ମୁମ୍ବାଇ, ଅକ୍ଟୋବର ୨୭ (ହି.ସ.)। ବମ୍ବେ ହାଇକୋର୍ଟ ମଙ୍ଗଳବାର ଦିନ ଚଳଚ୍ଚିତ୍ର ଅଭିନେତା ଇମ୍ରାନ ଖାନ୍ଙ୍କୁ ଫରେନର୍ସ ରିଜିଓନାଲ୍ ରେଜିଷ୍ଟ୍ରେସନ୍ ଅଫିସ୍ (ଏଫ୍ଆର୍ଆର୍ଓ) ପକ୍ଷରୁ ଜାରି କରାଯାଇଥିବା ଭାରତ ଛାଡ଼ିବା ନୋଟିସ୍ ଉପରେ ନଭେମ୍ବର ୨ ତାରିଖ ପର୍ଯ୍ୟନ୍ତ ରୋକ୍ ଲଗାଇଛନ୍ତି। ଆମେରିକୀୟ ନାଗରିକ ଇମ୍ରାନ ଖାନ୍ଙ୍କୁ ଅକ୍ଟୋବର ୨୮ ତାରିଖ ସୁଦ୍ଧା ଭାରତ ଛାଡ଼ିବାକୁ ନିର୍ଦ୍ଦେଶ ଦିଆଯାଇଥିଲା।

ଅଭିନେତା ଇମ୍ରାନ ଖାନ୍ଙ୍କୁ ଜାରି କରାଯାଇଥିବା ଭାରତ ଛାଡ଼ିବା ନୋଟିସ୍କୁ ଚ୍ୟାଲେଞ୍ଜ କରି ଦାଖଲ ହୋଇଥିବା ଆବେଦନର ଶୁଣାଣି ମଙ୍ଗଳବାର ମୁଖ୍ୟ ବିଚାରପତି ମହେଶ ଚନ୍ଦ୍ର ତ୍ରିପାଠୀ ଏବଂ ବିଚାରପତି ଅଦ୍ୱୈତ ସେଠନାଙ୍କ ଖଣ୍ଡପୀଠରେ ହୋଇଥିଲା। ଇମ୍ରାନ ଖାନ୍ଙ୍କ ପକ୍ଷରୁ ଉପସ୍ଥିତ ଓକିଲ ଭେଙ୍କଟେଶ ଧୋଣ୍ଡ ମାମଲାର ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ତାଙ୍କ ବିରୋଧରେ କୌଣସି କଠୋର ପଦକ୍ଷେପ ନ ନେବାକୁ ଅଦାଲତଙ୍କୁ ଅନୁରୋଧ କରିଥିଲେ।

କେନ୍ଦ୍ର ସରକାରଙ୍କ ପକ୍ଷରୁ ଉପସ୍ଥିତ ସଲିସିଟର ଜେନେରାଲ୍ ତୁଷାର ମେହେଟା ଶୁଣାଣି ପାଇଁ ଅଧିକ ସମୟ ମାଗିଥିଲେ। ଅଦାଲତ ତାଙ୍କ ଅନୁରୋଧକୁ ଗ୍ରହଣ କରିଥିଲେ। ଏହା ସହିତ ଅତିରିକ୍ତ ସଲିସିଟର ଜେନେରାଲ୍ ଅନିଲ ସିଂହ ଅଦାଲତଙ୍କୁ ଆଶ୍ୱାସନା ଦେଇଥିଲେ ଯେ ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ଅଭିନେତାଙ୍କ ବିରୋଧରେ କୌଣସି ପଦକ୍ଷେପ ନିଆଯିବ ନାହିଁ। ଏହାପରେ ଅଦାଲତ ଇମ୍ରାନ ଖାନ୍ଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନ ନେବାକୁ ନିର୍ଦ୍ଦେଶ ଦେବା ସହ ମାମଲାର ପରବର୍ତ୍ତୀ ଶୁଣାଣି ନଭେମ୍ବର ୨ ତାରିଖକୁ ଘୁଞ୍ଚାଇ ଦେଇଥିଲେ।

ଉଲ୍ଲେଖଯୋଗ୍ୟ ଯେ, ଅକ୍ଟୋବର ୧୦ ତାରିଖରେ ମୁମ୍ବାଇର ଐତିହାସିକ ଅଗଷ୍ଟ କ୍ରାନ୍ତି ମଇଦାନରେ ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ଏକ ବିରୋଧ ପ୍ରଦର୍ଶନ ହୋଇଥିଲା। ଦିଲ୍ଲୀରେ ‘କକରୋଚ୍ ଜନତା ପାର୍ଟି’ ପକ୍ଷରୁ ଚାଲିଥିବା ବିରୋଧ ପ୍ରଦର୍ଶନକୁ ସମର୍ଥନ ଜଣାଇ ଏହି ପ୍ରତିବାଦ କରାଯାଇଥିଲା। ଏହି ସମୟରେ ଇମ୍ରାନ ଖାନ୍ଙ୍କୁ କିଛି ସମୟ ପାଇଁ ହେପାଜତକୁ ନିଆଯାଇଥିଲା।

ଏହାପରେ ମୁମ୍ବାଇ ପୁଲିସ ପକ୍ଷରୁ ଇମ୍ରାନ ଖାନ୍ଙ୍କୁ ଏକ ନୋଟିସ୍ ଜାରି କରାଯାଇ ଅକ୍ଟୋବର ୨୮ ତାରିଖ ସୁଦ୍ଧା ଭାରତ ଛାଡ଼ିବାକୁ କୁହାଯାଇଥିଲା। ନିର୍ଦ୍ଧାରିତ ସମୟସୀମା ମଧ୍ୟରେ ଭାରତ ନ ଛାଡ଼ିଲେ ତାଙ୍କ ବିରୋଧରେ ଦେଶରୁ ବହିଷ୍କାର ପ୍ରକ୍ରିୟା ଆରମ୍ଭ କରାଯିବ ବୋଲି ନୋଟିସ୍ରେ ଉଲ୍ଲେଖ ଥିଲା।

ଏହାପରେ ଅକ୍ଟୋବର ୧୭ ତାରିଖରେ ଇମ୍ରାନ ଖାନ୍ ବମ୍ବେ ହାଇକୋର୍ଟରେ ଏକ ଆବେଦନ ଦାଖଲ କରି ପୁଲିସର ଏହି ନୋଟିସ୍କୁ ଚ୍ୟାଲେଞ୍ଜ କରିଥିଲେ। ଆବେଦନରେ ସେ ନୋଟିସ୍କୁ ବେଆଇନ, ମନମୁଖୀ ଏବଂ ଅନୁଚିତ ବୋଲି ଦର୍ଶାଇଥିଲେ। ଜଣେ ସାର୍ବଜନୀନ ବ୍ୟକ୍ତିତ୍ୱ ହୋଇଥିବାରୁ ତାଙ୍କୁ ଜାଣିଶୁଣି ଟାର୍ଗେଟ୍ କରାଯାଉଥିବା ମଧ୍ୟ ସେ ଅଭିଯୋଗ କରିଥିଲେ।

ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ଆୟୋଜିତ ପ୍ରତିବାଦ ପ୍ରଦର୍ଶନ ସହ ଜଡ଼ିତ କୌଣସି ସଂଗଠନ କିମ୍ବା ସଂସ୍ଥା ସହ ତାଙ୍କର କୌଣସି ସମ୍ପର୍କ ନାହିଁ ବୋଲି ଇମ୍ରାନ ଖାନ୍ ଦାବି କରିଥିଲେ। ଏଥିସହ ଉକ୍ତ ନୋଟିସ୍କୁ ରଦ୍ଦ କରିବା ସହ ଆବେଦନର ଚୂଡ଼ାନ୍ତ ରାୟ ପ୍ରକାଶ ପାଇବା ପର୍ଯ୍ୟନ୍ତ ତାଙ୍କ ବିରୋଧରେ କୌଣସି କଠୋର ପଦକ୍ଷେପ ନ ନେବାକୁ ସେ ଅଦାଲତଙ୍କୁ ଅନୁରୋଧ କରିଛନ୍ତି।

ହିନ୍ଦୁସ୍ଥାନ ସମାଚାର / ସ୍ୱାଗତିକା