ଭୁବନେଶ୍ୱର, 20 ଅକ୍ଟୋବର (ହି.ସ.)ନାଗପୁରଠାରେ ଆୟୋଜିତ ରାଷ୍ଟ୍ରୀୟ ସ୍ୱୟଂସେବକ ସଂଘ (ଆରଏସଏସ)ର ଶତାବ୍ଦୀ ବିଜୟାଦଶମୀ ଉତ୍ସବରେ ସରସଂଘଚାଳକ ଡ. ମୋହନ ଭାଗବତଙ୍କ ଅଭିଭାଷଣ ଅତ୍ୟନ୍ତ ପ୍ରେରଣାଦାୟୀ ବୋଲି ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି। ଏହି ଅଭିଭାଷଣ ସ୍ୱୟଂସେବକ ଭାବେ ତାଙ୍କର ପ୍ରାରମ୍ଭିକ ଦିନରୁ ତାଙ୍କ ଜୀବନଯାତ୍ରାକୁ ମାର୍ଗଦର୍ଶନ କରିଆସିଥିବା ଆଦର୍ଶଗୁଡ଼ିକୁ ପୁନର୍ବାର ଦୃଢ଼ୀଭୂତ କରିଛି ବୋଲି ସେ କହିଛନ୍ତି।
ସୋସିଆଲ ମିଡିଆରେ ନିଜର ମତ ପ୍ରକାଶ କରି ମୁଖ୍ୟମନ୍ତ୍ରୀ ମାଝୀ କହିଛନ୍ତି ଯେ, ଜାତୀୟ ପ୍ରଗତି, ସାମାଜିକ ସମରସତା, ଆତ୍ମନିର୍ଭରଶୀଳତା ଏବଂ ସମାଜର ସଶକ୍ତୀକରଣ ଉପରେ ଡ. ଭାଗବତଙ୍କ ଗୁରୁତ୍ୱାରୋପ ଏକ ସଶକ୍ତ ଓ ପୁନରୁତ୍ଥାନଶୀଳ ଭାରତର ଭିତିଭୂମିକୁ ପ୍ରତିଫଳିତ କରୁଛି।
ସେ କହିଛନ୍ତି ଯେ, ସେବା ଓ ରାଷ୍ଟ୍ର ନିର୍ମାଣର ଭାବନା ପ୍ରତ୍ୟେକ ସ୍ୱୟଂସେବକଙ୍କ ଜୀବନର ଅବିଚ୍ଛେଦ୍ୟ ଅଙ୍ଗ। ଡ. ଭାଗବତଙ୍କ ଆହ୍ୱାନ ‘ପଞ୍ଚ ପରିବର୍ତ୍ତନ’ ସକାରାତ୍ମକ ସାମାଜିକ ପରିବର୍ତ୍ତନ ଦିଗରେ ଏକ ଅର୍ଥପୂର୍ଣ୍ଣ ମାର୍ଗ ପ୍ରଦାନ କରୁଛି।
ଏହି ଆଦର୍ଶଗୁଡ଼ିକ ଏକ ସମରସ, ଆତ୍ମନିର୍ଭରଶୀଳ ଓ ବିକଶିତ ରାଷ୍ଟ୍ର ଗଠନ ପାଇଁ ଆମର ସାମୂହିକ ସଂକଳ୍ପକୁ ଆହୁରି ଦୃଢ଼ କରୁଛି ବୋଲି ମୁଖ୍ୟମନ୍ତ୍ରୀ କହିଛନ୍ତି।
---------------
ହିନ୍ଦୁସ୍ଥାନ ସମାଚାର / ସମନ୍ୱୟ
