ଅମରାବତୀ, ଅକ୍ଟୋବର 02(ହି.ସ)ମହାରାଷ୍ଟ୍ରରେ ନବରାତ୍ରି ଉତ୍ସବ ପାଇଁ ଦୁର୍ଗା ମାତାଙ୍କ ପ୍ରତିମା ନେଇ ଫେରୁଥିବା ଯୁବକମାନଙ୍କ ଗାଡ଼ି ସମୃଦ୍ଧି ମହାମାର୍ଗରେ ଭୟାବହ ଦୁର୍ଘଟଣାର ସମ୍ମୁଖୀନ ହୋଇଛି। ଅମରାବତୀ ଜିଲ୍ଲାର ଧାମଣଗାଁ ପୁଲିସ ଥାନା ଅଧୀନ ଅଞ୍ଚଳରେ ବିଳମ୍ବିତ ରାତି ପ୍ରାୟ ୧ଟା ସମୟରେ ଏହି ଦୁର୍ଘଟଣା ଘଟିଥିବା ଜଣାପଡ଼ିଛି। ଏହି ଦୁର୍ଘଟଣାରେ ୫ ଜଣଙ୍କ ମୃତ୍ୟୁ ହୋଇଥିବାବେଳେ ଅନେକ ଲୋକ ଆହତ ହୋଇଥିବା ସୂଚନା ମିଳିଛି।

ମିଳିଥିବା ସୂଚନା ଅନୁସାରେ, ୱର୍ଧାର ସିନ୍ଦି ମେଘେ ଅଞ୍ଚଳର ନବଦୁର୍ଗା ପୂଜା ଉତ୍ସବ କମିଟିର ସଦସ୍ୟମାନେ ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ଶେଗାଁରୁ ଦୁର୍ଗା ମାତାଙ୍କ ଉଚ୍ଚ ପ୍ରତିମା ନେଇ ପିକଅପ୍ ଗାଡ଼ିରେ ଫେରୁଥିଲେ। ଧାମଣଗାଁ ନିକଟ ସମୃଦ୍ଧି ମହାମାର୍ଗର ଚ୍ୟାନେଲ ନମ୍ବର ୯୭ ନିକଟରେ ପଛପଟୁ ଆସୁଥିବା ଏକ କଣ୍ଟେନର ସେମାନଙ୍କ ଗାଡ଼ିକୁ ଜୋରଦାର ଧକ୍କା ଦେଇଥିଲା।

ଧକ୍କା ଏତେ ଭୟଙ୍କର ଥିଲା ଯେ ଗାଡ଼ିରେ ଥିବା କିଛି ଯୁବକ ଗୁରୁତର ଆହତ ହୋଇଥିଲେ। ଦୁର୍ଘଟଣାର ସୂଚନା ପାଇବା ମାତ୍ରେ ପୁଲିସ ଘଟଣାସ୍ଥଳରେ ପହଞ୍ଚି ଉଦ୍ଧାର ଓ ରିଲିଫ୍ କାର୍ଯ୍ୟ ଆରମ୍ଭ କରିଥିଲା ଏବଂ ଆହତମାନଙ୍କୁ ତୁରନ୍ତ ହସ୍ପିଟାଲକୁ ପଠାଇଥିଲା। ଆହତମାନଙ୍କର ୱର୍ଧାସ୍ଥିତ ସାୱଙ୍ଗୀ ହସ୍ପିଟାଲରେ ଚିକିତ୍ସା ଚାଲିଛି।

ଏହି ଦୁର୍ଘଟଣାରେ ଘନଶ୍ୟାମ ପାଟିଲ, ଓମ ଗାୱଣ୍ଡେ, ସଚିନ ବାଦମନୱାର, ପ୍ରବୀଣ ବାକଣେ ଏବଂ ଦତ୍ତା କୁଳସଙ୍ଗେଙ୍କ ମୃତ୍ୟୁ ହୋଇଥିବା ପ୍ରାଥମିକ ସୂଚନା ମିଳିଛି। ଘଟଣା ସମ୍ପର୍କରେ ସୂଚନା ପାଇବା ପରେ ପୁଲିସ ଅଧିକାରୀ ଓ ସ୍ଥାନୀୟ ପ୍ରଶାସନର ଅଧିକାରୀମାନେ ଘଟଣାସ୍ଥଳ ସହିତ ହସ୍ପିଟାଲରେ ପହଞ୍ଚି ସ୍ଥିତିର ସମୀକ୍ଷା କରିଥିଲେ। ଦୁର୍ଘଟଣାର ପ୍ରକୃତ କାରଣ କ’ଣ, ସେନେଇ ପୁଲିସ ପକ୍ଷରୁ ତଦନ୍ତ ଜାରି ରହିଛି।

-------

ହିନ୍ଦୁସ୍ଥାନ ସମାଚାର / ସ୍ୱାଗତିକା