ଗାଧୁଆ ତୁଠରେ ଲଟାବୁଦା, ଦୁର୍ଘଟଣା ଓ ସ୍ୱାସ୍ଥ୍ୟ ସମସ୍ୟାର ଆଶଙ୍କା; ତୁରନ୍ତ ସଫେଇ ଦାବି

ଝାରସୁଗୁଡ଼ା, ୧୭ ଅକ୍ଟୋବର (ହି.ସ.) ଜନସାଧାରଣଙ୍କ ଦୈନନ୍ଦିନ ଆବଶ୍ୟକତା ସହ ଜଡ଼ିତ ଜଳାଶୟର ସୁରକ୍ଷା ଓ ସ୍ୱଚ୍ଛତା ପ୍ରତି ପ୍ରଶାସନର ଅବହେଳା ଏବେ ସ୍ଥାନୀୟ ବାସିନ୍ଦାଙ୍କ ପାଇଁ ସମସ୍ୟା ସୃଷ୍ଟି କରିଛି। ଝାରସୁଗୁଡ଼ା ସହରର ଭୁଲିଆପଡ଼ାଠାରେ ଥିବା ପୋଖରୀଟି ଦୀର୍ଘଦିନ ଧରି ସଫେଇ ଓ ରକ୍ଷଣାବେକ୍ଷଣ ଅଭାବରୁ ଅପରିଷ୍କାର ହୋଇପଡ଼ିଥିବା ଅଭିଯୋଗ ହୋଇଛି। ପୋଖରୀରେ ଅନାବନା ଘାସ, ଦଳ ଓ ଲଟାବୁଦା ବଢ଼ିବା ସହ ଜଳ ପ୍ରଦୂଷିତ ହେବାକୁ ଲାଗିଛି। ଏହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ବଢ଼ୁଛି।

ଭୁଲିଆପଡ଼ା, ବଢ଼େଇମୁଣ୍ଡା ଓ କାଳୀ ମନ୍ଦିର ଅଞ୍ଚଳର ଶହ ଶହ ମହିଳା ଓ ପୁରୁଷ ପ୍ରତିଦିନ ଗାଧୋଇବା ସମେତ ବିଭିନ୍ନ ନିତ୍ୟକର୍ମ ପାଇଁ ଏହି ପୋଖରୀ ଉପରେ ନିର୍ଭର କରନ୍ତି। ମାତ୍ର ପୋଖରୀର ଦୁରବସ୍ଥା ଯୋଗୁଁ ସେମାନଙ୍କୁ ନାନା ସମସ୍ୟାର ସାମ୍ନା କରିବାକୁ ପଡ଼ୁଛି। ବିଶେଷକରି ଜଳର ସ୍ୱଚ୍ଛତା ନେଇ ପ୍ରଶ୍ନ ଉଠିଥିବାରୁ ଏହା ଜନସ୍ୱାସ୍ଥ୍ୟ ପାଇଁ ମଧ୍ୟ ଚିନ୍ତାର କାରଣ ପାଲଟିଛି।

ପୋଖରୀର ଗାଧୁଆ ତୁଠଗୁଡ଼ିକର ପାହାଚ ଘଞ୍ଚ ଲଟାବୁଦାରେ ଆଚ୍ଛାଦିତ ହୋଇ ରହିଛି। ଫଳରେ ଗାଧୋଇବା ସମୟରେ ପାହାଚରୁ ଗୋଡ଼ ଖସି ଦୁର୍ଘଟଣା ଘଟିବା ସହ ବିଷାକ୍ତ କୀଟପତଙ୍ଗଙ୍କ କାମୁଡ଼ାର ଆଶଙ୍କା ରହିଛି। ଏହି ପରିସ୍ଥିତି ମହିଳା, ବୟସ୍କ ଓ ଅନ୍ୟ ଅସହାୟ ବ୍ୟକ୍ତିଙ୍କ ପାଇଁ ଅଧିକ ବିପଜ୍ଜନକ ହୋଇପାରେ। ଏକ ସାଧାରଣ ଜଳାଶୟର ଏଭଳି ଅବସ୍ଥା ସ୍ୱଚ୍ଛତା ଓ ନାଗରିକଙ୍କ ମୌଳିକ ସୁବିଧା ପ୍ରତି ଗୁରୁତ୍ୱ ଦେବାର ଆବଶ୍ୟକତାକୁ ଦର୍ଶାଉଛି।

ଏହି ସମସ୍ୟାକୁ ନେଇ ଭୁଲିଆପଡ଼ା ଅଞ୍ଚଳର ହେମସାଗର ମେହେର, ରାଜା ମେହେର ଓ କୁନା ମେହେରଙ୍କ ସମେତ ଅନେକ ସ୍ଥାନୀୟ ବାସିନ୍ଦା ଅସନ୍ତୋଷ ପ୍ରକାଶ କରିଛନ୍ତି। ପୋଖରୀରୁ ଦଳ ଓ ଅନାବନା ଘାସ ସଫା କରିବା, ଗାଧୁଆ ତୁଠର ପାହାଚଗୁଡ଼ିକୁ ଲଟାବୁଦାମୁକ୍ତ କରିବା ସହ ପୋଖରୀର ନିୟମିତ ରକ୍ଷଣାବେକ୍ଷଣ ପାଇଁ ସେମାନେ ଦାବି କରିଛନ୍ତି।

ଏଥିସହ ପୋଖରୀର ପୁନରୁଦ୍ଧାର ଓ ସଫେଇ କାର୍ଯ୍ୟକୁ ତୁରନ୍ତ ହାତକୁ ନେଇ ସ୍ଥାନୀୟ ଲୋକଙ୍କୁ ସୁରକ୍ଷିତ ଓ ସ୍ୱଚ୍ଛ ପରିବେଶ ଯୋଗାଇଦେବାକୁ ପୌର ପ୍ରଶାସନ ନିକଟରେ ଦାବି ହୋଇଛି। ଏ ସମ୍ପର୍କରେ ଝାରସୁଗୁଡ଼ା ପୌର ପରିଷଦର ନିର୍ବାହୀ ଅଧିକାରୀ ନିଶିକାନ୍ତ ଟେଟେଙ୍କ ପ୍ରତିକ୍ରିୟା ନେବାକୁ ଚେଷ୍ଟା କରାଯାଇଥିଲେ ମଧ୍ୟ ଯୋଗାଯୋଗ ସମ୍ଭବ ହୋଇପାରିନଥିଲା। ଏବେ ପୋଖରୀର ସଫେଇ ଓ ପୁନରୁଦ୍ଧାର ଦିଗରେ ପୌର ପ୍ରଶାସନ କେବେ ପଦକ୍ଷେପ ନେଉଛି, ତାହାକୁ ସ୍ଥାନୀୟ ବାସିନ୍ଦା ଅପେକ୍ଷା କରିଛନ୍ତି।

---------------

ହିନ୍ଦୁସ୍ଥାନ ସମାଚାର / ସଞ୍ଜୟ