‘ସ୍ଲିଙ୍ଗସଟ୍ ୨୦୨୬’ ପ୍ରତିଯୋଗିତାରେ ଗ୍ରାଣ୍ଡ ବିଜେତା ହେଲେ ସାବିର ହୁସେନ, ମିଳିଲା ୪ ଲକ୍ଷ ସିଙ୍ଗାପୁର ଡଲାର ଅନୁଦାନ
କୋଲକାତା, ୦୩ ନଭେମ୍ବର (ହି.ସ.) : ପଶ୍ଚିମବଙ୍ଗର ପୂର୍ବ ବର୍ଦ୍ଧମାନ ଜିଲ୍ଲାର ଖଣ୍ଡଘୋଷ ଅନ୍ତର୍ଗତ ବାଦୁଲିଆ ଗ୍ରାମର ଯୁବ ବୈଜ୍ଞାନିକ ସାବିର ହୁସେନ ନିଜର ଅଭିନବ ଉଦ୍ଭାବନ ବଳରେ ଅନ୍ତର୍ଜାତୀୟ ସ୍ତରରେ ରାଜ୍ୟ ତଥା ଦେଶର ଗୌରବ ବଢ଼ାଇଛନ୍ତି। ତାଙ୍କ ଦ୍ୱାରା ବିକଶିତ ସ୍ୱତନ୍ତ୍ର ପାଉଡର ‘ଷ୍ଟପ୍ ବ୍ଲିଡ୍’ ମାତ୍ର ୩୦ ସେକେଣ୍ଡ ମଧ୍ୟରେ ରକ୍ତସ୍ରାବ ବନ୍ଦ କରିବାରେ ସକ୍ଷମ। ଅକ୍ଟୋବର ୨୯, ୨୦୨୬ରେ ସିଙ୍ଗାପୁରରେ ଆୟୋଜିତ ଅନ୍ତର୍ଜାତୀୟ ‘ସ୍ଲିଙ୍ଗସଟ୍ ୨୦୨୬’ ପ୍ରତିଯୋଗିତାରେ ତାଙ୍କୁ ବଡ଼ ସଫଳତା ମିଳିଛି। ଏହି ପ୍ରତିଯୋଗିତାରେ ସାବିରଙ୍କୁ ଗ୍ରାଣ୍ଡ ବିଜେତା ଘୋଷଣା କରାଯାଇଛି।
ସ୍ୱାସ୍ଥ୍ୟ ଓ ବାୟୋମେଡିକାଲ୍ ବର୍ଗରେ ସାବିରଙ୍କ ଷ୍ଟାର୍ଟଅପ୍ ‘ମିରାକ୍ୟୁଲସ୍’ ପ୍ରଥମ ସ୍ଥାନ ହାସଲ କରିବା ସହ ଗ୍ରାଣ୍ଡ ବିଜେତାର ମୁକୁଟ ପିନ୍ଧିଛି। ଏହି ସଫଳତା ପାଇଁ ତାଙ୍କ କମ୍ପାନୀକୁ ୪ ଲକ୍ଷ ସିଙ୍ଗାପୁର ଡଲାରର ଅନୁଦାନ ରାଶି ମଧ୍ୟ ମିଳିଛି।
ଏହି ଷ୍ଟାର୍ଟଅପ୍ ରାଉରକେଲାସ୍ଥିତ ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (ଏନ୍ଆଇଟି)ର ବାୟୋଟେକ୍ନୋଲୋଜି ଓ ମେଡିକାଲ୍ ଇଞ୍ଜିନିୟରିଂ ବିଭାଗର ସହଯୋଗରେ କାର୍ଯ୍ୟ କରୁଛି। ପ୍ରଫେସର ଦେବେନ୍ଦ୍ର ବର୍ମାଙ୍କ ମାର୍ଗଦର୍ଶନରେ ଏହି ସ୍ୱତନ୍ତ୍ର ପାଉଡର ବିକଶିତ କରାଯାଇଛି। ଦୁର୍ଘଟଣା, ଆଘାତ ଓ ଜରୁରୀକାଳୀନ ପରିସ୍ଥିତିରେ ତୁରନ୍ତ ରକ୍ତସ୍ରାବ ନିୟନ୍ତ୍ରଣ କରିବା ଏହାର ମୁଖ୍ୟ ଉଦ୍ଦେଶ୍ୟ।
ସାବିର ହୁସେନଙ୍କ ଏହି ଉଦ୍ଭାବନ ପୂର୍ବରୁ ମଧ୍ୟ ଜାତୀୟ ସ୍ତରରେ ପରିଚୟ ହାସଲ କରିସାରିଛି। ପ୍ରାୟ ସାତ ବର୍ଷ ପୂର୍ବେ, ୨୦୧୯ରେ ଦିଲ୍ଲୀସ୍ଥିତ ଡିଆରଡିଓ ଭବନରେ ତାଙ୍କୁ ଏହି ଅଭିନବ ଉଦ୍ଭାବନ ପାଇଁ ସମ୍ମାନିତ କରାଯାଇଥିଲା। ସେତେବେଳେ କେନ୍ଦ୍ରମନ୍ତ୍ରୀ ରାଜନାଥ ସିଂହ ତାଙ୍କୁ ପ୍ରଶଂସାପତ୍ର ପ୍ରଦାନ କରିଥିଲେ।
ସାବିର ଖଣ୍ଡଘୋଷର ଏକ ବିଦ୍ୟାଳୟରୁ ନିଜର ପ୍ରାଥମିକ ଶିକ୍ଷା ଶେଷ କରିଥିଲେ। ଏହାପରେ ବର୍ଦ୍ଧମାନରୁ ଉଚ୍ଚମାଧ୍ୟମିକ ପରୀକ୍ଷା ଉତ୍ତୀର୍ଣ୍ଣ ହୋଇଥିଲେ। ପରେ କୋଲକାତାର ଏକ କଲେଜରୁ ବି.ଟେକ୍ ଏବଂ ଏନ୍ଆଇଟି ରାଉରକେଲାରୁ ବାୟୋମେଡିକାଲ୍ ବିଷୟରେ ଏମ୍.ଟେକ୍ ଡିଗ୍ରୀ ହାସଲ କରିଥିଲେ।
ତାଙ୍କ ଦ୍ୱାରା ବିକଶିତ ‘ଷ୍ଟପ୍ ବ୍ଲିଡ୍’ ପାଉଡରକୁ କେନ୍ଦ୍ରୀୟ ଔଷଧ ମାନକ ନିୟନ୍ତ୍ରଣ ସଂଗଠନ (ସିଡିଏସ୍ସିଓ)ର ଅନୁମୋଦନ ମଧ୍ୟ ମିଳିସାରିଛି। ଏପର୍ଯ୍ୟନ୍ତ ୨୫୦ରୁ ଅଧିକ ହସ୍ପିଟାଲ୍ ଏବଂ ଅନେକ ସାମରିକ ୟୁନିଟ୍ରେ ଏହି ପ୍ରଯୁକ୍ତିର ବ୍ୟବହାର କରାଯାଇଛି।
ସିଙ୍ଗାପୁରରେ ଏହି ଅନ୍ତର୍ଜାତୀୟ ସଫଳତା ପରେ ଏନ୍ଆଇଟି ପରିଚାଳନା ପକ୍ଷରୁ ମଧ୍ୟ ସାବିର ହୁସେନଙ୍କୁ ଅଭିନନ୍ଦନ ଜଣାଯାଇଛି। ଏକ ଛୋଟ ଗାଁରୁ ବାହାରି ନିଜର ବୈଜ୍ଞାନିକ ଉଦ୍ଭାବନ ବଳରେ ଅନ୍ତର୍ଜାତୀୟ ପରିଚୟ ସୃଷ୍ଟି କରିଥିବା ସାବିରଙ୍କ ଏହି ସଫଳତା ଆଜି ପଶ୍ଚିମବଙ୍ଗର ଯୁବପିଢ଼ିଙ୍କ ପାଇଁ ପ୍ରେରଣାର ଉତ୍ସ ପାଲଟିଛି।
ହିନ୍ଦୁସ୍ଥାନ ସମାଚାର / ସ୍ୱାଗତିକା
