
ନୂଆଦିଲ୍ଲୀ, ୧୮ ନଭେମ୍ବର (ହି.ସ.)। କେନ୍ଦ୍ରୀୟ କୃଷି ଓ କୃଷକ କଲ୍ୟାଣ ତଥା ଗ୍ରାମୀଣ ବିକାଶ ମନ୍ତ୍ରୀ ଶିବରାଜ ସିଂହ ଚୌହାନ ନଭେମ୍ବର ୨୦ ତାରିଖରେ ଭାରତର ପ୍ରଥମ ସ୍ୱଦେଶୀ ନିଷ୍କ୍ରିୟ ଏଚ୍୫ଏନ୍୧ (କ୍ଲେଡ୍ ୨.୩.୨.୧ଏ) ବାର୍ଡ ଫ୍ଲୁ ଟିକା ଦେଶକୁ ସମର୍ପଣ କରିବେ। କୁକୁଡ଼ାଙ୍କ ପାଇଁ ବିକଶିତ ଏହି ଟିକାକୁ ଭୋପାଳସ୍ଥିତ ଭାରତୀୟ କୃଷି ଅନୁସନ୍ଧାନ ପରିଷଦର ଜାତୀୟ ଉଚ୍ଚ ସୁରକ୍ଷା ପଶୁ ରୋଗ ସଂସ୍ଥାନ (ଆଇସିଏଆର୍-ଏନ୍ଆଇଏଚ୍ଏସ୍ଏଡି) ପ୍ରସ୍ତୁତ କରିଛି। ଦେଶରେ ଏହି ଭୂତାଣୁ ବିରୋଧରେ ବିକଶିତ ଏହା ପ୍ରଥମ ଟିକା।
କେନ୍ଦ୍ରୀୟ କୃଷି ଓ କୃଷକ କଲ୍ୟାଣ ମନ୍ତ୍ରଣାଳୟ ଅନୁଯାୟୀ, ନଭେମ୍ବର ୨୦ ତାରିଖରେ ଭୋପାଳସ୍ଥିତ ଆଇସିଏଆର୍-ଏନ୍ଆଇଏଚ୍ଏସ୍ଏଡିରେ ଏହି ଟିକାକୁ ଦେଶକୁ ସମର୍ପଣ କରାଯିବ। ଦେଶରେ ବ୍ୟାପୁଥିବା ଏଚ୍୫ଏନ୍୧ ଭୂତାଣୁର କ୍ଲେଡ୍ ୨.୩.୨.୧ଏ ଷ୍ଟ୍ରେନ୍ରୁ କୁକୁଡ଼ାମାନଙ୍କୁ ସୁରକ୍ଷା ଦେବା ଉଦ୍ଦେଶ୍ୟରେ ଏହି ଟିକା ବିକଶିତ କରାଯାଇଛି।
ମନ୍ତ୍ରଣାଳୟ ଅନୁଯାୟୀ, ଅତ୍ୟଧିକ ରୋଗଜନକ ଏଭିଆନ୍ ଇନ୍ଫ୍ଲୁଏଞ୍ଜା (ଏଚ୍ପିଏଆଇ), ଯାହାକୁ ସାଧାରଣତଃ ବାର୍ଡ ଫ୍ଲୁ କୁହାଯାଏ, ଏହା କୁକୁଡ଼ାମାନଙ୍କୁ ପ୍ରଭାବିତ କରୁଥିବା ଏକ ଗମ୍ଭୀର ରୋଗ। ଏହି ରୋଗ ବ୍ୟାପିଲେ ସଂକ୍ରମିତ ପକ୍ଷୀମାନଙ୍କ ମୃତ୍ୟୁହାର ପ୍ରାୟ ୧୦୦ ପ୍ରତିଶତ ପର୍ଯ୍ୟନ୍ତ ପହଞ୍ଚିପାରେ। ରୋଗର ପ୍ରକୋପ ଯୋଗୁଁ ବହୁ ସଂଖ୍ୟାରେ ପକ୍ଷୀଙ୍କୁ ମାରିବାକୁ ପଡ଼ିଥାଏ ଏବଂ ବାଣିଜ୍ୟ ଉପରେ କଟକଣା ଲାଗୁ ହୋଇଥାଏ। ଏହାଦ୍ୱାରା କୁକୁଡ଼ା ଚାଷୀମାନେ ବ୍ୟାପକ ଆର୍ଥିକ କ୍ଷତିର ସମ୍ମୁଖୀନ ହୋଇଥାନ୍ତି। ଏହାର ପ୍ରଭାବ କୁକୁଡ଼ା ଉତ୍ପାଦର ଅନ୍ତର୍ଜାତୀୟ ବାଣିଜ୍ୟ, ଦରଦାମ ଏବଂ ଚାଷୀଙ୍କ ଜୀବିକା ଉପରେ ମଧ୍ୟ ପଡ଼ିଥାଏ।
ଭାରତରେ ୨୦୦୬ ମସିହାରେ ପ୍ରଥମ ଥର ପାଇଁ ଏହି ରୋଗ ଚିହ୍ନଟ ହେବା ପରଠାରୁ ଏଚ୍୫ଏନ୍୧ ଏବଂ ଏଚ୍୫ଏନ୍୮ ଉପପ୍ରକାରର ୫୦୦ରୁ ଅଧିକ ମିଳିତ ସଂକ୍ରମଣ ଘଟଣା ସାମ୍ନାକୁ ଆସିଛି। ମନ୍ତ୍ରଣାଳୟ ଅନୁଯାୟୀ, ବାର୍ଡ ଫ୍ଲୁର ବଡ଼ଧରଣର ପ୍ରକୋପ ଭାରତର ମୋଟ ଘରୋଇ ଉତ୍ପାଦ (ଜିଡିପି) ଅଭିବୃଦ୍ଧିକୁ ୧.୫ ପ୍ରତିଶତ ପର୍ଯ୍ୟନ୍ତ ହ୍ରାସ କରିପାରେ। ଏହି ରୋଗ ଅନିୟନ୍ତ୍ରିତ ଭାବେ ବ୍ୟାପିଲେ ଦେଶର ୨୦ ପ୍ରତିଶତରୁ ଅଧିକ କୁକୁଡ଼ା ସଂଖ୍ୟା ବିପଦରେ ପଡ଼ିପାରେ। ୨୦୦୬ ମସିହାରେ ଏହି ରୋଗର ପ୍ରକୋପ ଯୋଗୁଁ ପ୍ରତ୍ୟକ୍ଷ ଓ ପରୋକ୍ଷ ଭାବେ ପ୍ରାୟ ୨,୨୦୦ରୁ ୩,୦୦୦ କୋଟି ଟଙ୍କାର କ୍ଷତି ହୋଇଥିବା ଆକଳନ କରାଯାଇଛି। ମଣିପୁରରେ ହୋଇଥିବା ଏକ ସଂକ୍ରମଣ ଯୋଗୁଁ ରାଜ୍ୟର ମୋଟ ଘରୋଇ ଉତ୍ପାଦର ୦.୫ ପ୍ରତିଶତ ସମାନ କ୍ଷତି ହୋଇଥିଲା।
ବାର୍ଡ ଫ୍ଲୁ ଜନସ୍ୱାସ୍ଥ୍ୟ ଦୃଷ୍ଟିରୁ ମଧ୍ୟ ଚିନ୍ତାର ବିଷୟ। ବିଶ୍ୱ ସ୍ୱାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ଅନୁଯାୟୀ, ୨୦୦୩ ମସିହାଠାରୁ ଏପର୍ଯ୍ୟନ୍ତ ଭାରତ ସମେତ ୨୫ଟି ଦେଶରେ ଏଚ୍୫ଏନ୍୧ ଏଭିଆନ୍ ଇନ୍ଫ୍ଲୁଏଞ୍ଜାର ୧,୦୦୩ଟି ମାନବ ସଂକ୍ରମଣ ମାମଲା ସାମ୍ନାକୁ ଆସିଛି। ଏଥିରେ ୪୭୯ ଜଣଙ୍କର ମୃତ୍ୟୁ ହୋଇଛି।
ହିନ୍ଦୁସ୍ଥାନ ସମାଚାର / ସ୍ୱାଗତିକା