ସମ୍ବଲପୁର, ୩୧, ଅକ୍ଟୋବର (ହି.ସ.) ସମ୍ବଲପୁର ଜିଲ୍ଲା ଠେଲକୋଲୋଇ ଥାନା ଅଞ୍ଚଳରେ ଗତ ୨୦୧୯ ମସିହାରେ ଘଟିଥିବା ଏକ ଦୁଷ୍କର୍ମ ଓ ହତ୍ୟା ମାମଲାର ଶୁଣାଣି କରି ମାନ୍ୟବର ଅଦାଲତ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିବା ସହ ଆଜୀବନ କାରାଦଣ୍ଡ ଶୁଣାଇଛନ୍ତି। ଏଥିସହ ଅନ୍ୟ ଦୁଇଟି ଧାରାରେ ମଧ୍ୟ ଅତିରିକ୍ତ ଦଣ୍ଡାଦେଶ ହୋଇଛି। ସୂଚନାନୁଯାୟୀ, ୨୦୧୯ ଜୁନ୍ ୨୮ ତାରିଖରେ ଗ୍ରାମର ୨୮ ବର୍ଷୟା ଗୀତା ମୁଣ୍ଡା ନାମ୍ନୀ ମହିଳା ଘରୁ ଶୌଚ ପାଇଁ ବାହାରକୁ ଯାଇ ଆଉ ଘରକୁ ଫେରି ନଥିଲେ। ପରବର୍ତ୍ତୀ ସମୟରେ ବୁଢ଼ିଆପାଲି ମୁଣ୍ଡାପଡ଼ା ଅଞ୍ଚଳରୁ ଗୀତାର ମୃତଦେହ ଉଦ୍ଧାର ହୋଇଥିଲା। ତେବେ ମର ଶରୀରର ବେକରେ ତଣ୍ଟି ଚିପିବାର ଚିହ୍ନ ଥିବା ଦେଖିବାକୁ ମିଳିଥିଲା। ଏହି ଘଟଣାର ତଦନ୍ତ କରି ପୋଲିସ ପାତ୍ରପାଲି ଗ୍ରାମର ୨୦ ବର୍ଷିୟ ପିୟା ଓରଫ ରାଜେଶ ମୁଣ୍ଡାକୁ ଦୁଷ୍କର୍ମ ଓ ହତ୍ୟାକାଣ୍ଡରେ ସମ୍ପୃକ୍ତ ଥିବା ନେଇ ଗିରଫ କରିଥିଲା । ଏ ସମ୍ପର୍କରେ ଥେଲକୋଲୋଇ ଥାନାରେ ୧୦୯ ନମ୍ବରରେ ପୋଲିସ ଏକ ମାମଲା ରୁଜୁ କରିଥିଲା। ଜୁଲାଇ ୮ ତାରିଖରେ ପୋଲିସ ଅଭିଯୁକ୍ତକୁ ଗିରଫ କରିଥିବା ବେଳେ ଅଗଷ୍ଟ ୩୧ ତାରିଖରେ ଚାର୍ଜସିଟ୍ ଦାଖଲ କରିଥିଲା। ସମ୍ବଲପୁର ପ୍ରଥମ ଅତିରିକ୍ତ ଦୌରାଜଜ୍ ଅଦାଲତ ଆଜି ଅଭିଯୁକ୍ତ ପିୟା ଓରଫ ରାଜେଶ ମୁଣ୍ଡାକୁ ଭାରତୀୟ ପିଙ୍ଗଳ କୋଡ୍ର ଧାରା ୩୦୨, ୩୭୬ ଓ ୨୦୧ ଅନୁଯାୟୀ ଦୋଷୀ ସାବ୍ୟସ୍ତ କରିଛନ୍ତି। ଧାରା ୩୦୨ରେ ଆଜୀବନ କାରାଦଣ୍ଡ, ଧାରା ୩୭୬ରେ ୨୦ ବର୍ଷ ସଶ୍ରମ କାରାଦଣ୍ଡ ଏବଂ ଧାରା ୨୦୧ରେ ୫ ବର୍ଷ ସଶ୍ରମ କାରାଦଣ୍ଡ ଶୁଣାଇଛନ୍ତି। ସମସ୍ତ ଦଣ୍ଡ ଏକକାଳୀନ ଲାଗୁ ହେବ। ଏହି ମାମଲାର ତଦନ୍ତ ଏସ୍ଆଇ ଏସ୍. ଥେମ୍ରିଆ ଓ ସୁରେଶ ଚନ୍ଦ୍ର ସାହୁ କରିଥିବା ବେଳେ ଡିଏସ୍ପି ବି.ଏସ୍. ଉଦଗାତା ତଦାରଖ କରିଥିଲେ। ସରକାରଙ୍କ ପକ୍ଷରୁ ଏପିପି ଏ.ପି. ତରାଇ, ପି.କେ. ପ୍ରଧାନ ଏବଂ ଆସୋସିଏଟ୍ ପିପି ଆର୍.ଏଲ୍. ଅଗ୍ରୱାଲ ମାମଲା ପରିଚାଳନା କରିଥିଲେ।
---------------
ହିନ୍ଦୁସ୍ଥାନ ସମାଚାର / ଶୈଳେଶ
