ଉଜ୍ଜୈନ, ଅକ୍ଟୋବର 2 (ହି.ସ)। ମଧ୍ୟପ୍ରଦେଶର ଉଜ୍ଜୟିନସ୍ଥିତ ବିଶ୍ୱପ୍ରସିଦ୍ଧ ଶ୍ରୀ ମହାକାଳେଶ୍ୱର ମନ୍ଦିରରେ ଶୁକ୍ରବାର ଭୋର ସମୟରେ ବିଧିବିଧାନ ଅନୁଯାୟୀ ଭସ୍ମ ଆଳତି ସମ୍ପନ୍ନ ହୋଇଛି। ଆଶ୍ୱିନ ମାସ କୃଷ୍ଣ ପକ୍ଷ ଷଷ୍ଠୀ ତିଥିରେ ଭଗବାନ ମହାକାଳଙ୍କୁ ପଞ୍ଚାମୃତ ଅଭିଷେକ କରାଯାଇ ଭାଙ୍ଗ, ଚନ୍ଦନ ଓ ଭସ୍ମରେ ବିଶେଷ ଶୃଙ୍ଗାର କରାଯାଇଥିଲା। ଭଗବାନଙ୍କୁ ରଜତ ଚନ୍ଦ୍ର, ତ୍ରିଶୂଳ, ମୁକୁଟ, ମୁଣ୍ଡମାଳ ଓ ଅନ୍ୟାନ୍ୟ ଅଳଙ୍କାର ଅର୍ପଣ କରାଯାଇଥିଲା। ଭସ୍ମ ଆଳତିରେ ବହୁ ସଂଖ୍ୟାରେ ଶ୍ରଦ୍ଧାଳୁ ବାବା ମହାକାଳଙ୍କ ଦର୍ଶନ କରି ଆଶୀର୍ବାଦ ନେଇଥିଲେ।

ଭସ୍ମ ଆଳତିର ଆରମ୍ଭ ସଭା ମଣ୍ଡପରେ ବୀରଭଦ୍ରଜୀଙ୍କ କାନରେ ସ୍ୱସ୍ତିବାଚନରୁ ହୋଇଥିଲା। ଏହାପରେ ପ୍ରଥମ ଘଣ୍ଟାଳ ବଜାଇ ଭଗବାନଙ୍କଠାରୁ ଆଜ୍ଞା ନିଆଯାଇଥିଲା ଏବଂ ସଭା ମଣ୍ଡପର ରୁପା ପଟ ଖୋଲାଯାଇଥିଲା। ଗର୍ଭଗୃହର ପଟ ଖୋଲିବା ପରେ ପୂଜକମାନେ ଭଗବାନ ମହାକାଳଙ୍କ ଶୃଙ୍ଗାର ଖୋଲି ପୂଜା ଓ ଅଭିଷେକ ପ୍ରକ୍ରିୟା ଆରମ୍ଭ କରିଥିଲେ। କର୍ପୂର ଆଳତି ପରେ ଭଗବାନଙ୍କୁ ଜଳାଭିଷେକ କରାଯାଇଥିଲା।

ପଞ୍ଚାମୃତରେ ଅଭିଷେକ, ଭସ୍ମରେ ହେଲା ଶୃଙ୍ଗାର

ନନ୍ଦୀ ହଲ୍ରେ ନନ୍ଦୀ ମହାରାଜଙ୍କର ସ୍ନାନ, ଧ୍ୟାନ ଓ ପୂଜା କରାଯାଇଥିଲା। ଏହାପରେ ଭଗବାନ ମହାକାଳଙ୍କୁ ଜଳରେ ଅଭିଷେକ କରାଯାଇଥିଲା। କ୍ଷୀର, ଦହି, ଘିଅ, ଚିନି, ମହୁ ଓ ଫଳରସରେ ପ୍ରସ୍ତୁତ ପଞ୍ଚାମୃତରେ ଅଭିଷେକ ଓ ପୂଜା କରାଯାଇଥିଲା। ଭସ୍ମ ଅର୍ପଣ ପୂର୍ବରୁ ମନ୍ତ୍ରୋଚ୍ଚାରଣ ସହ ଭଗବାନଙ୍କ ଧ୍ୟାନ କରାଯାଇଥିଲା। ଜ୍ୟୋତିର୍ଲିଙ୍ଗକୁ ବସ୍ତ୍ରରେ ଆଚ୍ଛାଦିତ କରି ବିଧିବିଧାନ ଅନୁଯାୟୀ ଭସ୍ମ ଅର୍ପଣ କରାଯାଇଥିଲା। ଭସ୍ମ ଆଳତି ସମୟରେ ମହାନିର୍ବାଣୀ ଆଖଡ଼ା ପକ୍ଷରୁ ଭଗବାନ ମହାକାଳଙ୍କୁ ଭସ୍ମ ଅର୍ପଣ କରାଯାଇଥିଲା। ଧାର୍ମିକ ମାନ୍ୟତା ଅନୁଯାୟୀ, ଭସ୍ମ ଅର୍ପଣ ପରେ ଭଗବାନ ମହାକାଳ ନିରାକାରରୁ ସାକାର ରୂପ ଧାରଣ କରି ଭକ୍ତମାନଙ୍କୁ ଦର୍ଶନ ଦିଅନ୍ତି।

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା