ନୂଆଦିଲ୍ଲୀ, ୧୩ ନଭେମ୍ବର (ହି.ସ.) - ଆସ୍ଥା ଓ ସୂର୍ଯ୍ୟ ଉପାସନାକୁ ସମର୍ପିତ ଚାରିଦିନିଆ ଛଠ ମହାପର୍ବର ଶୁକ୍ରବାର ନହାୟ-ଖାୟ ସହ ଶୁଭାରମ୍ଭ ହୋଇଛି। ଦିଲ୍ଲୀରେ ଛଠ ପୂଜା ସାମଗ୍ରୀ କିଣିବା ପାଇଁ ବହୁ ସଂଖ୍ୟାରେ ଲୋକ ବଜାରକୁ ଆସୁଛନ୍ତି। ନଭେମ୍ବର ୧୬ ତାରିଖରେ ଉଦିତ ସୂର୍ଯ୍ୟଙ୍କୁ ଅର୍ଘ୍ୟ ଅର୍ପଣ ସହ ଛଠ ପୂଜାର ସମାପନ ହେବ।

ସୂର୍ଯ୍ୟଦେବ ଓ ଛଠୀ ମାତାଙ୍କୁ ସମର୍ପିତ ଚାରିଦିନିଆ ଛଠ ମହାପର୍ବ ନହାୟ-ଖାୟରୁ ଆରମ୍ଭ ହେବା ପରେ ଦିଲ୍ଲୀର ଆଜାଦପୁର ମଣ୍ଡି, ଗାଜିପୁର ମଣ୍ଡି, ବାରାଣସୀର ଫଳ ମଣ୍ଡି ସମେତ ବିଭିନ୍ନ ସ୍ଥାନୀୟ ବଜାରରେ କ୍ରେତାଙ୍କ ଭିଡ଼ ଜମିଛି। ଅନେକ ସ୍ଥାନରେ ଟ୍ରାଫିକ୍ ଜାମ୍ର ପରିସ୍ଥିତି ମଧ୍ୟ ସୃଷ୍ଟି ହୋଇଛି। ଛଠ ମହାପର୍ବକୁ ନେଇ ଛୋଟ ଛୋଟ ବଜାରଗୁଡ଼ିକରେ ମଧ୍ୟ ଚଳଚଂଚଳତା ବଢ଼ିଛି। ଫଳ, ଆଖୁ, ନଡ଼ିଆ, ସୂପ, ଡାଲା ଓ ପୂଜା ସାମଗ୍ରୀ ଦୋକାନଗୁଡ଼ିକରେ ଗ୍ରାହକଙ୍କ ଭିଡ଼ ଜମିବା ଆରମ୍ଭ ହୋଇଛି। ମାଟି ଚୁଲି, ନୂଆ ବାସନକୁସନ ଏବଂ ଛଠ ପୂଜାରେ ବ୍ୟବହୃତ ଅନ୍ୟାନ୍ୟ ସାମଗ୍ରୀର ଚାହିଦା ମଧ୍ୟ ବଢ଼ିଛି।

ନହାୟ-ଖାୟ: ଏହି ପର୍ବର ଆରମ୍ଭ ସ୍ନାନ ଓ ପବିତ୍ରତା ସହ ହୋଇଥାଏ। ବ୍ରତଧାରୀମାନେ ସାତ୍ୱିକ ଭୋଜନ (କଖାରୁ-ଭାତ ଓ ଚଣା ଡାଲି) ଗ୍ରହଣ କରି ଏହି ମହାପର୍ବର ଶୁଭାରମ୍ଭ କରନ୍ତି।

ଖର୍ଣ୍ଣା: ବ୍ରତଧାରୀମାନେ ପୂରା ଦିନ ଉପବାସ ରଖି ସନ୍ଧ୍ୟାରେ ଗୁଡ଼ ଖିରି ଓ ରୁଟିର ପ୍ରସାଦ ଗ୍ରହଣ କରନ୍ତି। ଏହାପରେ ନିର୍ଜଳା ବ୍ରତ ଆରମ୍ଭ ହୋଇଥାଏ।

ସନ୍ଧ୍ୟା ଅର୍ଘ୍ୟ: ରବିବାର ସନ୍ଧ୍ୟାରେ ଅସ୍ତଗାମୀ ସୂର୍ଯ୍ୟଙ୍କୁ ଅର୍ଘ୍ୟ ଅର୍ପଣ କରାଯିବ। ଏହି ଦିନ ନଦୀ, ପୋଖରୀ କିମ୍ବା ଛଠ ଘାଟରେ ଏକତ୍ରିତ ହୋଇ ଶ୍ରଦ୍ଧାଳୁମାନେ ଅସ୍ତମିତ ସୂର୍ଯ୍ୟଙ୍କୁ ଅର୍ଘ୍ୟ ଦେବେ।

ଉଷା ଅର୍ଘ୍ୟ ଓ ପାରଣ: ସୋମବାର ଉଷା ଅର୍ଘ୍ୟ ପରେ ପାରଣ କରାଯିବ। ଏହି ଦିନ ବ୍ରତଧାରୀମାନେ ଉଦିତ ସୂର୍ଯ୍ୟଙ୍କୁ ଅର୍ଘ୍ୟ ଅର୍ପଣ କରି ବ୍ରତ ଭଙ୍ଗ କରିବା ସହ ଚାରିଦିନିଆ ମହାପର୍ବର ସମାପନ କରିବେ।

ହିନ୍ଦୁସ୍ଥାନ ସମାଚାର / ଭାନୁ ଚରଣ