ଆବୁଧାବି/ଦୁବାଇ, ନଭେମ୍ବର ୧୩ (ହି.ସ): ସଂଯୁକ୍ତ ଆରବ ଏମିରେଟ୍ସ (ୟୁଏଇ)ର ଫୁଜୈରା ଏମିରେଟ୍ସରେ ଏକ ସଡ଼କ ଦୁର୍ଘଟଣାରେ ଅତି କମରେ ୧୪ ଜଣଙ୍କର ମୃତ୍ୟୁ ଏବଂ ୩୦ ଜଣ ଆହତ ହୋଇଥିବା ଗୃହ ମନ୍ତ୍ରଣାଳୟ ଗୁରୁବାର କହିଛି। ଏହି ଦୁର୍ଘଟଣାରେ ଅଠରଟି ଗାଡ଼ି ଧକ୍କା ହୋଇଥିଲା, ଯାହା ମଧ୍ୟରୁ କିଛି ପରେ ନିଆଁ ଲାଗିଯାଇଥିଲା।ଏହି ଗାଡ଼ିଗୁଡ଼ିକରେ ପାଞ୍ଚଟି ଟ୍ରକ୍ ଥିଲା। ମୃତକଙ୍କ ମଧ୍ୟରେ ଭାରତୀୟ ବଂଶୋଦ୍ଭବ ଯମଜ ଭାଇଭଉଣୀ (୨୧ ବର୍ଷୀୟ ମହମ୍ମଦ ଅସମିଲ୍ ସିଦ୍ଦିକି ଏବଂ ମିସନା ଜୁବିନ୍ ସିଦ୍ଦିକି) ଏବଂ ସେମାନଙ୍କର ତିନି ବର୍ଷର ଭଣଜା ମହମ୍ମଦ ଫୈଜ୍ ଥିଲେ, ଯେଉଁମାନେ କାରରେ ଯାତ୍ରା କରୁଥିଲେ।ଗଲ୍ଫ ନ୍ୟୁଜ୍ ଏବଂ ଆରବ ନ୍ୟୁଜ୍ ଅନୁଯାୟୀ, ଫୁଜୈରାହ ପୋଲିସ କହିଛି ଯେ ବୁଧବାର ମଧ୍ୟରାତ୍ରି ପୂର୍ବରୁ ଫୁଜୈରାହ ଏମିରେଟ୍ସର ପ୍ରବେଶ ଦ୍ୱାର ନିକଟରେ ଶେଖ ଖଲିଫା ବିନ୍ ଜାଏଦ୍ ରାସ୍ତାରେ ଜଣେ ଟ୍ରକ୍ ଡ୍ରାଇଭର ତାଙ୍କ ଗାଡ଼ି ଉପରୁ ନିୟନ୍ତ୍ରଣ ହରାଇଥିଲେ। ପୋଲିସ ଅନୁଯାୟୀ, ଟ୍ରକ୍ଟି ଅନ୍ୟ ଏକ ଗାଡ଼ିକୁ ଧକ୍କା ଦେଇଥିଲା, ତା’ପରେ ଓଲଟି ପଡ଼ିଥିଲା ଏବଂ ଧୀର ଗତିରେ ଟ୍ରାଫିକ୍ ଯୋଗୁଁ ଅଟକିଥିବା ଅନ୍ୟ କେତେକ ଗାଡ଼ି ସହିତ ଧକ୍କା ହୋଇଥିଲା। ଟ୍ରକ୍ ରୁ ନିଆଁ ଅନେକ କ୍ଷତିଗ୍ରସ୍ତ ଗାଡ଼ିକୁ ବ୍ୟାପି ଯାଇଥିଲା।ଫୁଜୈରାହ ପୋଲିସ କହିଛି ଯେ ଆହତ ଏବଂ ପୋଡ଼ିଯାଇଥିବା ୧୫ ଜଣଙ୍କୁ ହସ୍ପିଟାଲରୁ ଡିସଚାର୍ଜ କରାଯାଇଛି, ଯେତେବେଳେ ଅନ୍ୟ ୧୫ ଜଣ ଏବେ ବି ଚିକିତ୍ସାଧୀନ ଅଛନ୍ତି। ମୃତକଙ୍କ ମଧ୍ୟରେ ଏମିରେଟି ନାଗରିକ ମଧ୍ୟ ଅଛନ୍ତି। କେରଳର ମୂଳ ବାସିନ୍ଦା ଶୋକାକୁଳ ଭାରତୀୟ ପରିବାର ତିନି ଜଣଙ୍କୁ ୟୁଏଇରେ କବର ଦେବାକୁ ନିଷ୍ପତ୍ତି ନେଇଛନ୍ତି। ପରିବାର ସଦସ୍ୟ ଜମାଲ୍ ସିଦ୍ଦିକି କହିଛନ୍ତି ଯେ ଫୁଜୈରାହର ଏକ ମସଜିଦରେ ଶୁକ୍ରବାର ନମାଜ ପରେ ତିନି ଜଣଙ୍କୁ କବର ଦିଆଯିବ।
---------------
ହିନ୍ଦୁସ୍ଥାନ ସମାଚାର / ରଶ୍ମିତା
