ୱାଶିଂଟନ (ଆମେରିକା), ୧୩ ନଭେମ୍ବର (ହି.ସ.)। ଆମେରିକାର କାଲିଫର୍ଣ୍ଣିଆ ରାଜ୍ୟର ପ୍ରମୁଖ ସହର ସାନ୍ଫ୍ରାନ୍ସିସ୍କୋସ୍ଥିତ ସୁପିରିୟର କୋର୍ଟରେ ଅଣଲାଭକାରୀ ସଂଗଠନଗୁଡ଼ିକର ଏକ ମେଣ୍ଟ ଗୁରୁବାର ପାଞ୍ଚଟି ପ୍ରମୁଖ ଆର୍ଟିଫିସିଆଲ୍ ଇଣ୍ଟେଲିଜେନ୍ସ (ଏଆଇ) ବିକାଶକାରୀ କମ୍ପାନୀ ବିରୋଧରେ ମାମଲା ରୁଜୁ କରିଛି। ଏହି କମ୍ପାନୀଗୁଡ଼ିକୁ ଏଆଇ ମଡେଲ୍ ବିକାଶ କରିବାରୁ ରୋକିବା ଏହି ମାମଲାର ଉଦ୍ଦେଶ୍ୟ। ଅଭିଯୋଗ ହୋଇଛି ଯେ, ଏହି କମ୍ପାନୀଗୁଡ଼ିକ ଜାଣିଶୁଣି ଏଭଳି ପ୍ରଯୁକ୍ତିବିଦ୍ୟା ବିକଶିତ କରିଛନ୍ତି, ଯାହା ମାନବଜାତି ପାଇଁ ବିନାଶକାରୀ ବିପଦ ସୃଷ୍ଟି କରିପାରେ।
ସିବିଏସ୍ ନ୍ୟୁଜ୍ର ରିପୋର୍ଟ ଅନୁଯାୟୀ, 'ଆଲାଏନ୍ସ ଫର୍ ସିକ୍ୟୁର୍ ଏଆଇ' ସାନ୍ଫ୍ରାନ୍ସିସ୍କୋ ସୁପିରିୟର କୋର୍ଟରେ ଏହି ମାମଲା ରୁଜୁ କରିଛି। ଏଥିରେ 'ଇରିପ୍ଲେସେବଲ୍ ଏଜୁକେସନ୍ ଫଣ୍ଡ୍', 'ପବ୍ଲିକ୍ ସିଟିଜେନ୍' ଏବଂ 'ହିଟ୍ ଇନିସିଏଟିଭ୍' ଭଳି ଅଧିକାର ପାଇଁ କାର୍ଯ୍ୟ କରୁଥିବା ସଂଗଠନଗୁଡ଼ିକ ମଧ୍ୟ ସାମିଲ ଅଛନ୍ତି। ଏହି ମାମଲାରେ ଆନ୍ଥ୍ରୋପିକ୍, ଗୁଗୁଲ୍, ମେଟା, ଓପନ୍ଏଆଇ ଏବଂ ସ୍ପେସ୍ଏକ୍ସଏଆଇକୁ ପକ୍ଷଭୁକ୍ତ କରାଯାଇଛି।
'ଆଲାଏନ୍ସ ଫର୍ ସିକ୍ୟୁର୍ ଏଆଇ'ର ସିଇଓ ବ୍ରେଣ୍ଡନ୍ ଷ୍ଟେନହାଉଜର ଏକ ବିବୃତିରେ କହିଛନ୍ତି, ଏହି କମ୍ପାନୀଗୁଡ଼ିକର ଅଧିକାରୀମାନେ ବର୍ଷ ବର୍ଷ ଧରି ଆମକୁ ସତର୍କ କରାଇ ଆସୁଛନ୍ତି ଯେ, ସେମାନଙ୍କର ନିଜସ୍ୱ ଅତ୍ୟାଧୁନିକ ଏଆଇ ମଡେଲ୍ଗୁଡ଼ିକ ବିନାଶକାରୀ ବିପଦ ସୃଷ୍ଟି କରିପାରନ୍ତି।
ସେ ଆହୁରି କହିଛନ୍ତି, ଏହା ସତ୍ତ୍ୱେ ସେମାନେ ନିରନ୍ତର ଅଧିକ ଶକ୍ତିଶାଳୀ ଏଆଇ ବିକଶିତ କରିବା ଏବଂ ଏହାକୁ ବଜାରକୁ ଆଣିବା ପାଇଁ ପ୍ରତିଯୋଗିତାରେ ଲାଗିଛନ୍ତି। ସେମାନେ ନିଜେ ସ୍ୱୀକାର କରୁଛନ୍ତି ଯେ, ଏହି ପ୍ରଯୁକ୍ତିକୁ ବିଶ୍ୱସନୀୟ ଭାବେ ନିୟନ୍ତ୍ରଣ କରିବା ସେମାନଙ୍କ ପକ୍ଷରେ ସମ୍ଭବ ନୁହେଁ। ଏବେ ତ ସେମାନେ ଏଆଇର ଗବେଷଣା ଓ ବିକାଶ କାର୍ଯ୍ୟ ମଧ୍ୟ ନିଜେ ଏଆଇକୁ ହିଁ ଦାୟିତ୍ୱ ଦେଉଛନ୍ତି।
ହିନ୍ଦୁସ୍ଥାନ ସମାଚାର / ସ୍ୱାଗତିକା
