ନୂଆଦିଲ୍ଲୀ, ନଭେମ୍ବର ୦୩ (ହି.ସ.)। ଆତଙ୍କବାଦୀଙ୍କୁ ଅର୍ଥ ଯୋଗାଣ ସହ ଜଡ଼ିତ ଏକ ମାମଲାରେ ମଙ୍ଗଳବାର ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)ର ଶ୍ରୀନଗର ଆଞ୍ଚଳିକ କାର୍ଯ୍ୟାଳୟ ପକ୍ଷରୁ ଶ୍ରୀନଗରର ଚାରୋଟି ସ୍ଥାନରେ ଚଢ଼ାଉ କରାଯାଇଛି। ଉମର ଆଦିଲ ଡାର ଓ ତାଙ୍କ ସହଯୋଗୀଙ୍କ ସହ ଜଡ଼ିତ ମାମଲାରେ ଏହି ଚଢ଼ାଉ କରାଯାଉଛି। ଇଡି ଅନୁଯାୟୀ, ଉମର ଆଦିଲ ଡାର ନିଷିଦ୍ଧ ଆତଙ୍କବାଦୀ ସଂଗଠନ ଲସ୍କର-ଏ-ତୈବାର ଓଭର ଗ୍ରାଉଣ୍ଡ ୱାର୍କର (ଓଜିଡବ୍ଲ୍ୟୁ) ଭାବେ କାମ କରୁଥିଲା ଏବଂ ସଂଗଠନର ବିଭିନ୍ନ କାର୍ଯ୍ୟକଳାପରେ ସକ୍ରିୟ ଥିଲା।
ଇଡି ପକ୍ଷରୁ କୁହାଯାଇଛି ଯେ, ଉମର ଆଦିଲ ଡାରକୁ ପୂର୍ବରୁ ତା’ର ସହଯୋଗୀମାନଙ୍କ ସହ ବିପୁଳ ପରିମାଣର ନଗଦ ଟଙ୍କା ଏବଂ ନିଷିଦ୍ଧ ସଂଗଠନ ସହ ଜଡ଼ିତ ଆପତ୍ତିଜନକ ସାହିତ୍ୟ ସହ ଧରାଯାଇଥିବା ଅଭିଯୋଗ ରହିଛି। ଜମ୍ମୁ-କଶ୍ମୀରରେ ବିଚ୍ଛିନ୍ନତାବାଦୀ ଓ ଭାରତ ବିରୋଧୀ କାର୍ଯ୍ୟକଳାପରେ କଥିତ ସମ୍ପୃକ୍ତି ମାମଲାରେ ସେ ପୂର୍ବରୁ ପ୍ରାୟ ଚାରି ବର୍ଷ ଜେଲ୍ରେ ମଧ୍ୟ ରହିଥିଲା।
ଅପରାଧ ମାଧ୍ୟମରେ ଅର୍ଜିତ ଅର୍ଥର ଉତ୍ସ ଜାଣିବା, ଆର୍ଥିକ ନେଟୱର୍କ ଓ ଅର୍ଥ ଯୋଗାଣର ମାଧ୍ୟମଗୁଡ଼ିକୁ ଚିହ୍ନଟ କରିବା ସହ ସୀମାପାରରେ ରହି କାର୍ଯ୍ୟ କରୁଥିବା ହ୍ୟାଣ୍ଡଲରମାନଙ୍କ ସହ ତାଙ୍କର କଥିତ ସମ୍ପର୍କର ତଦନ୍ତ ପାଇଁ ଇଡି ଏହି ତଲାସି ଅଭିଯାନ ଚଳାଇଛି।
ଏଥିସହ କଥିତ ଆତଙ୍କବାଦୀ ଅର୍ଥ ଯୋଗାଣ କାର୍ଯ୍ୟକଳାପ ସହ ଜଡ଼ିତ ଅନ୍ୟାନ୍ୟ ପ୍ରମାଣ ସଂଗ୍ରହ କରିବା ମଧ୍ୟ ଏହି ତଦନ୍ତର ଉଦ୍ଦେଶ୍ୟ। ଏହି ମାମଲାରେ ଆଗକୁ ତଦନ୍ତ ଜାରି ରହିଛି।
ହିନ୍ଦୁସ୍ଥାନ ସମାଚାର / ସ୍ୱାଗତିକା
