
ସମସ୍ତ ଥାନା ଓ ଫାଣ୍ଡି ହାଇଆଲର୍ଟରେ, ଗୋପାଳପୁର ଉପକୂଳରେ ମେରାଇନ୍ ପାଟ୍ରୋଲିଂ କଡ଼ାକଡ଼ି
ଗଞ୍ଜାମ, ୧୮ ନଭେମ୍ବର (ହି.ସ.) : ସମ୍ଭାବ୍ୟ ବାତ୍ୟା ‘ଆକଭାନ୍’କୁ ଦୃଷ୍ଟିରେ ରଖି ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ଓ ଝଡ଼ ପବନ ଆଶଙ୍କା ମଧ୍ୟରେ ବ୍ରହ୍ମପୁର ପୁଲିସ ପକ୍ଷରୁ ବ୍ୟାପକ ସତର୍କତାମୂଳକ ବ୍ୟବସ୍ଥା ଗ୍ରହଣ କରାଯାଇଛି। ଭାରତୀୟ ପାଣିପାଗ ବିଭାଗ (ଆଇଏମଡି)ର ସତର୍କ ସୂଚନା ପରେ ସମସ୍ତ ଥାନା ଓ ଫାଣ୍ଡିକୁ ହାଇଆଲର୍ଟରେ ରଖାଯାଇଛି। ଜରୁରୀ ପରିସ୍ଥିତିର ମୁକାବିଲା ଓ ଜନଜୀବନର ସୁରକ୍ଷା ପାଇଁ ୨୪ ଘଣ୍ଟିଆ ନିୟନ୍ତ୍ରଣ କକ୍ଷ ସହ ପରିସ୍ଥିତି ଉପରେ ନିରନ୍ତର ନଜର ରଖାଯାଉଛି।
ତଳିଆ ଓ ଉପକୂଳ ଅଞ୍ଚଳରୁ ବିପଦସଙ୍କୁଳ ଲୋକଙ୍କୁ ସୁରକ୍ଷିତ ସ୍ଥାନ ଓ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତର କରିବାରେ ପୁଲିସ ସହଯୋଗ କରିବ। ବୟସ୍କ, ମହିଳା, ଶିଶୁ ଓ ଦିବ୍ୟାଙ୍ଗଙ୍କ ସୁରକ୍ଷାକୁ ସ୍ୱତନ୍ତ୍ର ପ୍ରାଥମିକତା ଦିଆଯାଇଛି।
ବାତ୍ୟା ଓ ବର୍ଷା ଯୋଗୁଁ ରାସ୍ତାରେ ଗଛ ପଡ଼ି ଯାତାୟାତ ବାଧାପ୍ରାପ୍ତ ହେଲେ ତୁରନ୍ତ ହଟାଇବା ପାଇଁ ଉଦ୍ଧାରକାରୀ ଦଳ ସହ ସମନ୍ୱୟ ରଖାଯାଇଛି। ଗୋପାଳପୁର ଉପକୂଳରେ ସାମୁଦ୍ରିକ ପାଟ୍ରୋଲିଂକୁ ଜୋରଦାର କରାଯାଇଛି। ମତ୍ସ୍ୟଜୀବୀମାନଙ୍କୁ ସମୁଦ୍ରକୁ ନଯିବାକୁ କଡ଼ା ନିର୍ଦ୍ଦେଶ ଦିଆଯାଇଛି।
ସେହିପରି ଜଳମଗ୍ନ ରାସ୍ତା ଓ ଦୁର୍ବଳ ପୋଲ ନିକଟରେ ବ୍ୟାରିକେଡ୍ ବ୍ୟବସ୍ଥା କରାଯିବା ସହ ଯାତାୟାତ ନିୟନ୍ତ୍ରଣ କରାଯିବ। ଆମ୍ବୁଲାନ୍ସ, ରିଲିଫ୍ ଗାଡ଼ି ଓ ଜରୁରୀ ସେବାରେ ନିୟୋଜିତ ଯାନବାହନ ଯେପରି ବାଧାମୁକ୍ତ ଭାବେ ଯାତାୟାତ କରିପାରିବେ, ସେଥିପ୍ରତି ଧ୍ୟାନ ଦିଆଯାଉଛି।
ବ୍ରହ୍ମପୁର ପୁଲିସ ପକ୍ଷରୁ ଜନସାଧାରଣଙ୍କୁ ସମୁଦ୍ରକୂଳ, ଫୁଲିଥିବା ନଦୀ, ଜଳମଗ୍ନ ରାସ୍ତା ଏବଂ ଭାଙ୍ଗିଥିବା ବିଦ୍ୟୁତ୍ ଖୁଣ୍ଟ ନିକଟକୁ ନଯିବାକୁ ପରାମର୍ଶ ଦିଆଯାଇଛି। ଗୁଜବ ଓ ଅପୁଷ୍ଟ ସୂଚନା ପ୍ରସାର ନକରି କେବଳ ସରକାରୀ ସୂଚନା ଓ ପାଣିପାଗ ବୁଲେଟିନ୍ ଉପରେ ଭରସା କରିବାକୁ ପୁଲିସ ଅନୁରୋଧ କରିଛି।
ଜରୁରୀକାଳୀନ ସହାୟତା ପାଇଁ ୧୧୨ କିମ୍ବା +୯୧ ୯୪୩୮୯ ୧୬୬୭୦ ନମ୍ବରରେ ଯୋଗାଯୋଗ କରିବାକୁ କୁହାଯାଇଛି।
ହିନ୍ଦୁସ୍ଥାନ ସମାଚାର / ହୃଷୀକେଶ