ୍ରୀଙ୍କ ମୃତ୍ୟୁ ହୋଇଥିବାବେଳେ ଅନ୍ୟ ୩୦ ଜଣ ଆହତ ହୋଇଛନ୍ତି। ଜଣେ ଅଧିକାରୀ କହିଛନ୍ତି ଯେ, ଏହି ଟ୍ରେନ୍ର ସମସ୍ତ ୧୪ଟି ବଗି ଲାଇନଚ୍ୟୁତ ହୋଇଛି।

‘ଦି ନ୍ୟୁଜ୍’ର ରିପୋର୍ଟ ଅନୁଯାୟୀ, ଆହତମାନଙ୍କୁ ମୁଲତାନର ନିଶ୍ତାର ହସ୍ପିଟାଲକୁ ନିଆଯାଇଛି। ଉଦ୍ଧାରକାରୀ ଦଳ ଦୁର୍ଘଟଣାସ୍ଥଳରେ ଉପସ୍ଥିତ ଅଛନ୍ତି। ଜଣେ ଯାତ୍ରୀଙ୍କ କହିବା ଅନୁଯାୟୀ, ସକାଳ ପ୍ରାୟ ୫ଟା ୧୫ ମିନିଟ୍ରେ ଏହି ଦୁର୍ଘଟଣା ଘଟିଥିଲା। ପୁଲିସର ପ୍ରାରମ୍ଭିକ ସୂଚନା ଅନୁଯାୟୀ, ଟ୍ରେନ୍ଟି କରାଚୀରୁ ପେଶାୱାର ଯାଉଥିଲା। ଉଦ୍ଧାରକାରୀ ଅଧିକାରୀମାନେ କହିଛନ୍ତି ଯେ, ୧୩ଟି ବଗିରେ ତଲାସୀ ଶେଷ ହୋଇଛି। ଗୋଟିଏ ବଗିରେ ଏବେ ମଧ୍ୟ ଉଦ୍ଧାର କାର୍ଯ୍ୟ ଜାରି ରହିଛି।

ଜଣେ ଯାତ୍ରୀ ସାମ୍ବାଦିକମାନଙ୍କୁ କହିଛନ୍ତି ଯେ, ଦୁର୍ଘଟଣା ପୂର୍ବରୁ ରୋହରୀ ନିକଟରେ ରେଳ କର୍ମଚାରୀମାନେ ନବମ ବଗିର ନଟ୍-ବୋଲ୍ଟ କଷିଥିଲେ। ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ସରିଫ ଏହି ଘଟଣା ଉପରେ ଧ୍ୟାନ ଦେବା ସହ ଦୁର୍ଘଟଣାରେ ଆହତ ଯାତ୍ରୀମାନଙ୍କ ପ୍ରତି ଚିନ୍ତା ପ୍ରକାଶ କରିଛନ୍ତି। ଉଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରିବା ଏବଂ ଆହତମାନଙ୍କୁ ବିନା ବିଳମ୍ବରେ ସର୍ବୋତ୍ତମ ସମ୍ଭାବ୍ୟ ଚିକିତ୍ସା ଯୋଗାଇଦେବାକୁ ସୁନିଶ୍ଚିତ କରିବା ପାଇଁ ସେ ସମ୍ପୃକ୍ତ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।

ଏକ୍ସପ୍ରେସ୍ ଟ୍ରେନ୍ଟି ଲାଇନଚ୍ୟୁତ ହେବାର କାରଣ ଏପର୍ଯ୍ୟନ୍ତ ଆନୁଷ୍ଠାନିକ ଭାବେ ଜଣାପଡ଼ିନାହିଁ। ଉଦ୍ଧାର କାର୍ଯ୍ୟ ଆଗକୁ ବଢ଼ିବା ସହ ପାକିସ୍ତାନ ରେଳବାଇ ଏବଂ ସମ୍ପୃକ୍ତ ଅଧିକାରୀମାନେ ଏ ସମ୍ପର୍କରେ ଅଧିକ ସୂଚନା ଦେବେ ବୋଲି ଆଶା କରାଯାଉଛି।

ଏହା ପୂର୍ବରୁ, ୨୦୨୩ ଅଗଷ୍ଟରେ ସିନ୍ଧ ପ୍ରଦେଶର ନୱାବଶାହ ନିକଟରେ ହଜାରା ଏକ୍ସପ୍ରେସ୍ ଲାଇନଚ୍ୟୁତ ହେବା ଫଳରେ ଅତି କମ୍ରେ ୩୦ ଜଣଙ୍କ ମୃତ୍ୟୁ ହୋଇଥିଲା ଏବଂ ୧୦୦ରୁ ଅଧିକ ଲୋକ ଆହତ ହୋଇଥିଲେ।

ହିନ୍ଦୁସ୍ଥାନ ସମାଚାର / ସ୍ୱାଗତିକା