ଡବଲିନ୍ (ଆୟର୍ଲାଣ୍ଡ), ୧୩ ନଭେମ୍ବର (ହି.ସ.)। ଆମେରିକାର ଦୂତ ତଥା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଜ୍ୱାଇଁ ଜେରେଡ୍ କୁଶନର ଏବଂ ଷ୍ଟିଭ୍ ୱିଟକଫ୍ ଗୁରୁବାର ବିଳମ୍ବିତ ରାତିରେ ଆୟର୍ଲାଣ୍ଡରେ ପହଞ୍ଚିଛନ୍ତି। ଉଭୟ ୟୁକ୍ରେନର ରାଷ୍ଟ୍ରପତି ଭୋଲୋଦିମିର ଜେଲେନସ୍କିଙ୍କୁ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ମସ୍କୋରେ ହୋଇଥିବା ସେମାନଙ୍କ ପୂର୍ବ ବୈଠକ ସମ୍ପର୍କରେ ଅବଗତ କରାଇଛନ୍ତି। ରୁଷିଆ, ୟୁକ୍ରେନ ଏବଂ ଆମେରିକାର ଆଲୋଚନାକାରୀଙ୍କ ମଧ୍ୟରେ ଆବୁଧାବିରେ ଦୁଇଦିନ ଧରି ଆଲୋଚନା ହେବା ପରେ ଉଭୟ ଡବଲିନ୍ରେ ପହଞ୍ଚିଥିଲେ। ଫେବୃଆରୀ ପରେ ଏହା ଏହି ଧରଣର ପ୍ରଥମ ଆଲୋଚନା ଥିଲା, ଯାହା କୌଣସି ଠୋସ୍ ନିଷ୍କର୍ଷ ବିନା ଶେଷ ହୋଇଛି।
ସିଏନ୍ଏନ୍ର ରିପୋର୍ଟ ଅନୁଯାୟୀ, ଡବଲିନ୍ରେ ବୈଠକ ପରେ ଜେଲେନସ୍କି ସାମ୍ବାଦିକମାନଙ୍କୁ କହିଥିଲେ ଯେ, ଗତ କିଛି ଦିନ ଧରି ଚାଲିଥିବା ଆଲୋଚନା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ସେ କହିଥିଲେ, ଏହାଦ୍ୱାରା ଆମେ ଏହି ଯୁଦ୍ଧର ଅନ୍ତ ଘଟାଇପାରିବୁ ବୋଲି ଆଶା ବୃଦ୍ଧି ପାଇଛି। ଏହି ବୈଠକ ପରେ ଆଉ ଏକ ବୈଠକ ହେବ ଏବଂ ପ୍ରତ୍ୟେକ ବୈଠକରୁ କିଛି ନା କିଛି ଫଳାଫଳ ମିଳିବା ଉଚିତ, ଯାହା ଆମକୁ ଶାନ୍ତିର ଆହୁରି ନିକଟତର କରିବ।
ଗୁରୁବାର ରାତିରେ ୱିଟକଫ୍ ଓ କୁଶନରଙ୍କ ସହ ଉପସ୍ଥିତ ଥିବା ଜେଲେନସ୍କି ଆହୁରି କହିଥିଲେ ଯେ, ଯୁଦ୍ଧବନ୍ଦୀଙ୍କ ଅଦଳବଦଳ ନେଇ ନିକଟରେ ହୋଇଥିବା ସହମତି ଯୁଦ୍ଧ ଆରମ୍ଭ ହେବା ପରଠାରୁ ଏପର୍ଯ୍ୟନ୍ତର ସବୁଠାରୁ ବଡ଼ ଅଦଳବଦଳ ହେବ। ସେ ଏହାକୁ ଏକ ବାସ୍ତବିକ ଉପଲବ୍ଧି ବୋଲି କହିଥିଲେ। ଏହି ଅବସରରେ କୁଶନର କହିଥିଲେ ଯେ, ଯୁଦ୍ଧ ପରେ ୟୁକ୍ରେନର ସୁରକ୍ଷା ସମ୍ପର୍କରେ ଗୁରୁତ୍ୱପୂର୍ଣ୍ଣ ଯୋଜନା ଉପରେ କାମ ଚାଲିଛି।
ଏହା ପୂର୍ବରୁ ମସ୍କୋରୁ ଯାତ୍ରା କରିବାର ଠିକ୍ ପୂର୍ବରୁ ୱିଟକଫ୍ ଭ୍ନୁକୋଭୋ ବିମାନବନ୍ଦରରେ କହିଥିଲେ, ମୋତେ ଲାଗୁଛି ଆଜି କିଛିଟା ଅଗ୍ରଗତି ହୋଇଛି। ଆମେ ପୁଣିଥରେ ତ୍ରିପାକ୍ଷିକ ଆଲୋଚନା ଆରମ୍ଭ କରିପାରିବୁ ବୋଲି ଲୋକମାନେ ଆଶା କରିନଥିଲେ। କିନ୍ତୁ ଆମେ ଏହାକୁ ପୁନର୍ବାର ଆରମ୍ଭ କରିଛୁ। ଏହା ସହିତ ଆମେ ଆଉ ଏକ ବୈଠକର ତାରିଖ ମଧ୍ୟ ସ୍ଥିର କରିଛୁ। ସେ କହିଥିଲେ, ରାଷ୍ଟ୍ରପତି ଟ୍ରମ୍ପ ଏହା ହିଁ ଦେଖିବାକୁ ଚାହୁଁଛନ୍ତି।
ୱିଟକଫ୍ ଏହା ମଧ୍ୟ ସଙ୍କେତ ଦେଇଥିଲେ ଯେ, ୟୁକ୍ରେନ୍ ସଂଘର୍ଷକୁ ନେଇ ହେବାକୁ ଥିବା ପରବର୍ତ୍ତୀ ଆଲୋଚନାରେ ୟୁରୋପୀୟ ପ୍ରତିନିଧିମାନେ ମଧ୍ୟ ସାମିଲ ହେବେ। ସେ ସାମ୍ବାଦିକମାନଙ୍କୁ କହିଥିଲେ, ସେମାନେ ଆମର ସହଯୋଗୀ ଏବଂ ଏହି ଆଲୋଚନାରେ ସେମାନଙ୍କର ସାମିଲ ହେବା ଗୁରୁତ୍ୱପୂର୍ଣ୍ଣ। ପରେ କୁଶନର ମଧ୍ୟ ସମାନ କଥା ଦୋହରାଇଥିଲେ। ଜେଲେନସ୍କିଙ୍କ ସହ ବୈଠକ ପରେ ସେ କହିଥିଲେ, ୟୁରୋପୀୟ ଦେଶଗୁଡ଼ିକର ଉପସ୍ଥିତି ବିନା ଆମେ ଏହି ଚୁକ୍ତିକୁ ସମ୍ପୂର୍ଣ୍ଣ କରିପାରିବୁ ନାହିଁ।
ହିନ୍ଦୁସ୍ଥାନ ସମାଚାର / ସ୍ୱାଗତିକା
