ତୃତୀୟ ସନ୍ଦିଗ୍ଧ ବ୍ୟକ୍ତି ପାକିସ୍ତାନ ଆଡ଼କୁ ଫେରି ପଳାଇଲା

ତରନତାରନ, ୨ ଅକ୍ଟୋବର (ହି.ସ.): ଭାରତ-ପାକିସ୍ତାନ ସୀମା ନିକଟ ତରନତାରନ ଜିଲ୍ଲାରେ ଅନୁପ୍ରବେଶ ଉଦ୍ୟମ ବେଳେ ବିଏସ୍ଏଫ୍ର ଗୁଳିଚାଳନାରେ ଦୁଇ ପାକିସ୍ତାନୀ ନାଗରିକ ନିହତ ହୋଇଛନ୍ତି। ଖାଲଡ଼ା ଥାନା ଅଞ୍ଚଳର ରାଜୋକେ ଗାଁ ନିକଟସ୍ଥ ବିଓପି ରାଜୋକେ ଅଞ୍ଚଳରେ ଦିନ ପ୍ରାୟ ୧୨ଟା ବେଳେ ଏହି ଘଟଣା ଘଟିଥିବା ଜଣାପଡ଼ିଛି।

ବିଏସ୍ଏଫ୍ ଯବାନମାନେ ସୀମା ନିକଟରେ କେତେକ ସନ୍ଦିଗ୍ଧ ବ୍ୟକ୍ତିଙ୍କ ଗତିବିଧି ଦେଖିଥିଲେ। ଭାରତୀୟ ଅଞ୍ଚଳକୁ ପ୍ରବେଶ ଉଦ୍ୟମ କରୁଥିବା ବ୍ୟକ୍ତିମାନଙ୍କୁ ଯବାନମାନେ ଅଟକିବାକୁ ସତର୍କ କରିଥିଲେ। ତେବେ ସେମାନେ ଆଗକୁ ବଢ଼ିବା ଜାରି ରଖିବାରୁ ଯବାନମାନେ ଗୁଳିଚାଳନା କରିଥିଲେ। ଏଥିରେ ଦୁଇ ଜଣଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିଲା।

ବିଏସ୍ଏଫ୍ ଅନୁଯାୟୀ, ନିହତ ଦୁଇ ଜଣ ପାକିସ୍ତାନୀ ନାଗରିକ। ତେବେ ସେମାନଙ୍କ ପରିଚୟ ଏପର୍ଯ୍ୟନ୍ତ ଜଣାପଡ଼ିନାହିଁ। ଘଟଣା ସମୟରେ ଆଉ ଜଣେ ସନ୍ଦିଗ୍ଧ ବ୍ୟକ୍ତି ମଧ୍ୟ ଭାରତୀୟ ସୀମାରେ ପ୍ରବେଶ କରିବାକୁ ଉଦ୍ୟମ କରୁଥିଲା। ଗୁଳିଚାଳନା ଆରମ୍ଭ ହେବା ପରେ ସେ ପାକିସ୍ତାନ ଆଡ଼କୁ ଫେରି ପଳାଇବାରେ ସଫଳ ହୋଇଥିବା କୁହାଯାଉଛି।

ଘଟଣା ପରେ ସୀମାବର୍ତ୍ତୀ ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ ଅଧିକ କଡ଼ାକଡ଼ି କରାଯାଇଛି। ଅନୁପ୍ରବେଶ ଉଦ୍ୟମ ପଛରେ କ’ଣ ଉଦ୍ଦେଶ୍ୟ ଥିଲା ଏବଂ ନିହତ ବ୍ୟକ୍ତିମାନଙ୍କ ନିକଟରୁ କୌଣସି ସନ୍ଦିଗ୍ଧ ସାମଗ୍ରୀ କିମ୍ବା ଉପକରଣ ମିଳିଛି କି ନାହିଁ, ସେନେଇ ସୁରକ୍ଷା ଏଜେନ୍ସିଗୁଡ଼ିକ ତଦନ୍ତ କରୁଛନ୍ତି।

ହିନ୍ଦୁସ୍ଥାନ ସମାଚାର / ସମନ୍ୱୟ