ନୂଆଦିଲ୍ଲୀ, ୨୭ ଅକ୍ଟୋବର (ହି.ସ.) କେନ୍ଦ୍ର ଜଳଶକ୍ତି ମନ୍ତ୍ରୀ ସି.ଆର. ପାଟିଲ ଜଳ ସମ୍ପଦ, ନଦୀ ବିକାଶ ଓ ଗଙ୍ଗା ସଂରକ୍ଷଣ ବିଭାଗର ବିଭିନ୍ନ ପ୍ରକଳ୍ପ ଓ ଯୋଜନାର ସମୀକ୍ଷା କରିଛନ୍ତି। ପ୍ରକଳ୍ପଗୁଡ଼ିକର କାର୍ଯ୍ୟାନ୍ୱୟନରେ ରହିଥିବା ବାଧା ଚିହ୍ନଟ କରି ତୁରନ୍ତ ଦୂର କରିବା ସହ ନିର୍ଦ୍ଧାରିତ ସମୟସୀମା ମଧ୍ୟରେ କାମ ସମ୍ପୂର୍ଣ୍ଣ କରିବାକୁ ସେ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ବୈଠକରେ କେନ୍ଦ୍ର ଜଳଶକ୍ତି ରାଷ୍ଟ୍ରମନ୍ତ୍ରୀ ରାଜ ଭୂଷଣ ଚୌଧୁରୀ ମଧ୍ୟ ଉପସ୍ଥିତ ଥିଲେ।

ସମୀକ୍ଷା ବୈଠକରେ ବିଭାଗର ବିଭିନ୍ନ ପ୍ରଭାଗ ଓ ସଂଗଠନ ପକ୍ଷରୁ ଚାଲିଥିବା ପ୍ରକଳ୍ପ ଏବଂ କାର୍ଯ୍ୟକଳାପ ସମ୍ପର୍କରେ ତଥ୍ୟ ଉପସ୍ଥାପନ କରାଯାଇଥିଲା। ଏଥିରେ ବନ୍ୟା ପରିଚାଳନା ବିଭାଗ, ଫରକ୍କା ବ୍ୟାରେଜ୍ ପ୍ରକଳ୍ପ, ଜାତୀୟ ଜଳ ମିଶନ, କମାଣ୍ଡ ଏରିଆ ଡେଭଲପମେଣ୍ଟ ଆଣ୍ଡ ୱାଟର ମ୍ୟାନେଜମେଣ୍ଟର ଆଧୁନିକୀକରଣ କାର୍ଯ୍ୟକ୍ରମ, ବେସିନ୍ ପରିଚାଳନା, ଜାତୀୟ ଜଳ ବିକାଶ ସଂସ୍ଥା, କେନ୍-ବେତୱା ଲିଙ୍କ୍ ପ୍ରକଳ୍ପ ପ୍ରାଧିକରଣ, ବ୍ରହ୍ମପୁତ୍ର ନଦୀ ସମ୍ପର୍କିତ କାର୍ଯ୍ୟ, ବ୍ରହ୍ମପୁତ୍ର ବୋର୍ଡ, କ୍ଷୁଦ୍ର ଜଳସେଚନ ପରିସଂଖ୍ୟାନ ଏବଂ ଜାତୀୟ ଜଳବିଜ୍ଞାନ ପ୍ରତିଷ୍ଠାନର କାର୍ଯ୍ୟ ସାମିଲ ଥିଲା।

ବୈଠକରେ ବନ୍ୟା ପରିଚାଳନା ଓ ସୀମାନ୍ତ ଅଞ୍ଚଳ କାର୍ଯ୍ୟକ୍ରମ ଅଧୀନରେ ଚାଲିଥିବା କାମର ଅଗ୍ରଗତି ସମୀକ୍ଷା କରାଯାଇଥିଲା। ଫରକ୍କା ବ୍ୟାରେଜ୍ର ଗେଟ୍ ପରିବର୍ତ୍ତନ ଏବଂ ନଦୀକୂଳ କ୍ଷୟ ରୋକିବା ପାଇଁ ନିଆଯାଉଥିବା ପଦକ୍ଷେପ ଓ ସେଗୁଡ଼ିକର କାର୍ଯ୍ୟାନ୍ୱୟନରେ ଥିବା ଆହ୍ୱାନ ଉପରେ ମଧ୍ୟ ଆଲୋଚନା ହୋଇଥିଲା। ଜାତୀୟ ଜଳ ମିଶନର ପ୍ରମୁଖ କାର୍ଯ୍ୟକଳାପ ଓ ପଦକ୍ଷେପଗୁଡ଼ିକର ସ୍ଥିତି ସମ୍ପର୍କରେ ମନ୍ତ୍ରୀ ତଥ୍ୟ ନେଇଥିଲେ।

କମାଣ୍ଡ ଏରିଆ ଡେଭଲପମେଣ୍ଟ ଆଣ୍ଡ ୱାଟର ମ୍ୟାନେଜମେଣ୍ଟର ଆଧୁନିକୀକରଣ କାର୍ଯ୍ୟକ୍ରମ ଅଧୀନରେ ୩୫ଟି ପାଇଲଟ୍ ଗୋଷ୍ଠୀର କାର୍ଯ୍ୟାନ୍ୱୟନ ସମୀକ୍ଷା କରାଯାଇଥିଲା। କେନ୍-ବେତୱା ଲିଙ୍କ୍ ପ୍ରକଳ୍ପର ସ୍ଥିତି ସହ ଲିଙ୍କ୍ କେନାଲ ଓ ଦୌଧନ ଡ୍ୟାମ୍ ନିର୍ମାଣ କାର୍ଯ୍ୟର ଅଗ୍ରଗତି ଉପରେ ମଧ୍ୟ ଆଲୋଚନା ହୋଇଥିଲା। ବ୍ରହ୍ମପୁତ୍ର ବୋର୍ଡ ପକ୍ଷରୁ ମାଷ୍ଟର ପ୍ଲାନ୍ ଓ ବିସ୍ତୃତ ପ୍ରକଳ୍ପ ରିପୋର୍ଟ ପ୍ରସ୍ତୁତିର ଅଗ୍ରଗତି ସମ୍ପର୍କରେ ଅବଗତ କରାଯାଇଥିଲା।

କ୍ଷୁଦ୍ର ଜଳସେଚନ ପରିସଂଖ୍ୟାନ କାର୍ଯ୍ୟକ୍ରମ ଅଧୀନରେ ଚାଲିଥିବା ଚାରିଟି ଜନଗଣନାର ଅଗ୍ରଗତି ସହ ଜାତୀୟ ଜଳବିଜ୍ଞାନ ପ୍ରତିଷ୍ଠାନର ପ୍ରମୁଖ କାର୍ଯ୍ୟକ୍ରମ, ଲକ୍ଷ୍ୟ ଓ ଉପଲବ୍ଧିର ମଧ୍ୟ ସମୀକ୍ଷା କରାଯାଇଥିଲା।

ବୈଠକରେ ନିଆଯାଇଥିବା ନିଷ୍ପତ୍ତିଗୁଡ଼ିକୁ ପ୍ରଭାବଶାଳୀ ଭାବେ କାର୍ଯ୍ୟକାରୀ କରିବା, ପ୍ରକଳ୍ପଗୁଡ଼ିକର ନିୟମିତ ତଦାରଖ କରିବା ଏବଂ ରାଜ୍ୟ ସରକାରମାନଙ୍କ ସହ ଉତ୍ତମ ସମନ୍ୱୟ ରଖିବାକୁ ଜଳଶକ୍ତି ମନ୍ତ୍ରୀ ଅଧିକାରୀ ଓ ସମ୍ପୃକ୍ତ ସଂସ୍ଥାର ମୁଖ୍ୟମାନଙ୍କୁ ନିର୍ଦ୍ଦେଶ ଦେଇଥିଲେ। ଏହାଦ୍ୱାରା ପ୍ରକଳ୍ପଗୁଡ଼ିକ ନିର୍ଦ୍ଧାରିତ ସମୟରେ ସମ୍ପୂର୍ଣ୍ଣ ହୋଇପାରିବ ବୋଲି ସେ ଆଶା ପ୍ରକାଶ କରିଥିଲେ।

ହିନ୍ଦୁସ୍ଥାନ ସମାଚାର / ସମନ୍ୱୟ